2017-06-25 09:02:18 clouds 27o High | Kigali Rwanda

Dukurikire:
 
 

Rusizi:Abaturage bagiye guhabwa imbuto y’imyumbati nyuma y’imyaka 2 batayihinga

Yanditswe na IMVAHO NSHYA

Kuya 2017-06-14 13:04:01

 
Share on:
 
Yasuwe:31
 
Yavuzweho:200
 
10
 
10

Nyuma y’imyaka 2 abaturage bo mu murenge wa Bugarama mu karere ka Rusizi badahinga imyumbati bitewe n’indwara ya Kabore, ubuyobozi bw’uyu murenge burabizeza ko imbuto nziza yamaze kuboneka, ndetse ubu ikaba irimo gutuburwa ku buryo muri Nzeli bose bazahabwa imbuto bagahinga.

Abaturage bo mu Bugarama bavuga ko igihingwa cy’imyumbati kibafatiye runini, kuko ubusanzwe bakunda ubugari cyane, aka gace kakaba karafatwaga nk’ikigega cy’akarere kuri ubu buhinzi bw’imyumbati.

Kuba indwara ya Kabore yaribasiye imyumbati, byabagizeho ingaruka zikomeye, aho ikilo cy’ifu y’imyumbati cyikubye inshuro 2, kuko mu bihe nk’ibi ikilo cyabaga kigura amafaranga 250 cyangwa 300 none ubu kiragura amafaranga hagati ya 550 na 600, mu mujyi wa Rusizi ho kikaba kigeze ku mafaranga 700.

JPEG - 554.8 kb
Bari bamaze imyaka 2 badahinga imyumbati itanga ubugari

Mu kiganiro n’Imvaho Nshya, Umunyamabanga Nshingwabikorwa w’uyu murenge wa Bugarama Rukazambuga Gilbert, yahumurije abaturage ababwira ko mu kwezi kwa 9 uyu mwaka bazaba bongeye kubona imbuto y’imyumbati yo guhinga, kuko hari imbuto bahawe na RAB batubuye kuri hegitari 100.

Muri Nzeli hegitari zigera kuri 900 zisanzwe zihingwaho imyumbati zizahingwa kuko imbuto izaba yabonetse, bikazakemura ikibazo gikomeye cy’ibura ry’ifu y’imyumbati cyari kimaze kwigaragaza muri uyu murenge.

Yagize ati “Birumvikana nyuma y’aho indwara ya Kabore itereye mu myumbati yacu itaranera neza bikaba ngombwa ko tuyikura igitaraganya, ibyakurikiyeho byateye abaturage kubura ubugari kandi ni ikiribwa kibafatiye runini cyane hano.

Byatumye n’igiciro cyayo kizamuka cyane, ariko natwe ntitwicaye, kuko RAB yamaze kuduha imbuto nziza y’imyumbati twatubuye kuri hegitari 100, iyi mbuto ikazahabwa abaturage mu kwezi kwa 9 uyu mwaka bakayihinga.”

Avuga ko ubu imyumbati yahageraga imyinshi yari isigaye iva za Ruhango, Nyanza n’ahandi ikabageraho ihenze, ariko ngo ubu mu mwaka utaha bigenze neza nta kibazo cy’ifu y’ubugari kizongera kuba kivugwa muri uyu murenge.

Bashimira RAB yumvise ikibazo cy’aba baturage, akizera ko nibatangira kuyihinga batazongera guhura n’ibibazo nk’ibi by’indwara zidasanzwe kuko nta handi muri aka karere imyumbati ihingwa nka hano, bikaba byarabateye ibibazo cyane.

Abaturage b’uyu murenge baganiriye n’Imvaho Nshya, bagaragaje ibyishimo byo kuba bagiye kongera guhinga imyumbati kuko ari yo ngo isanzwe ibashobora kuruta ibigori, umuceri n’ibishyimbo basanzwe beza, bakavuga ko ikibazo cy’ibiribwa bike kihavugwa kizahita kigabanuka, kuko n’abacuruzi bayo bayibonamo menshi bakagura ibindi bakeneye.

Mukarurangwa Theophille yagize ati “Ni inkuru nziza kuri twe kuko nta kindi twaha abana dufite ngo twishimire ko bahaze keretse ubu bugari bw’imyumbati bafatisha uburisho bw’imikeke, isambaza, imboga n’ibindi dusanzwe dufatisha, kuko abana iyo tubahaye ikindi kitari ubugari usanga batishimye, kongera guhinga imyumbati bikaba bivuze byinshi mu iterambere no kurya neza kwacu.”

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE