2017-10-16 07:05:01 clouds 27o High | Kigali Rwanda

Dukurikire:
 
 

Nyanza: Abasaga 420 barimo abanyamahanga bahawe impamyabumenyi mu by’amategeko

Yanditswe na IMVAHO NSHYA

Kuya 2017-06-09 09:15:10

 
Share on:
 
Yasuwe:85
 
Yavuzweho:200
 
10
 
10

Ishuri rikuru rishinzwe kwigisha no guteza imbere amategeko(ILPD), ryatanze impamyabumenyi ku nshuro ya gatandatu, ku wa Kane ku wa 8 Kamena 2017, muri 428 barangije, 118 ni abanyamahanga bo mu bihugu byo mu karere.

Mu muhango wo gutanga izo mpamyabumenyi wabereye i Nyanza ku cyicaro cy’iryo shuri, Minisitiri w’Ubutabera Johnston Busingye, yavuze ko ILPD yavutse ubwo u Rwanda rwashakaga kuvugurura urwego rw’ubutabera.

Ati “Iri shuri ryashinzwe ubwo twashakaga kuvugurura urwego rw’ubutabera mu 2004 tukavumbura ko hakenewe ikigo kizigisha mu magambo no mu ngiro.”

JPEG - 183 kb
Minisitiri w’Ubutabera, n’abanyeshuri barangije muri ILPD bafata ifoto y’urwibutso

Yongeyeho ko abarangije muri iryo shuri bagaragaje umusaruro ku isoko ry’umurimo, benshi kuri ubu bakaba bafite imyanya ikomeye mu rwego rw’ubucamanza, abandi bakaba ari abanyamategeko, bafite uruhare runini mu guca akarengane mu Rwanda no mu bihugu by’akarere.

Minisitiri Busingye yongeyeho ko ishuri rya ILPD ryabaye ubukombe mu karere ku buryo kuri ubu ryakira abanyeshuri baturutse mu bihugu bisaga 10 byo ku mugabane wa Afurika.

Ati “ILPD yagiye yakira abanyeshuri baturutse mu bihugu bisaga 10 bya Afurika birimo Gambia, Cameroon, Malawi, Zambia, Sudani y’Epfo, Kenya, Uganda, u Burundi na Sudani, bose baje kwimara inyota y’ubumenyi mu bijyanye n’amategeko rusange n’ayagisivili.”

Yasabye abarangije muri ILPD guhuza ibyo bize n’ubuzima busanzwe bakaba impirimbanyi z’ubutabera, ubunyamangamugayo, ubwigenge no guca akarengane aho bari hose.

Umuyobozi w’agateganyo wa ILPD, Aimable Havugiyaremye, yashimiye urwego rw’ubutabera mu Rwanda, rwafashije icyo kigo kwiteza imbere, ndetse asaba abakirangijemo kwimika ubutabera mu bihugu byabo bagamije ko Isi iba nziza kurushaho.

ILPD ni ishuri rikuru ryafunguwe ku mugaragaro na Perezida Paul Kagame muri 2008. Ifite intego yo guhugura abakozi b’urwego rw’ubutabera bagahabwa ubumenyi buhagije kugira ngo bakore akazi kabo neza.

Abanyeshuri bayigamo ni abakora ibijyanye n’ubutabera bafite impamyabumenyi y’icyiciro cya kabiri cya kaminuza. ILPD ifite intego yo kuba ihuriro ry’impuguke mu by’amategeko mu karere ka Afurika y’Uburasirazuba.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE