2017-08-20 07:43:19 clouds 27o High | Kigali Rwanda

Dukurikire:
 
 

Rubavu:Ubuyobozi bwiyemeje kugoboka abanyeshuri basizwe iheruheru n’inkongi y’umuriro

Yanditswe na IMVAHO NSHYA

Kuya 2017-03-18 11:17:42

 
Share on:
 
Yasuwe:838
 
Yavuzweho:200
 
10
 
10

Ubuyobozi bw’akarere ka Rubavu burizeza ubuvugizi abanyeshuri barangiza amashuri yisumbuye bagizweho ingaruka n’inkongi yibasiye ishuri ry’ababatisita mu Rwanda, riherereye mu mudugudu wa Muhato, akagari k’Umuganda mu murenge wa Gisenyi.

Ni nyuma y’aho aba banyeshuri 18 icyumba bararagamo gifashwe n’inkongi kuwa 15 Werurwe 2017, ibyo bari bafite byose bigashya bigakongoka harimo ibikapu, imyenda, ibitabo bari basize mu cyumba n’ibindi bitandukanye.

Abanyeshuri bavuga ko bahangayitse cyane ni umubare munini w’ababuriyemo indangamuntu zabo, aho bemeza ko bitaboroheye muri ibi bihe bitegura ibizamini bisoza amasomo, kuko batakora imyiteguro harimo kwiyandikisha ku rutonde, kuko bisaba indangamuntu.

JPEG - 74.6 kb
Iki kigo cy’ishuri cyibasiwe n’inkongi abanyeshuri bamwe basigara iheruheru

Kayitare Desire, umunyeshuri wiga mu mwaka wa 6 muri ESBF, avuga ko ibyo bahombeye muri iyi nkongi ari byinshi, ariko ngo batewe impungenge cyane n’indangamuntu zabo zabuze, kuko ibindi bishobora kugurwa mu isoko.

Mu kiganiro yagiranye n’Imvaho Nshya, uyu munyeshuri yagize ati “None se turabigenza gute, nkanjye nitegura ikizamini ejobundi turasabwa kuzuza ibyangombwa byose ngo tujye ku rutonde rw’abazakora kandi ntiwakora nta ndangamuntu, biraduhangayikishije cyane turifuza ubufasha.”

Sinamenye Jeremie, umuyobozi w’akarere ka Rubavu ahumuriza aba banyeshuri, akavuga ko ubuyobozi bugiye kubakorera ubuvugizi bakaba bahabwa indangamuntu mu bihe bya vuba, kugira ngo babone uko bitegura ibizamini ndetse n’ibyangiritse bakazafashwa kongera kubigura.

Aragira ati “Ubuyobozi bwanyu bwandike amazina yanyu na nimero z’indangamuntu zanyu zose, babinyuze mu nzira zose binyuramo kugira ngo mubone ibindi, mubikorere hamwe natwe turabakorera ubuvugizi gahunda yanyu yihute kugira ngo mwitegure neza ibizamini, birakemuka tuzafatanya nk’inzego zose ku buryo ikibazo cyanyu gikemuka kandi vuba.”

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE