Advertisement
 
 
 
 
 
 
 
 

Amakuru | Mu Ntara | Intara

Nyamasheke:Umuvuzi gakondo afungiwe kwica umwana yavuraga amashitani   

  Yanditswe na BAHUWIYONGERA SYLVESTRE
 5 months ago

 
 

Sebakungu Damascène w’imyaka 62, umuvuzi gakondo wo mu mudugudu wa Mwiyando, akagari ka Gashashi, mu murenge wa Karengera, mu karere ka Nyamasheke, ari gukurikiranwa n’ubutabera, aho akurikiranweho urupfu rw’umwana waguye iwe amuvura.

Uyu mwana witwa Habimpano Samuel w’imyaka 15, yigaga mu mwaka wa mbere w’amashuri yisumbuye, mu rwunge rw’amashuri rwa Karengera muri aka karere.

Nk’uko Imvaho Nshya yabitangarijwe na Gitifu w’aka kagari Nibaseke Eugène, ngo uyu mwana usanzwe ari uwo mu kagari ka Higiro muri uyu murenge, yafashwe n’uburwayi bw’amayobera ubwo yari iwabo ku irembo, afatwa avugishwa, hashize akanya ngo atangira kwiruka avuga amagambo menshi aterekeranye, ahita ajyanwa ku kigo nderabuzima cya Mwezi aho yagejewe ku wa 27 Kanama.

Ngo yagezeyo arembye cyane abaturage bakavuga ko arwaye amashitani cyangwa abadayimoni, abaforomo bo kuri iki kigo nderabuzima bahise basaba ababyeyi be kumwihutana bakamugeza vuba ku bitaro bya Bushenge.

Ababyeyi b’uyu mwana aho kumujyanayo ngo bamusubije iwabo mudugudu wa Rukunguri muri aka kagari ka Higiro, bavuga ko ibitaro bidashobora kuvura amashitani, ari uwo kujyanwa mu Kinyarwanda, mu bavuzi gakondo cyangwa mu masengesho, ngo kwirirwa bamujyana mu bitaro ari uguta igihe.

Gitifu yagize ati “Ikibabaje ni uko Turinabo Daniel se w’uyu mwana aho kumwihutana ku bitaro bya Bushenge nk’uko yari abibwiwe n’abaganga yamusubiranye iwe akamumarana iminsi 5 yose, akaba atanavuga umuti yamuhaga muri iyo minsi yose cyangwa ubuzima umwana yari abayemo.

JPEG - 248.2 kb
Abasaza bo muri uyu murenge bavuga ko nubwo zadutse indwara z’amayobera, abantu bakwiye gukurikiza inama z’abaganga

Gusa ngo yabonye arembye, ku cyumweru gishize amujyana kuri uyu muvuzi gakondo na we ngo avuga ko ashoboye kumuvura .

Mu rukerera rwo ku wa mbere umwana ahita yitaba Imana, bitangira kutavugwaho rumwe n’abaturage.”

Bamwe mu baturage bo muri uyu mudugudu baganiriye n’Imvaho Nshya, bavuga ko uyu musaza ngo usanzwe afite ibyangombwa byemewe na MINISANTE ko ari umuvuzi gakondo ngo ashobora kuba yarahaye imiti myinshi uyu mwana ikaba ari yo imuhitana, cyane cyane ko ngo n’urugero bayipimiraho bamwe mu baturage bajijutse basa n’abarukemanga.

Abandi baturage bakeka ko yaba yaramuvuraga indwara itari yo kuko ngo icyo umwana arwaye cyari kugaragarira neza mu bitaro bya Bushenge nk’uko ikigo nderabuzima cyari cyabitegetse, ababyeyi b’umwana bo ngo ntibavuga impamvu batamujyanye mu bitaro bakamujyana hariya.

Mbere y’ishyingurwa ry’umwana, umurambo we wabanje kujya gukorerwa isuzuma mu bitaro bya Bushenge, uyu musaza atabwa muri yombi, akaba ari mu maboko ya Polisi kuri sitasiyo ya Ntendezi mu gihe iperereza rikomeje.

 

Comments

 
 
Kirehe: Abafashwa na FARG Bifuza kugabanyirizwa amafaranga bashoraga mu mushinga
Kirehe: Abafashwa na FARG Bifuza kugabanyirizwa amafaranga bashoraga mu mushinga

Abarokotse Jenoside yakorewe Abatutsi bagera kuri 49, bo mu kagari ka Nyabitare, umurenge wa Nyarubuye bagenerwa inkunga binyujijwe mu kigega gifasha abarokotse Jenoside yakorewe Abatutsi mu 1994 (...)

Rubavu: Abatuye mu mbago z’ikibuga cy’indege cya Gisenyi basonewe imisoro
Rubavu: Abatuye mu mbago z’ikibuga cy’indege cya Gisenyi basonewe imisoro

Inama Njyanama y’akarere ka Rubavu yafashe umwanzuro wo gusonera imisoro abaturage baturiye ikibuga cy’indege cya Gisenyi, nyuma y’imyaka irenga 8 barahagaritswe kugira ibikorwa by’iterambere (...)

Amajyaruguru: Hari kwigwa itegeko rihana abakora uburobyi mu buryo butemewe
Amajyaruguru: Hari kwigwa itegeko rihana abakora uburobyi mu buryo butemewe

Minisiteri y’Ubuhinzi n’Ubworozi iratangaza ko hari kwigwa itegeko rihana ba rushimusi mu biyaga byo mu Rwanda kuko batuma umusaruro w’amafi utiyongera bigatera igihombo abakora ubu bworozi. Intara (...)

Rubavu: Abamaze imyaka itatu batagira amazi bagiye gusubizwa
Rubavu: Abamaze imyaka itatu batagira amazi bagiye gusubizwa

Akarere ka Rubavu karahumuriza abaturage bamaze imyaka igera kuri 3 batagira amazi mu ngo zabo bakavuga ko bamaze gukora amasezerano n’ikigo cy’igihugu cy’amazi, isuku n’isukura, WASAC, ku buryo (...)

Bamwe mu bacururiza ku mupaka wa Rusizi I bahawe amezi 2 yo kuba bimutse
Bamwe mu bacururiza ku mupaka wa Rusizi I bahawe amezi 2 yo kuba bimutse

Ubuyobozi bw’akarere ka Rusizi burasaba abagize urugaga rw’abikorera muri aka karere n’abacuruzi bakorera ku mupaka wa Rusizi ya mbere, kwicara hamwe bitarenze amezi 2 bakareba bimwe mu bicuruzwa (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.