Advertisement
 
 
 
 
 
 
 
 

Amakuru | Mu Ntara | Intara

Rubavu: Barifuza gutura Perezida Kagame akababaro batewe n’isoko ryadindiye   

  Yanditswe na Iyaremye Yves
 March 2016

 
 

Abaturage bo mu karere ka Rubavu bavuga ko bamaze igihe kinini barabuze aho bahurira na Perezida Paul Kagame ngo bamuture akababaro batewe n’isoko ryabo ryadindiye bakaba bagikorera mu isoko rishaje aho ibyabo binyagirwa mu gihe cy’imvura bakabihomberamo.

Bamwe muri aba baturage bakimara kumva ko Perezida Kagame azaza mu karere kabo kubasura basazwe n’ibyishimo bemeza ko ari amahirwe yo kumutura imbona nkubone bimwe mu bibazo by’ingutu bibangamiye iterambere ryabo.

Bashimangira ko biteguye kumwakirana ubwuzu mu ruzinduko ateganya kuva ku ya 24 kugeza ku ya 26 Werurwe muri Gakenke na Rubavu.

JPEG - 51.4 kb
Isoko ryadindiye rya Rubavu

Aba baturage bavuga ko bifuza kumusobanurira ikibazo cy’isoko rya kijyambere rya Gisenyi ryubatswe ntirirangire, bakaba baribona ari ikirangarizwa kitagize icyo kibamariye.

Bitama Josiane ni umwe mu barucuzi bakorera mu isoko rishaje rya Gisenyi, yagize ati:”Twishimiye kuba tugiye gusurwa n’umubyeyi wacu, ikibazo cya mbere tuzamubaza ni ikijyanye n’isoko batubeshye ngo barimo kutwubakira rikaba rimaze imyaka ritaruzura,kandi tubayeho nabi cyane kuko iyo imvura igwa tudacuruza ibicuruzwa byacu hafi ya byose birangirika kubera kunyagirwa.”

Akomeza avuga ko abaturiye iryo soko ritabaha amahoro kuko batinya kuhanyura kubera ibisambo rimwe na rimwe biba byihishemo kandi harimo n’umwanda mwinshi.

Abacuruzi n’abaturage bagana isoko rya Gisenyi bemeza ko iryo bakoreramo barihuriramo n’ibibazo byinshi birimo kugurira ku giciro kiri hejuru bitewe no kuba ari rito abacuruzi baribyiganiramo no kuba abakoresha amashanyarazi bahorana ubwoba bw’inkongi z’umuriro.

Ni nyuma y’uko kuwa 08 Ukuboza 2013 hari igice cyaryo cyigeze gufatwa n’inkongi y’umuriro bitewe n’insinga zidafite ubushobozi.

Murenzi Janvier, umuyobozi w’akarere wungirije ushinzwe ubukungu, yabwiye Imvaho Nshya ko idindira ry’iryo soko rya kijyambere, ari kimwe mu bibazo bikomeye batarabasha gukemura uko bikwiye.

Ati:”Kuba iri soko ritari ryarangira ni igihombo gikomeye ku karere n’abaturage muri rusange kuko iyo bigenda neza ntitugire ibibazo by’amasoko yatangwaga nabi byari gukura benshi mu bukene kandi bikazamura ubucuruzi bwabo.”

Akarere katangiye kubaka isoko rya kijyambere rya Gisenyi mu mwaka wa 2010 ariko kaza kunanirwa kubera amikoro make.

Ni bwo ryashizwe ku isoko rigurwa n’ikigo cyitwa ABBA Ltd ngo gikomeze imirimo, gisinya amasezerano mu mwaka wa 2014.

Kuva icyo gihe hatangiye kugaragara ibibazo bishingiye ku kuba kugurisha iryo soko bitaranyuze mu mucyo bituma bamwe mu bayobozi bakuru barimo umunyamabanga nshingwabikorwa wariho Christophe Kalisa afungwa kuva muri werurwe 2015.

 

Comments

 
 
Guverineri Mureshyankwano yasabye urubyiruko kwirinda ibiyobyabwenge
Guverineri Mureshyankwano yasabye urubyiruko kwirinda ibiyobyabwenge

Ubwo hizihizwaga umunsi ngarukamwaka witiriwe Mutagatifu Yozefu, Guverineri w’Intara y’Amajyepfo Mureshyankwano Marie Rose yasabye abanyeshuri biga mu rwunge rw’amashuri rwitiriwe Mutagatifu Yozefu (...)

Gakenke-Muyongwe: Kubona ‘rezo’ ya telefone biracyari ingorabahizi
Gakenke-Muyongwe: Kubona ‘rezo’ ya telefone biracyari ingorabahizi

Abaturage bo mu murenge wa Muyongwe mu karere ka Gakenke, bavuga ko bababajwe no kuba burira imisozi bajya gushaka ihuzanzira (rezo) rya telefone ngendanwa, bagasaba ubuyobozi kubafasha gukemura (...)

Ngoma:Batewe impungenge n’igiciro cy’amakara cyazamutse cyane
Ngoma:Batewe impungenge n’igiciro cy’amakara cyazamutse cyane

Bamwe mu batuye umujyi wa Ngoma, mu ntara y’Uburasirazuba, baravuga ko bakomerewe n’ikibazo cy’ibura ry’amakara yo gutekesha, n’aho bayabona bakayabona ku giciro bavuga ko gihanitse bagereranyije (...)

Nyamasheke: Umugabo yatawe muri yombi azira kwigabiza ishyamba rya Leta
Nyamasheke: Umugabo yatawe muri yombi azira kwigabiza ishyamba rya Leta

Hategekimana Jean Pierre, w’imyaka 40, afungiwe kuri sitasiyo ya Ruharambuga mu karere ka Nyamasheke akurikiranweho kwigabiza ishyamba rya Leta riri mu mudugudu wa Kacyiru, mu kagari ka Ntendezi, (...)

Ngoma:Urubyiruko rushamikiye ku muryango FPR Inkotanyi rwaremeye imfubyi
Ngoma:Urubyiruko rushamikiye ku muryango FPR Inkotanyi rwaremeye imfubyi

Binyuze mu buryo bw’umuganda, urugaga rw’urubyiruko rushamikiye ku muryango FPR Inkotanyi mu Karere ka Ngoma rwasaniye inzu, runubakira ubwiherero ndetse n’akarima k’igikoni abana b’imfubyi babiri. (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.