2017-09-23 09:22:12 clouds 27o High | Kigali Rwanda

Dukurikire:
 
 

Rubavu: Polisi yashyikirije umuturage utishoboye inzu ya miliyoni 7

Yanditswe na IMVAHO NSHYA

Kuya 2017-06-09 12:46:00

 
Share on:
 
Yasuwe:137
 
Yavuzweho:200
 
10
 
10

Nyiramutuzo Deborah, umuturage utishoboye wo mu murenge wa Kanama mu karere ka Rubavu, yamurikiwe inzu yubakiwe na Polisi y’igihugu muri gahunda ya Police week.

Iyi nzu yatwaye amafaranga arenga miliyoni 7 uyu mubyeyi avuga ko ayibonye ayikeneye cyane, dore ko iyo yabagamo yasaga n’iyamusenyukiyeho, kuko imvura yagwaga bikamusaba kujya kugama ahandi cyangwa akayinyagirirwamo.

Mu buhamya yatanze, yagaragaje ko yararaga yikanga ko iyo nzu yabagamo ishobora kumugwira, cyangwa imvura ikaba yamutungura asinziriye ikamunyagira, icyakora ngo ubu agiye kuryama abashe kugoheka nk’abandi.

Yagize ati «Nari mbayeho nabi cyane ku buryo imvura yagwaga nkajya kugama mu baturanyi, nabo bari baratangiye kunyinubira kubera ko hari n’ubwo yagwaga nijoro bikansaba kujya kubakinguza bakanyugamisha.

PNG - 823.7 kb
Nyiramutuzo wubakiwe inzu asuhuza Guverineri Munyantwari Alphonse ubwo yari yamusuye

Hari ubwo najyaga mu rugo rumwe bakanyinuba nkimukira ahandi, ubwo hose ni ko bagenda bandambirwa, ariko kuba mbonye iwanjye nanjye ngiye kuryama nsinzire n’abana banjye. »

Uyu mubyeyi utishoboye avuga ko yakiranye urugwiro inzu ahawe n’ubuyobozi bwa Polisi y’igihugu, akaba ashimira cyane Perezida wa Repubulika wateje imbere imiyoborere myiza, ari nayo akesha kuba yubakiwe inzu aryamamo nta mpungenge afite z’uko yamugwira.

Tuyisenge Annonciata, umunyamabanga nshingwabikorwa w’umurenge wa Kanama, ashima uruhare rwa Polisi y’igihugu igira mu gufasha abaturage kubaho neza, aho yemeza ko iki gikorwa gifite aho kivana uwahawe inzu n’aho kimugeza.

Yagize ati «Uyu mubyeyi ni umwe mu bo twari dufite wari ukwiye ubufasha bwihutirwa kuko yari abayeho nabi, kuba yubakiwe inzu ni ibintu by’ingirakamaro cyane kandi bigiye kumufasha gutuza no kwiteza imbere.»

Umuvugizi wa Polisi y’igihugu mu ntara y’Uburengerazuba CIP Kanamugire Theobald, avuga ko iyi nzu yubatswe muri gahunda yo gufasha uyu muturage utishoboye kumuhindurira imibereho, akaba ahamya ibikorwa byo kuyubaka byatwaye amafaranga y’u Rwanda asaga miliyoni 7.

Yagize ati «Nta bwo ari ubwa mbere dukoze igikorwa cyo kubakira umuntu utishoboye, abaturage bo muri Yungwe twarabacaniye, abatarabashaga kugerwaho n’amashyanyarazi ubu baracana, kandi ibikorwa byo gufasha abatishoboye birakomeje ntituzahwema kubikora. Icyo dusaba abo dukoreye ibikorwa ni ukubifata neza no kubyuririraho barushaho kwiteza imbere. »

IYAREMYE YVES

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE