2017-06-28 08:00:46 clouds 27o High | Kigali Rwanda

Dukurikire:
 
 

Nyamasheke:Mu mezi 3 ashize abantu 11 bapfuye bazize impanuka no kwiyahura

Yanditswe na IMVAHO NSHYA

Kuya 2017-04-10 12:13:21

 
Share on:
 
Yasuwe:385
 
Yavuzweho:200
 
10
 
10

Mu nama y’umutekano yaguye y’akarere ka Nyamasheke yateranye igamije gutegura gahunda zo kwibuka ku nshuro ya 23 Jenoside yakorewe abatutsi no kureba ibyaba byarahungabanyije umutekano mu mezi 3 ashize, hagaragajwe ko hari imfu zigera kuri 11 zatewe n’impanuka no kwiyahura.

Muri rusange muri iyi nama hagaragajwe ko hari ibyahungabanyije umutekano bigera kuri 75, muri ibyo hakabamo cyane cyane urugomo rugera ku gukubita no gukomeretsa.

Nk’uko Imvaho Nshya yabitangarijwe n’umuyobozi w’aka karere, Kamari Aimé Fabien, ngo nubwo ibyafatwa nk’ibyaha byahungabanyije umutekano bigera kuri 75, ngo hari ibyo umuntu atakwita ibyaha ahubwo yakwita impanuka.

JPEG - 255.2 kb
Abayobozi mu nzego zinyuranye basabwe gushyiraho ingamba zo kubungabunga umutekano

Yagaragaje kandi ko ikibazo cy’urugomo rushingiye ku businzi cyiganje, aho abantu bamara kunywa inzoga z’inkorano bagatangira kurwana bakanakomeretsanya, ariko ngo byafatiwe ingamba zikaze.

Ibindi avuga byahungabanyije umutekano ni ibyaha by’ubujura n’ubundi bugizi bwa nabi, icyakora ngo nta muntu bwahitanye.

Yavuze ko icyahitanye abantu cyane ari impanuka zo mu mazi no mu muhanda zahitanye abagera ku 10 n’umuntu mwe wiyahuye, hakaba hakwiye gufatwa ingamba zituma abantu badapfa kariya kageni.

Yagize ati “Muri aya mezi 3 ashize y’intangiriro z’uyu mwaka twapfushije abantu batari bake mu mpanuka, aho abagera kuri 6 bapfuye barohamye mu kiyaga cya Kivu, abandi 4 bakagwa mu mpanuka zo mu muhanda, hakaba n’undi umwe wiyahuye, aba bose bakaba baratubabaje kuko twari tukibakeneye.”

Yakomeje agira ati “Twabifatiye ingamba zikomeye, cyane cyane umutekano wo mu Kivu, aho abakoresha ikiyaga mu mibereho yabo basabwe kujya bambuka bambaye umwambaro wabugenewe kugira ngo batarohama, tugakomeza no gufatanya na Polisi yo mu mazi kugira ngo turebe ko twazikumira kuko muri aya mezi zidutwaye abantu benshi.”

Mu muhanda na ho abaturage basabwe kumenya gukoresha umuhanda neza kuko hari abakishimiye ko ari bwo bakibona kaburimbo mu mateka yabo, bagacikwa bakagenda mu muhanda hagati ari na ho bagirira izi mpanuka, ubufatanye bw’inzego zose n’abaturage bukazazihashya.

Ku kibazo cy’urugomo, bamwe mu baturage baganiriye n’Imvaho Nshya bavuze ko hakigaragara insoresore zinywa ibiyobyabwenge, cyane cyane mu murenge wa Kanjongo ufatwa nk’umujyi w’aka karere bagatangira guhohotera abaturage.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE