2017-08-19 07:41:08 clouds 27o High | Kigali Rwanda

Dukurikire:
 
 

Rubavu :Abajyana abana mu kabari n’ababasambanya bahagurukiwe

Yanditswe na IMVAHO NSHYA

Kuya 2017-06-01 10:35:18

 
Share on:
 
Yasuwe:132
 
Yavuzweho:200
 
10
 
10

Ubuyobozi bwa Polisi y’igihugu ku rwego rw’intara y’Uburengerazuba, butangaza ko bugiye gukorera hamwe n’abikorera mu kurwanya ikibazo cy’abana basambanywa n’abantu bakuru, ndetse n’abasohokana abana mu tubari bakabaha inzoga cyangwa ibiyobyabwenge bagasinda.

Umuvugizi wa Polisi y’igihugu mu ntara y’Uburengerazuba CIP Théobard Kanamugire, yatangaje ko mu bugenzuzi baheruka gukora, basanze iki kibazo kigihari. Yagize ati «Abana b’abakobwa bari munsi y’imyaka 18 mu karere ka Rubavu baracyasambanywa n’abagabo, kandi abenshi babasambanya iyo basinze. »

Uyu muvugizi wa Polisi yakomeje agaragaza ko usibye n’abagisambanya abana bato, mu bibazo biteye inkeke harimo n’icy’abana b’abakobwa n’abahungu usanga basohokana n’abantu bakuru mu tubari, bakanywa inzoga n’ibindi biyobyabwenge bitandukanye ugasanga basinze, kandi ubusanzwe abana bari munsi y’imyaka 18 batabyemerewe.

Yagize ati «Mu mukwabu twakoze umunsi umwe gusa twabashije gufata abana 37 bari mu myitwarire nk’iyo.»

JPEG - 395.9 kb
Muri uyu mujyi wa Rubavu ni hamwe mu hagaragara abantu bakuru basohokana abana mu tubari

Ibyaha nk’ibi ni byo byatumye Polisi y’igihugu igirana inama n’abikorera, ahanini bakora muri serivise z’utubari, amahoteli n’amacumbi, kugira ngo bafatire hamwe ingamba zo gukumira ibi byaha, akenshi usanga binagira ingaruka mbi ku muryango nyarwanda.

Bazimaziki Pierre Damien, umuyobozi w’urugaga rw’abikorera mu karere ka Rubavu, yabwiye Imvaho Nshya ko amabwiriza bahawe ari uko nta mwana utarageza imyaka 18 ugomba kwemererwa kujya mu kabari cyangwa amacumbi atari kumwe n’umubyeyi we cyangwa undi bigararagara ko amurera.

Aba bikorera kandi bijeje Polisi ko bagiye gukora uko bashoboye kose bakubahiriza amabwiriza bahawe, kuko nabo ngo batishimira kubona abana babo bararurwa n’abantu bakuru.

Yagize ati «Mu by’ukuri tugiye gufata ingamba, akabari cyangwa ‘lodge’ ndetse na Hoteli bizagaragaramo, nyirayo azafatirwa ibihano.»

Izi nzego zombi zaniyemeje gukorera hamwe mu kurwanya no gukumira uburaya, ubusinzi, ibiyobyabwenge, kuko ngo ari byo biri ku isonga mu bikurura urubyiruko rukiri ruto mu busambanyi.
MAGARAMBE THEODORE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE