Advertisement
 
 
 
 
 
 
 
 

Amakuru | Mu Ntara | Intara

Polisi yerekanye abantu 88 bakekwaho kwiba inka   

  Yanditswe na RNP
 2 months ago

 
 

Mu rwego rwo kugaragariza abatuye mu Ntara y’Iburasirazuba ibimaze kugerwaho mu kurwanya ubujura bw’inka, ejo tariki 21 Nzeri abaturage bo muri iyi Ntara ndetse n’Itangazamakuru beretswe abantu 88 bakekwaho kwiba inka mu bice bitandukanye byayo, cyane cyane mu turere twa Nyagatare, Gatsibo na Kayonza.

Icyo gikorwa cyabereye mu kagari ka Simbwa, ho mu murenge wa Kabarore, mu karere ka Gatsibo, kikaba cyaritabiriwe n’abaturage bagera ku 3000 bo muri uyu murenge wa Kabarore ndetse n’abo mu wa Karangazi, ho mu karere ka Nyagatare.

Abo 88 bafatiwe mu mikwabu yakozwe mu bihe bitandukanye muri iyi Ntara mu kwezi gushize ku bufatanye bwa Polisi y’u Rwanda n’izindi nzego zirimo igisirikare n’inzego z’ibanze.



Icyo gikorwa cyo kuberekana cyitabiriwe na Minisitiri w’ubutegetsi bw’igihugu, Francis Kaboneka, Umuyobozi Mukuru wa Polisi y’u Rwanda, IGP Emmanuel K. Gasana n’Umushinjacyaha Mukuru w’igihugu, Richard Muhumuza.

Mu butumwa yagejeje kuri abo baturage, Minisitiri Kaboneka yababwiye ati:"Umuntu wese ushaka guhungabanya umutekano na gahunda z’iterambere ry’igihugu ntazihanganirwa. Ni muri urwo rwego inzego zose zifatanya kurwanya ubujura bw’amatungo ndetse n’ibindi byose bishobora kubangamira ituze n’iterambere rya rubanda."

Minisitiri Kaboneka yakomeje ababwira ati:"Perezida wa Repubulika, Paul Kagame ashaka ko mukira. Abanga ibirama tubarwanye dukoresheje ukuri, kandi tuzabatsinda nta gushidikanya."

IGP Gasana yabwiye abo baturage ati:"Hashize ukwezi tubasezeranyije ko tugiye kurwanya twivuye inyuma ubujura bw’amatungo muri iyi Ntara.Uyu munsi rero twaje kubagaragariza ibyo tumaze kugeraho; tubereka abo tumaze gufata bakekwaho icyo cyaha."

Yakomeje agira ati:"Dosiye z’aba 88 zizashyikirizwa ubushinjacyaha mu minsi ya vuba, kandi igikorwa cyo kurwanya ubujura bw’amatungo no gufata ababikekwaho kirakomeje, ndetse cyashyizwemo imbaraga nyinshi kugeza mutubwiye ko nta nka icyibwa muri iyi Ntara."

IGP Gasana yashimye abo baturage; ababwira ko ifatwa ry’abo 88 ryatewe n’amakuru bahaye Polisi n’izindi nzego, maze akomeza ababwira ati:" Tugire umutekano , buri wese abe ijisho rya mugenzi we, dukumira icyaha kitaraba, dutanga amakuru ku gihe, kandi vuba."

Yababwiye ko igihugu gifite umutekano usesuye, ariko abasaba kugira uruhare mu kuwusigasira batanga amakuru yatuma hakumirwa ikintu cyose kinyuranije n’amategeko.

Mu ijambo rye, Muhumuza yababwiye ko ibyaha byose bizajya noneho bijya mu Nkiko aho kujya mu Bunzi nk’uko byahoze.

Yagize ati:"Nta bwinyagamburiro abajura b’amatungo ndetse n’abandi banyabyaha bafite kuko ukekwaho icyaha wese azajya noneho ashyikirizwa ubushinjacyaha."

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Karongi:Abatuye i Mutuntu bategereje bisi bijejwe amaso ahera mu kirere
Karongi:Abatuye i Mutuntu bategereje bisi bijejwe amaso ahera mu kirere

Bamwe mu baturage bo mu murenge wa Mutuntu mu karere ka Karongi, barasaba ubuyobozi bwabo kubafasha kubona imodoka ziborohereza mu ngendo, by’umwihariko bisi bemerewe na n’ubu bagitegereje. Aba (...)

Bafungiye kunyereza miliyoni 58 za koperative y’abajyanama b’ubuzima
Bafungiye kunyereza miliyoni 58 za koperative y’abajyanama b’ubuzima

Abantu batandatu bafungiye kunyereza amafaranga arenga miliyoni 58 ya koperative y’abajyanama b’ubuzima bo mu murenge wa Bweyeye mu karere ka Rusizi. Abafunze barimo umuyobozi n’umucungamutungo (...)

Rusizi: Yatemberejwe umujyi wose ahetse ihene yibye
Rusizi: Yatemberejwe umujyi wose ahetse ihene yibye

Bamwe mu baturage b’umurenge wa Bugarama, mu karere ka Rusizi, baravuga ko bakomeje kubabazwa no kubyuka bagasanga amatungo yabo cyane cyane ihene n’ingurube zibwe, ndetse zimwe zigateshwa abajura (...)

Ngoma:Ntibiyumvisha uburyo bahendwa n’amashanyarazi ‘utanacomekaho radiyo ngo ivuge’
Ngoma:Ntibiyumvisha uburyo bahendwa n’amashanyarazi ‘utanacomekaho radiyo ngo ivuge’

Abaturage bo mu kagari ka Karenge, umurenge Jarama bavuga ko umuriro w’amashanyarazi bahawe ntacyo ubamariye uretse kubahombya, kuko ngo bawutangaho ikiguzi cy’amafaranga menshi kandi nta musaruro (...)

Rubavu: Abaturage bashinja abunzi bita ’abanyenzara’ kwaka ruswa
Rubavu: Abaturage bashinja abunzi bita ’abanyenzara’ kwaka ruswa

Bamwe mu baturage bo mu mirenge itandukanye mu karere ka Rubavu, baratunga urutoki abunzi kurangwa na ruswa mu mikirize y’imanza, bakifuza iki kibazo cyashakirwa umuti. Aba baturage banuganuga (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.