2017-08-20 07:43:19 clouds 27o High | Kigali Rwanda

Dukurikire:
 
 

Rubavu:Dasso yashimiwe ko yasubije amafaranga ibihumbi 130 uwayataye

Yanditswe na IMVAHO NSHYA

Kuya 2017-04-06 14:52:51

 
Share on:
 
Yasuwe:919
 
Yavuzweho:200
 
10
 
10

Ubuyobozi bw’akarere ka Rubavu, ku bufatanye na Minisiteri y’ubutegetsi bw’igihugu, bashimiye mu ruhame umukozi w’urwego rwa Dasso witwa Niyifasha Fidele, wasubije amafaranga ibihumbi 130 umuturage wari wayataye.

Uyu mukozi wa Dasso ubusanzwe wungirije ukuriye urwego rwa DASSO mu murenge wa Nyamyumba, yabwiye itangazamakuru ko ayo mafaranga yayatse abaturage bari bayatoraguye, ajya kuyarangisha aza gusanga ari ay’umuturage witwa Ntamugabumwe David arayamusubiza.

Yagize ati “Byashobokaga ko uwayatoraguye tuyasangira kandi ntawari kubimenya, ariko nahisemo kuyasubiza nyirayo kuko ari zimwe mu ndangagaciro twatojwe, ndetse n’uburere nahawe mu muryango.’’

JPEG - 240.6 kb
Dasso Niyifasha wasubije umuturage amafaranga ibihumbi 150 yari yataye (Foto Magarambe T)

Iki gikorwa Minisiteri y’ubutegetsi bw’igihugu yagifashe nk’indashyikirwa, ndetse cyatumye umuyobozi muri iyi Minisiteri ushinzwe imiyoborere n’imikorere y’inzego z’ibanze Mufuruke Fred, yiyizira mu karere ka Rubavu gushimira uyu Dasso imbere ya bagenzi be.

Yavuze ko hari amakosa yagiye akorwa na bamwe mu bakozi ba Dasso ku giti cyabo, ariko ku rundi ruhande agaragaza ko hari byinshi byiza bakora, ku buryo byagaragaye ko mu Rwanda Dasso ikora neza ku kigereranyo cya 86% nk’uko byagaragajwe n’ubushakashatsi.

Ashimira Fidele yagize ati “Turamushimira ko yagaragaje ubunyangamugayo, ubupfura kandi bikaba ari byo dukeneye kuri uru rwego, ni yo mpamvu twaje kumushimira.’’

Uyu muyobozi yakomeje yibutsa ko urwego rwa Dasso rufite uruhare rukomeye mu bikorwa by’umutekano kuko rukorera henshi ndetse rugafasha n’inzego za Polisi n’Ingabo ndetse n’ubuyobozi mu nzego z’ibanze, aho yabasabye gukomeza kwirinda ubuhemu, ruswa, abasaba gukomeza guharanira gukorana neza n’abaturage.

Ibi yabivuze ariko mu gihe mu karere ka Rubavu mu murenge wa Rugerero hari aba Dasso batatu baherutse gutabwa muri yombi bakekwaho ruswa.

Umuyobozi w’akarere ka Rubavu Sinamenye Jeremie akaba avuga ko bazamushakira n’ibindi bihembo kugira ngo bibere isomo n’abagifite imikorere mibi.

Yagize ati “N’ubwo ibihembo bitagira agaciro runaka, ariko tuzabimushakira.’’

Mu karere ka Rubavu habarirwa abakozi ba Dasso 92 nk’uko bitangazwa na Maisha Patrick ushinzwe uru rwego muri aka karere.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE