2017-06-24 12:54:56 clouds 27o High | Kigali Rwanda

Dukurikire:
 
 

Nyamasheke:Mudugudu wagurishije inka ya Girinka yayiryojwe mu ruhame

Yanditswe na IMVAHO NSHYA

Kuya 2016-06-05 10:53:52

 
Share on:
 
Yasuwe:2
 
Yavuzweho:200
 
10
 
10

Nsanganira Vianney, umukuru w’umudugudu wa Nkamba, akagari ka Banda, mu murenge wa Rangiro, mu karere ka Nyamasheke, aravugwaho amanyanga muri gahunda ya Girinka, inzego zimukuriye zemeza ko adashobora kwihanganirwa.

Uyu muyobozi ngo yafashe inka ikomoka ku yo umuturage yari yahawe muri Girinka, ayigurisha rwihishwa, aya manyanga akaba yatahuwe ubwo abadepite basuraga aka kagari.

Sinayobye Samson, yabwiye Depite Kabasinga Chantal na Niyonsenga Théodomir ko yahawe inka muri Girinka, ikabyara ikimasa, yakiragiza ngo gikure uyu mukuru w’umudugudu akakigurishwa rwihishwa.

Yagize ati:“None ko inka yamaze kuyigurisha kandi nkamenya ko bamuhaye amafaranga 140 000 nubwo we avuga ko yahawe amafaranga 120 000, ubwo sinzafatwa nk’utarituye?”

JPEG - 385.7 kb
Mudugudu yategetswe kugarura inka yagurishije (Foto archive)

Uyu mukuru w’umudugudu yagerageje kwisobanura imbere y’abadepite, ariko ibisobanuro bye ntibyabanyura na gato, bamutegekera mu ruhame ko ayisubiza byihutirwa, iby’amafaranga akazabivuganaho n’uwo bayiguze, kandi akagawa kuko yakoze ibidakwiye umuyobozi.

Umuyobozi w’akagari ka Banda Nzabonimpa, yagize ati:“Ibi ashobora kuba yarabikoze abigambanyemo n’uragiye kiriya kimasa, ariko twe ntidushobora kwihanganira umuyobozi nk’uyu.

Komite ya Girinka igiye guterana n’ubuyobozi tumugaye ku mugaragaro, afatirwe n’ibindi bihano birimo no gukurwa kuri uwo mwanya, kandi umugore we wari ku rutonde rw’abazahabwa inka arahita akurwa ku rutonde.

Inyana izagurwa ikazahabwa undi kugira ngo bibere isomo n’undi wese waba agitekereza gukora ku byo Leta igenera abatishoboye.”

Umunyamabanga Nshingwabikorwa w’uyu murenge Gatanazi Emmanuel, yatangarije Imvaho Nshya ko iki kimasa cyahise kigaruzwa, uwari wakiguze akaba agomba gukurikirana amafaranga ye kwa mudugudu.

Guverineri w’Intara y’Uburengerazuba Mukandasira Caritas, we yagize ati:“Iki kibazo cyagaragaye henshi muri iyi ntara muri iyi minsi, ariko abayobozi nk’aba bagomba byanze bikunze kubiryozwa.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE