2017-07-21 15:15:02 clouds 27o High | Kigali Rwanda

Dukurikire:
 
 

Rubavu: Amakusanyirizo y’ibirayi ahindagura ibiciro uko yishakiye yihanangirijwe

Yanditswe na IMVAHO NSHYA

Kuya 2017-07-03 15:37:32

 
Share on:
 
Yasuwe:33
 
Yavuzweho:200
 
10
 
10

Abahinzi b’ibirayi bo mu murenge wa Kanama mu karere ka Rubavu barashima Leta y’u Rwanda yashyizeho gahunda y’amakusanyirizo y’ibirayi kuko byatumye umusaruro wabo ugira agaciro ku isoko.

Aba bahinzi ariko muri iki gihe bavuga ko bahangayikishijwe na bamwe mu bacunga amakusanyirizo bishyiriraho ibiciro uko bishakiye, bigateza igihombo abahinzi.

Semajeri Epimaque, umwe mu bahinzi b’ibirayi, avuga ko kuba amakusanyirizo yaragiyeho hirya no hino aho bakorera byagabanyije akajagari ku isoko ry’umusaruro wabo, ndetse bituma kuri ubu batagihendwa nabo bitaga abamamyi nk’uko byari bimeze mu gihe cyo hambere aya makusanyirizo atarajyaho.

Mu kiganiro yagiranye n’Imvaho Nshya, yagize ati “Amakusanyirizo yadukuye kure cyane, ubu umusaruro uraboneka ukagurishwa neza kandi hari n’abakiliya bagomba kuwugura, noneho nta bwo tugikura ibirayi tutahawe gahunda n’ikusanyirizo kuko baduha gahunda, ariko tubangamiwe n’abasigaye bahinduranya ibiciro uko biboneye.”

JPEG - 290.9 kb
Amakusanyirizo yasubije agaciro umusaruro w’ibirayi

Iki kibazo cyadutse kikaba kinababangamiye, bamwe mu bayobora amakusanyirizo baca inyuma bakagurisha ibirayi ku giciro kiba kitemeranyijweho n’abahinzi mu gihe nyamara buri cyumweru bahurira hamwe bakagena igiciro bakanakemeranywaho.

Semajeri yakomeje agira ati “Ubundi buri cyumweru turahura n’abafite amakusanyirizo tukaganira, tukemeza igiciro kigurishirizwaho, ariko hari abaduca mu rihumye ugasanga bari kugurira ku giciro kitemejwe, bikaduhombya kandi hari ibyo tuba twishyiriyeho, turifuza ko aka kavuyo kagabanyuka.”

Uwiringiyimana Leonidas, uhagarariye ikusanyirizo rya Kamuhoza, avuga ko iryo hindagurika ry’ibiciro nabo bariterwa n’uko ngo ku isoko bagemuraho i Kigali igiciro kiba gihagaze nabo bigatuma bahindura, aho guhomba.

Yagize ati “Hari ubwo tuba tugomba kugurira wenda umuhinzi ku kilo amafaranga 130 noneho twagera i Kigali ugasanga ho byamanutse cyane icyo gihe natwe turaza tugakataho kubera igiciro natwe tuza kubigurishirizaho, nta bwo wakwemera gukorera mu gihombo ngo nuko mwemeranyije igiciro runaka, natwe si twe tubiterwa n’impinduka ku isoko.”

Tuyisenge Annonciata, umunyamabanga nshingwabikorwa w’umurenge wa Kanama, avuga ko iki kibazo batari bakizi, bakaba bagiye kugikurikirana, gusa ahamya ko abavuga ko iki kibazo giterwa n’ibura ry’isoko atari byo, kuko baba batabigaragaje mu nama, akemeza ko bagiye kubikurikirana basanga harimo ikibazo bakaba banakurikiza amategeko.

Yagize ati “Tugiye gukurikirana icyo kibazo ariko abahindaguranya ibiciro turababurira kuko hari amategeko n’amande bacibwa, iyo bigaragaye ko bafite ayo makosa, kandi nta bwo ari byiza kuko byaba ari ukwiba abaturage, niba bafite ikibazo bajya babivugira mu nama.”

Ku bashinzwe amakusanyirizo batubahiriza gahunda y’igiciro cyemeranyijwe, bacibwa amande yamafaranga ari hagati y’ibihumbi 200 na miliyoni imwe.

IYAREMYE YVES

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE