2017-07-21 15:15:02 clouds 27o High | Kigali Rwanda

Dukurikire:
 
 

RURA yasuye abamotari ibakemurira ibibazo byari byarananiranye

Yanditswe na IMVAHO NSHYA

Kuya 2017-05-24 10:37:35

 
Share on:
 
Yasuwe:178
 
Yavuzweho:200
 
10
 
10

Ubuyobozi bw’ikigo cy’igihugu gishinzwe kugenzura imirimo ifitiye igihugu akamaro (RURA), burakangurira abamotari bo mu karere ka Rubavu kugira umuco wo gutangira amakuru ku gihe, kugira ngo ubuyobozi bubafashe gukemura ibibazo.

Ubu butumwa bwatangiwe muri gahunda iki kigo kirimo yo kwegera abaturage mu turere, hagamijwe kurebera hamwe bimwe mu bibazo byananiranye bibadindiza mu iterambere, bigakemurirwa aho ba nyirabyo batagombye gusirangira mu nzego zitandukanye.

Ubuyobozi bwa RURA bwaganiriye n’abagize amakoperative atwara abagenzi kuri moto, hanatangwa ibyangombwa by’impushya zo gutwara abagenzi kuri moto, ku batazifite.

JPEG - 443 kb
Abamotari bishimiye gukemurirwa ibibazo no guhabwa ibyangombwa badasiragiye(Foto Iyaremye Y)

Tony Kuramba, umuvugizi wa RURA, avuga ko ikigamijwe ari ukubasanga aho bari bagakemurirwa ibibazo bafite, cyane ko ngo abayobozi b’amakoperative yabo hari ibyo batabashaga kubakemurira, aho anemeza ko iki gikorwa bagifatanyije n’izindi nzego zinyuranye z’ubuyobozi bw’igihugu.

Aragira ati “Ubu turaganira n’abakora akazi ko gutwara abagenzi kuri za moto, tuganire twumve ibibazo bafite ndetse bimwe binakemurirwe aho tubasanze. Twajyaga tugezwaho ibibazo n’abayobozi babo ariko ikigaragara ni uko hari ibibazo mu mikorere y’amakoperative, hagatangwa amakuru atari meza ku kigo cyacu ari nayo mpamvu ubu twamanutse ngo tubikemure.”

Bamwe mu bamotari, nyuma yo gukemurirwa bimwe mu bibazo bari bafite, ndetse bakanahererwa aho impushya zibemerera gutwara moto, bavuze ko bishimiye iyi gahunda ndetse ko baciye ukubiri n’ikibazo cya bamwe muri bo bajyaga bakora bihisha inzego z’umutekano kubera kutagira ibyangombwa.

Hakizimana Epimaque, umwe mu bamotari aragira ati “Twari dufite ibibazo bikomeye bijyanye no kubona ibyangombwa, aho abayobozi bacu twajyaga tubatuma bamwe bakatubeshya ku buryo twakoraga nta byangombwa, bamwe bakwepana na Polisi kubera gutinya ibihano, ariko kuba batwegereye bakadukemurira ibibazo biradufasha cyane.”

We na bagenzi be bavuga ko gusurwa n’iki kigo babyishimiye cyane kandi bitumye bumva ko hari uburenganzira bafite, ndetse bamenya n’aho bakwiye kubariza ibitagenda neza.

Abakozi ba RURA bari muri iyi gahunda bakaba bafite ibyangombwa byose bibafasha gukemura bimwe mu bibazo byari bikomereye abamotari, ibidashoboye gukemukira aho bikazashakirwa umuti urambye vuba.

Ubuyobozi bwa RURA bwemeza ko iki gikorwa kikazakomereza no mu tundi turere twose tw’igihugu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE