2017-10-22 09:16:35 clouds 27o High | Kigali Rwanda

Dukurikire:
 
 

Nyamasheke:Kandagirukarabe ziteza umwanda aho kunoza isuku

Yanditswe na IMVAHO NSHYA

Kuya 2016-07-29 06:26:08

 
Share on:
 
Yasuwe:8
 
Yavuzweho:200
 
10
 
10

Abaturage bagana ibiro by’umurenge wa Karambi mu karere ka Nyamasheke, bavuga bababazwa nuko kandagirukarabe zahashyizwe bababwira ko ari izo gutuma banoza isuku cyane cyane iyo bavuye mu bwiherero ku murenge, ubu zikaba zarabaye nk’umurimbo kuko zidakoreshwa.

Izi kandagirukarabe zari zitezweho kuba icyitegererezo cy’isuku mu ngo zabo, ubu ngo zabaye iziteza umwanda ku murenge aho kuba iz’isuku, bamwe bagasanga zikwiye kuhava kuko ntacyo zimaze.

Izi kandagirukarabe uzisanga zigerekeranye inyuma y’ibiro by’umurenge hafi y’ubwiherero buhari, nta mazi aherukamo ndetse bamwe mu baturage bahanyura bakavuga ko barembejwe no guhora bazitsitaraho kuko ziri mu nzira zabo kandi ntacyo zihamaze.

Bavuga ko batumva ukuntu bakangurirwa gufata neza ibikorwa bifitiye benshi akamaro mu gihe ababibakangurira bo batabyitaho.

JPEG - 228.2 kb
Abaturage baravuga ko izi kandagirukarabe ziteza umwanda ku murenge aho kuba iz’isuku (Foto Bahuwiyongera S)

Ndimurukundo Vianney, umwe muri aba baturage yagize ati:“Zari zifite akamaro kuko iyo zitakagira ntibari kuzihashyira kandi wasanga mu maraporo baranditse ko zatwaye akayabo k’amafarnga kugira ngo bazihashyire, bakanavuga icyo zimariye abaturage kandi ubona zisigaye ziteza umwanda gusa.

Tubabazwa n’uko hari igihe haza gahunda igashyirwamo imbaraga n’amafaranga menshi kubera akamaro baba bagaragaza ko ifitiye abaturage ndetse n’utayishyize mu bikorwa akabihanirwa, nyamara hashira iminsi ikibagirana n’ibyayo byose, ukibaza niba baba bayishyira mu bikorwa nk’urwitwazo bikakuyobera.”

Mugenzi we na we yagize ati:“Uretse n’izi kandagirukarabe zabaye gutya se, udusanduku tw’ibitekerezo badushishikarizaga kubishyiramo ubona turi he?

Ni uko se abaturage tudafite ibitekerezo twatangamo? Ubu se isuku badushishikariza bo barayigira ko mbona nta mazi aheruka muri utu tujerikani twaguye hasi?

Jye mbona abayobozi batita kuri gahunda nk’izi ziba zataweho igihe n’amafaranga bazidushishikariza, baba bakwiye kubibazwa bikabera isomo n’abandi ko gahunda yiswe iya Leta ikageza mu baturage iba idakwiye gukinishwa nka gutya.”

Umukozi ushinzwe isuku n’isukura muri aka karere Nyirabambanza Clémentine, avuga ko kandagirukarabe zashyizwe ku biro by’imirenge, utugari, ku karere, ku bigo by’amashuri, n’ahandi kugira ngo zikoreshwe kandi n’abaturage bazishyire mu ngo zabo birinde indwara zituruka ku mwanda.

Yakomeje avuga ko abayobozi bazifata nabi baba bakora amakosa, akabasaba kwisubiraho bakamenya akamaro kazo, kandi ngo bagiye kubihagurukira mu igenzura ry’isuku bakora, aho basanze zidakora abayobozi bakabibazwa.

Ubuyobozi bw’uyu murenge buvuga ko bugiye gukosora aya makosa kuko ngo bitanga urugero rubi ku isuku y’abaturage yari imaze kumvikana, bukongera no kugenzura ahandi izi kandagirukarabe zacitse burundu, abayobozi bagasabwa kuzisubizaho.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE