2017-06-28 08:00:46 clouds 27o High | Kigali Rwanda

Dukurikire:
 
 

Nyaruguru:Abahinzi b’icyayi bifuza ko igiciro bagurirwaho umusaruro wabo cyongerwa

Yanditswe na IMVAHO NSHYA

Kuya 2017-06-04 08:36:25

 
Share on:
 
Yasuwe:65
 
Yavuzweho:200
 
10
 
10

Abahinzi b’icyayi mu karere ka Nyaruguru barishimira ko icyayi bahinga kibafasha kwiteza imbere, bagasaba ko igiciro bagurirwaho cyazamurwa, kugira ngo imbaraga bakoresha bagihinga zijyanishwe n’inyungu bagikuramo.

Bamwe muri aba bahinzi b’icyayi bo mu karere ka Nyaruguru, bagaragarije Imvaho Nshya ko icyayi ari igihingwa cy’umwihariko kuri bo, kuko cyera cyane iwabo kandi kikabinjiriza amafaranga mu buryo buhoraho.

Bavuga ko n’ubwo igiciro bagurirwaho kikiri hasi ugereranyije n’imbaraga ubuhinzi bwacyo busaba, ariko badashobora kwirengagiza iterambere rigaragarira buri wese bamaze kwigezaho, dore ko ngo nta cyo bifuza ngo bananirwe kucyigurira babikesha icyayi.

Umwe muri aba bahinzi witwa Hakizimana, yagize ati "Maze imyaka irenga 20 mpinga icyayi, cyaramfashije cyane noneho Leta nayo igiha agaciro, ubu niyubakiye inzu nyikuye mu buhinzi bw’icyayi kandi nemeza ko umuntu wese uhinga icyayi ubuzima bwe bwahindutse mu kwiteza imbere, nta cyo wabura uhinga icyayi, umwana ntiyabura amafaranga y’ishuri.”

JPEG - 335 kb
Ubuhinzi bw’icyayi bufatiye runini abaturage bo muri Nyaruguru

Ku rundi ruhande ariko uyu muhinzi kimwe na bagenzi be bifuza ko igiciro bagurirwaho umusaruro wabo cyazamurwa, kugira ngo iterambere ryabo rirusheho kuzamuka.

Uwitwa Murasira yagize ati "Guhinga icyayi biratuvuna cyane, uretse n’imbaraga nyinshi bisaba, kigira n’akazi kenshi, ku buryo usanga igiciro baduha ku kilo twifuza ko cyakwiyongera kugira ngo tubone inyungu igaragara.”

Ikibazo cy’igiciro ku kilo cy’icyayi abaturage bavuga ko kiri hasi, umuyobozi w’akarere ka Nyaruguru Habitegeko Francois, we agaragaza ko cyakemutse, kuko ubu abahinzi basigaye bagurirwa hagendewe ku giciro kiri ku isoko mpuzamahanga, ari naho iki cyayi gikurishwa.

Yagize ati "Natekerezaga ko icyo kibazo cyarangiye, mu minsi yashize hari umwanzuro wafashwe uvuga ko igiciro bahabwa ku bibabi kijyana n’isoko mpuzamahanga, bivuze ngo uruganda bagemurira uko rwagurishije ku isoko ni nako igiciro cyabo kizamuka.

Iyo uruganda rwagurishije neza nabo bishyurwa neza, iyo ku isoko mpuzamahanga byamanutse, nabo ikiguzi cyabo kiragabanuka, habaye rero hari inganda zitubahiriza ayo mategeko twakurikirana tukareba.”

Nk’uko Meya Habitegeko abisobanura, ngo icyayi ni kimwe mu bifite uruhare rukomeye mu iterambere ry’akarere ka Nyaruguru ndetse n’abaturage muri rusange, kuko umubare munini w’abaturage ubona akazi mu gusoroma icyayi ndetse n’inganda z’icyayi ziri muri aka karere zikaba zishobora gutanga akazi ku baturage basaga ibihumbi 3 bakora ku buryo buhoraho.

Akarere ka Nyaruguru gahingwamo icyayi kuri hegitari zisaga ibihumbi 5, ndetse bikaba biteganijwe ko icyayi kigomba guhingwa kuri hegitari ibihumbi 8 mu minsi iri imbere.

UMUTONI BEATHA

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE