Advertisement
 
 
 
 
 
 
 
 

Amakuru | Mu Ntara | Intara

Nyamasheke: Inka z’umukamo 1076 zigiye guhabwa abatishoboye   

  Yanditswe na BAHUWIYONGERA SYLVESTRE
 2 months ago

 
 

Umuyobozi w’akarere ka Nyamasheke Kamari Aimé Fabien yatangaje ko mu rwego rwo gukomeza gushimangira gahunda ya Girinka no guteza imbere inka z’umukamo zabaye nke muri aka karere, abaturage batishoboye bagiye guhabwa inka 1076.

Umuyobozi w’aka karere avuga ko izi nka zizabera aba baturage imbarutso y’iterambere rirambye, nk’uko abo zagezeho mbere zabafashije kwigobotora ingoyi y’ubukene.

Mu kiganiro n’Imvaho Nshya, Meya Kamari yavuze ko izi nka zizatangwa na Leta n’abafatanyabikorwa b’akarere, abazazihabwa bakaba bazatoranywa mu buryo bisanzwe bikorwamo, aho komite za Girinka mu tugari n’imidugudu zitoranya abazikeneye kurusha abandi, ariko banujuje ibisabwa.

JPEG - 295.5 kb
Inka z’umukamo zihutisha iterambere ry’abazoroye (Foto archive)

Mu bisabwa harimo kugira ikiraro cyiza, ubwatsi buhagije n’ibindi byatuma bazorora neza.

Avuga kandi ko akarere ayoboye kihaye gahunda yo kongera imbaraga mu bworozi bw’inka zitanga umukamo, kuko bamwe mu baturage bari bafite impungenge ko izi nka zishobora kugabanuka kuko abenshi mu borozi babigize ubucuruzi, aho usanga biyororera ibimasa bitanga amafaranga, iz’umukamo bakazihorera bavuga ko zibahombya.

Yagize ati “Buri mwaka hari inka zitangwa mu baturage, yaba ari muri gahunda yo korozanya isanzwe ikorwa n’abaturage hagati yabo, yaba ari muri gahunda ya Girinka dufatanyamo n’abafatanyabikorwa, no mu bundi buryo.

Umwaka ushize hakaba haratanzwe inka zirenga 700 mu baturage, uyu mwaka na wo hakazatangwa izindi 1076 zitanga umukamo muri gahunda ya Girinka gusa, izi zindi na zo zisanzwe zitangwa zikazakomeza gutangwa.”

Yakomeje agira ati “Ibi byose bikaba biri muri gahunda yatangijwe na Nyakubahwa Perezida Kagame yo koroza abanyarwanda, natwe tukaba turi muri gahunda yo kuyigenderaho kugira ngo inka zitanga umukamo zikomeze ziyongere.”

Uyu muyobozi avuga ko kuva iyi gahunda yatangira nubwo yagiye ihura n’inzitizi z’abayobozi bamwe bashatse kuyikiriramo, yagiriye abaturage akamaro gakomeye cyane, haba mu kuzamura umusaruro w’ubuhinzi aho babonye ifumbire bakabona ibiribwa bihagije, ndetse abana n’ababyeyi bakabona amata bakarwanya imirire mibi n’ibindi.

Bamwe mu baturage batishoboye muri aka karere batarabona inka baganiriye n’Imvaho Nshya, batangaje ko kuba izi nka zigiye gutangwa ari inkuru nziza cyane kuri bo.

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Rusizi:Laboratwari yagombaga gufasha abanyeshuri imaze imyaka 10 yubakwa
Rusizi:Laboratwari yagombaga gufasha abanyeshuri imaze imyaka 10 yubakwa

Ababyeyi barerera mu ishuri ryisumbuye rya Gishoma riri mu murenge wa Rwimbogo, mu karere ka Rusizi, baravuga ko batewe impungenge na Laboratwari abana babo bagombye kuba bakoresha, imaze imyaka (...)

Huye:Abakoreye ibyahoze ari amakomine barishyuza Akarere ka Huye asaga miliyoni 11
Huye:Abakoreye ibyahoze ari amakomine barishyuza Akarere ka Huye asaga miliyoni 11

Abahoze ari abakozi b’ibyahoze ari amakomine yahurijwe mu karere ka Huye, barishyuza aka karere amafaranga asaga miliyoni cumi n’imwe bakoreye mbere yo guhagarikwa ku mirimo bakoraga. Hashize (...)

Rusizi: Bamwe mu bakirisito binubira kubatirizwa mu mazi mabi
Rusizi: Bamwe mu bakirisito binubira kubatirizwa mu mazi mabi

Bamwe mu bayoboke b’amatorero ya gikirisitu akorera mu karere ka Rusizi mu binubira kubatirizwa mu mazi mabi y’ibishanga. Abaganiriye n’Imvaho Nshya bagaragaza ko iyo hateguwe umubatizo, bisaba ko (...)

Karongi:Abaturage 31 bajyanwe mu bitaro bazira ikigage banyoye mu bukwe
Karongi:Abaturage 31 bajyanwe mu bitaro bazira ikigage banyoye mu bukwe

Abaturage 31 bo mu mudugudu wa Nyagahinga, Akagari ka Ruhinga mu murenge wa Gitesi ho mu karere ka Karongi, bamaze iminsi mu bitaro, nyuma yo kunywa ikigage bikekwa ko gihumanye mu bukwe. Aba (...)

Uburengerazuba: Guverineri Munyantwari yasabwe kwihutisha iterambere
Uburengerazuba: Guverineri Munyantwari yasabwe kwihutisha iterambere

Abanyamuryango ba FPR Inkotanyi mu ntara y’Uburengerazuba, batoye Guverineri Munyantwari Alphonse nk’umuyobozi mushya w’uyu muryango muri iyi Ntara, bamusaba kwihutisha iterambere. Guverineri (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.