2017-06-24 05:01:57 clouds 27o High | Kigali Rwanda

Dukurikire:
 
 

Ruhango:Abaturage 1300 bamaze umwaka bategereje ingurane y’ibyabo

Yanditswe na IMVAHO NSHYA

Kuya 2016-04-27 07:03:20

 
Share on:
 
Yasuwe:7
 
Yavuzweho:200
 
10
 
10

Abaturage bafite imitungo yangirikiye mu bikorwa byo kugeza umuriro w’amashanyarazi mu kagari ka Tambwe mu karere ka Ruhango, barasaba ko bafashwa kubona ingurane z’iyo mitungo yabo nk’uko bari barabisezeranyijwe, ariko kugeza ubu ngo umwaka ukaba ushize amaso yaraheze mu kirere.

Nyuma y’amezi agera kuri ane bagejejweho umuriro w’amashanyarazi, aba baturage bo mu kagari ka Tambwe, bavuga ko babyishimiye cyane kuko ngo ari kimwe mu bikorwa remezo bari banyotewe cyane.

Gusa ku rundi ruhande, bamwe muri aba baturage bari bafite imitungo, nk’imirima yarimo imyaka, ikaza kurandurwa hanyuzwamo amapoto y’insinga, bavuga ko nyuma yo kubarurirwa basezeranyijwe guhabwa ingurane vuba, ariko ngo bategereje ko bahabwa ibyo bijejwe baraheba.

JPEG - 52.5 kb
Hari ahagiye hashingwa amapoto y’insinga z’amashanyarazi akangiza imyaka y’abaturage

Nzabamwita Peter, umwe muri aba baturage, yavuze ko n’ubwo bagejejweho amashanyarazi ndetse akaba yaratangiye kubafasha kwiteza imbere mu buryo bwihuse, ngo bakwiye guhabwa ingurane y’ibyabo byangijwe.

Yagize ati:"Ni byiza ko batugejejeho iterambere, ariko kandi ikibazo dufite, hari ibyacu byangijwe bashaka inzira y’insinga z’amashanyarazi, ndetse banashinga amapoto, baratubarurira dusinyana amasezerano yo kutwishyura, ariko kugeza magingo aya umwaka urashize bataratwishyura."

Bavuga ko kubera igihombo byabateje, ubuyobozi bw’ikigo gishinzwe gukwirakwiza amazi n’amashanyarazi bwagira icyo bukora, bukuzuza amasezerano bagiranye, kuko ngo byatumye bagwa mu gihombo aho usanga nk’insina zabo zatemwe ubu zari kuba ziri kubungukira, nk’uko Ntakirutuwera Celestin nawe wishyuza ingurane abivuga.

Umuyobozi w’ikigo gishinzwe gukwirakwiza amashanyarazi mu karere ka ruhango, Nyiringango Jean de Dieu, yemera ko koko hari abaturage bo muri ako gace batari bahabwa ingurane z’ibyabo byangijwe.

Nyiringango avuga ko ibi byatewe nuko bamwe muri abo baturage batanze ibyangombwa bituzuye, agahamagarira abatari babyuzuza kubikora vuba.

Yagize ati: "Nibyo koko muri kariya gace hari abaturage babaruriwe imitungo bakazahabwa ingurane, ariko ikibazo cyabayeho, ni bamwe muri bo bagiye batanga ibyangombwa bituzuye ugasanga bidindije iyi gahunda.

Gusa ubu twashyizeho indi gahunda yo kongera gushaka aba baturage, abadafite ibyangombwa bakabizana bityo bagahabwa amafaranga yabo, naho kandi abatanze ibyuzuye turabizeza ko mu gihe kitarenze amezi 2 bazaba bahawe amafaranga yabo."

N’ubwo ubuyobozi bw’iki kigo butatangaje amafaranga yose y’ingurane azahabwa aba baturage, ngo abagomba kuyihabwa bagera ku 1300.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE