2017-08-24 09:26:29 clouds 27o High | Kigali Rwanda

Dukurikire:
 
 

Rubavu: Abanyeshuri bakubita abarimu bakanabambika ubusa

Yanditswe na IMVAHO NSHYA

Kuya 2016-10-20 11:40:45

 
Share on:
 
Yasuwe:54
 
Yavuzweho:200
 
10
 
10

Abarimu bo ku rwunge rw’amashuri rwa Shwemu, ruherereye mu murenge wa Rugerero mu karere ka Rubavu, baratabaza bitewe n’urugomo bakorerwa na bamwe mu banyeshuri bakekwaho kunywa ibiyobyabwenge.

Umwe muri bo witwa Musafili Gustave, yabwiye Imvaho Nshya ko abo banyeshuri baherutse kumwicaza hasi bakamuvanamo inkweto aje kubigisha.

Yagize ati “Abana turera nta kinyabupfura bagira, baradutuka uko bashaka, ntawe duhana ngo bishoboke ninjiye mwishuri ngize ngo mbavugishe bakerewe, baramfata banyicaza hasi bamvanamo inkweto ntabarwa na bagenzi banjye kandi biduteye impungenge.”

Aba banyeshuri ngo ntibatinya kwadukira abarimu b’igitsina gore bakabakubita ndetse bagashaka no kubahohotera.

Si abarimu gusa bahohoterwa n’abanyeshuri kuko ubwo umunyamakuru w’Imvaho Nshya yageraga kuri iki kigo yasanze n’umuzamu witwa Nshimiyimana Eric abana bane bamaze kumukubita, harimo abamukebeshaga inzembe, bakamutera inshinge banamushyira urusenda mu maso.

Ati “Bakerewe ishuri batangira gusimbuka igipangu njya kubarega basubirayo kuzana inzembe n’ibindi bantsinda hasi, iyo ntatabarwa bari no kunyica, mfite impungenge ko bafite umugambi mubi cyane.”

JPEG - 64.8 kb
Umuzamu Nshimiyimana avuga ko yakubiswe bikomeye n’abanyeshuri

Umuyobozi w’iki kigo, Munyentabwa Leonard, avuga ko imyitwarire mibi y’abo banyeshuri yazanywe n’abana bari barataye ishuri, ubuyobozi bukabagarura baramaze kuba bakuru.

Asobanura ko benshi muri bo banywa urumogi n’ibindi biyobyabwenge, ariko kuko babikorera hanze y’ikigo ntibigire gikurikirana.

Yagize ati “Abakubise uyu muzamu twabafashe barimo Niyonsenga Joseph, Imananiyikiza Samuelna Nsengimana, ubu turavugana n’itsinda rishinzwe ikinyabupfura kandi barahanwa by’intangarugero, kuko si ubwambere babikora banahohoteye abarimu”

Urwunge rw’amashuri rwa Shwemu rurimo ishuri ribanza n’iryisumbuye , abanyeshuri bahiga ni 2480.

Bamwe mu babyeyi bahafite abana baganiriye n’Imvaho Nshya bahamya ko imyitwarire mibi iranga abana babo ikomoka ku kuba ikigo kidafite ingamba zo gucunga ikinyabupfura zikarishye.

Ibi ariko diregiteri Munyentabwa abitera utwatsi akavuga ko iyo mico bayikomora iwabo aho baba baturutse, ahubwo agasaba ababyeyi gushyira igitsure ku bana babo, ndetse banahanwa ku ishuri ntibihutire kuza kubaregura, ahubwo bakabanza bakamenya impamvu bahanwe.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE