Advertisement
 
 
 
 
 
 
 
 

Amakuru | Mu Ntara | Intara

Nyamasheke: Nyuma y’imyaka 5, basuwe n’umuyobozi wo ku rwego rw’akarere   

  Yanditswe na BAHUWIYONGERA SYLVESTRE
 May 2016

 
 

Abaturage b’akagari ka Nyakavumu, mu murenge wa Mahembe, mu karere ka Nyamasheke, baravuga ko bari bamaze imyaka igera kuri 5 nta muyobozi wo ku rwego rw’Akarere ubageraho ngo abasure baganire ku iterambere ry’akagari kabo.

Uku kudasurwa n’abayobozi ngo byarabadindije cyane, kuko hari ibibazo bakeka ko baba barakemuriwe n’ubu buyobozi, n’ubu byabaye agatereranzamba.

Ubwo basurwaga n’umuyobozi wungirije ushinzwe iterambere ry’ubukungu mu karere Ntaganira Josué Michel, umurongo w’ibibazo wari wabaye muremure cyane, buri muturage ashaka kugaragaza akababaro ke.

JPEG - 317.6 kb
Abaturage babajije ibibazo bamaranye igihe kirekire (Foto Bahuwiyongera S)

Aba baturage bavuga ko nko kuba batagira umuriro w’amashanyarazi kandi hirya no hino bawuhabona, kuba bakigoswe n’ubukene bukabije, imihanda mibi n’ibindi, biterwa no kutabiganiraho n’ubuyobozi bagasanga aba bayobozi bakwiye kumanuka, bakabaha umwanya bakaganira kuri gahunda zigamije kuzamura akagari kabo.

Mugemena Isaac, umwe mu batuye aka kagari, yagize ati:“Mwabonye ko twafashe umwanya muremure wo kubyinira uyu muyobozi wabashije kudusura, tumushimira ko nibura yatugezeho mu gihe nta wundi muyobozi ku rwego rw’Akarere ugera ino kandi turi mu baturage bashinzwe kuyobora.”

Uyu muturage yakomeje agira ati:“Kudasurwa n’abayobozi b’Akarere bidusubiza inyuma cyane mu iterambere, kubera ko buriya nk’uku uyu muyobozi aba yadusuye tubashije kumugezaho ibibazo byacu kandi bimwe bikaba bikemutse, ariko iyo bataje ibibazo bikomeza gupfukiranwa mu midugudu n’utugari.

Kuba umurongo w’ibibazo ugera hariya ni uko tutigeze tugira umuyobozi wo ku rundi rwego tubigezaho ngo bikemuke kare, uw’umurenge akaba ari we ugerageza kutugeraho na bwo rimwe na rimwe,tugasaba ko abayobozi batagombye gutegereza imyaka ingana gutya ngo babone kwegera abaturage bayoboye.”

Umunyamabanga Nshingwabikorwa w’uyu murenge Munyankindi Eloi, avuga ko uyu murenge abayobozi bawusura, ariko kariya kagari kakaba koko kari kamaze igihe nta muyobozi wo kuri ruriya rwego ugakandagiramo.

Umuyobozi w’aka karere wungirije ushinzwe iterambere ry’ubukungu Ntaganira Josué Michel, yagaragaje ko koko aba baturage bamaze igihe batabona abayobozi ku rwego rw’akarere, gusa akemeza ko muri iyi manda, kwegera abaturage biri mu byo bashyize imbere.

Yagize ati:“Birashoboka ko koko urebye umurongo w’ababaza ibibazo wari uhari, abayobozi bari bamaze igihe batahagera, ariko icyo twiyemeje muri iyi manda ni ukumanuka tukava mu biro no mu bitabo tukegera abaturage mu tugari twabo.

Duhereye kuri turiya duce tudakunze kugerwamo n’abayobozi, tuzajya tuganira ku iterambere ry’Akarere kacu, kuko tutabegereye tutamenya ibibazo n’ibyifuzo byabo ngo tunamenya uburyo bwo kubikemura.”

 

Comments

 
 
Rusizi:Ikibazo cy’imbwa zizerera zikarya abaturage cyahagurukiwe
Rusizi:Ikibazo cy’imbwa zizerera zikarya abaturage cyahagurukiwe

Ikibazo cy’imbwa zizerera zirya abantu mu karere ka Rusizi ngo ntigihangayikishije abaturage gusa, ahubwo gihangayikishije n’ubuyobozi, bukaba busaba abaturage kuba bihanganye igihe cy’imvura (...)

Karongi:Depite Musabyimana yasabye abaturage gukomera kuri ‘Ndi Umunyarwanda
Karongi:Depite Musabyimana yasabye abaturage gukomera kuri ‘Ndi Umunyarwanda

Depite Samuel Musabyimana, yasabye abaturage bo mu karere ka Karongi gukomeza gushyigikira gahunda y’ubumwe n’ubwiyunge, kuko ari byo bizatuma igihugu gikomeza kwihuta mu iterambere, kikaba (...)

Rubavu:Abifuza kuva mu manegeka batuyemo bemerewe amabati
Rubavu:Abifuza kuva mu manegeka batuyemo bemerewe amabati

Ubuyobozi bw’akarere ka Rubavu bwemereye amabati abaturage batishoboye bagera ku 120, bashaka kuva mu manegeka, mu rwego rwo kubafasha gutura mu mudugudu. Ubuyobozi bw’aka karere buvuga ko (...)

Musanze: Umukobwa w’imyaka 20 yihangiye umurimo umwinjiriza 250,000 ku kwezi
Musanze: Umukobwa w’imyaka 20 yihangiye umurimo umwinjiriza 250,000 ku kwezi

Umuhire Catherine, ni umukobwa w’imyaka 20 utuye mu murenge wa Muhoza, mu karere ka Musanze, uvuga ko mu gihe cy’imyaka 2 amaze akora umwuga wo gucura ibyuma bikoreshwa muri feri z’imodoka, ubu (...)

Karongi:Abatuye i Kabuga batewe impungenge n’abajura bahayogoje
Karongi:Abatuye i Kabuga batewe impungenge n’abajura bahayogoje

Abaturage bo mu kagari ka Kabuga mu murenge wa Rugabano mu karere ka Karongi, batewe impungenge n’ubujura bwibasiye ibyuma bitanga ingufu z’amashanyarazi aturuka ku mirasire y’izuba, ibiribwa biri (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.