2017-07-21 15:15:02 clouds 27o High | Kigali Rwanda

Dukurikire:
 
 

Rubavu:Abarokotse Jenoside barishimira ko bubakiwe inzu zigezweho

Yanditswe na IMVAHO NSHYA

Kuya 2017-07-04 09:00:28

 
Share on:
 
Yasuwe:36
 
Yavuzweho:200
 
10
 
10

Bamwe mu barokotse Jenoside yakorewe abatutsi batuye mu murenge wa Rugerero mu karere ka Rubavu, barishimira ko inzu zabo zirimo gusanwa ku bufatanye bw’akarere n’ingabo z’igihugu.

Abaganiriye n’Imvaho Nshya bagaragaje ko bishimiye cyane kuba inzu zabo zirimo gusanwa ku buryo bugezweho, bagashimira cyane izi nzego zafatanyije mu kubakemurira iki kibazo cyo kubona aho baba heza bari bamaranye iminsi.

Aba barokotse Jenoside bavuga ko mbere bari babayeho nabi cyane, aho inzu bari bamazemo imyaka igera 13 zari zaratangiye kubasenyukiraho, zimwe zikaba zari zishaje ku buryo umuyaga wazaga ukazitwara, bagasigara mu birangarira.

JPEG - 367 kb
Imwe mu nzu zirimo kubakirwa abarokotse Jenoside mu karere ka Rubavu

Magingo aya izi nzu zabo zitameze neza zarashenywe zongera kubakwa bundi bushya, ubu zikaba zari gutunganywa neza ku buryo mu gihe gito abagenewe kuzituzwamo bazatangira kuzimukiramo.

Ayinkamiye Jeanne, umwe mu barokotse Jenoside wasaniwe inzu, yagize ati “Batwubakiye inzu nziza cyane natwe tubona ziduhesheje agaciro cyane kuko zijyanye n’igihe, tugiye kubaho kizungu rwose, mbere twari tubayeho nabi ariko abagira neza badutekerejeho babona dukwiye guhindura ubuzima natwe twijeje ko tuzazifata neza cyane ko zinakomeye.”

We n’abandi baturage bavuga ko aho zigeze zisanwa bafite icyizere ko bazazimukiramo mu bihe bidatinze, kandi ko ari inzu nziza batari barigeze barota ko bazabona.

Sinamenye Jeremie umuyobozi w’akarere ka Rubavu avuga ko izi nzu zubatse ku buryo imwe izajya iturwamo n’imiryango 2 kandi bisanzuye kuko ibikenewe byose bizaba birimo kandi zigezweho kuko zubatswe bijyanye n’igihe tugezemo.

Yagize ati “Ikibazo twashatse kugikemurira rimwe kuko inzu noneho bubakiwe ni zimwe ziramba zizamara igihe kinini nta kibazo na kimwe cyongeye kugaragara, ikindi nuko ikibazo cy’ubwiherero nacyo twagikemuye, kandi zubatse mu buryo bugezweho.”

Akomeza abasaba kwitegura kuzimukiramo kandi bakazazifata neza ntizizasaze vuba, ndetse akanizeza abagifite inzu zimeze nabi ko bazakomeza nabo kubazirikana uko ubushobozi n’imbaraga bizagenda byiyongera.

IYAREMYE YVES

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE