2017-06-25 13:58:23 clouds 27o High | Kigali Rwanda

Dukurikire:
 
 

Nyamasheke: Ingobyi y’abarwayi ishaje ituma barushaho kuremba

Yanditswe na IMVAHO NSHYA

Kuya 2016-06-16 08:25:09

 
Share on:
 
Yasuwe:2
 
Yavuzweho:200
 
10
 
10

Abarwayi bo mu murenge wa Karambi mu karere ka nyasheke bajyanwa ku bitaro bya Kibogora mu ngobyi ishaje barataka kugerayo banegekaye kurushaho.

Kubera iyi ngobyi yabaye igisenzegeri, bamwe mu babyeyi bagiye kubyara babyarira mu mayira, abarwayi na bo ngo bakagera ku bitaro bya Kibogora barembye. Abaturage bamwe bemeza ko bahageza abarwayi babo ntacyo bakirengera.

Abaturage bavuga ko iyi ngobyi y’abarwayi ikoreshwa n’ikigo nderabuzima cya Cyivugiza, Ngange ndetse, Karambi n’ivuriro ry’ingoboka rya Kabuga rigengwa n’ikigo nderabuzima cya Karambi.

JPEG - 236.7 kb
Uyu mugore yasobanuriraga abadepite uburemere bw’iki kibazo (Foto Bahuwiyongera S)

Ubwo abadepite basuraga akarere ka Nyamasheke, abaturage bavuze ko imihanda mibi nayo ngo ituma iyi ngobyi y’abarwayi itagera kuri ibi bigo nderabuzima igahagarara muri santere y’ubucuruzi ya Rurembo.

Abaturage baheka umurwayi mu bilometero birenze 7 uvuye ku Kigo nderabuzima cya Karambi, n’ibindi bilometero 3 uvuye ku Kigo nderabuzima cya Ngange kugira bagere kuri iyi santere y’ubucuruzi, aho iyi ngobyi iba ihagaze kuko ngo idashobora kuharenga.

Mujyebwami Joseph yagize ati “Igiteye agahinda cyane ni uko, kuba iyi ngobyi y’abarwayi ikoreshwa ku bigo nderabuzima byinshi nta n’imbaraga igifite kubera ubusaze, hari igihe iba iri hamwe, ahandi na ho umurwayi akaba ararembye kandi kugera ku bitaro bya Kibogora hari ibilometero birenze 30. Mu muhanda mubi cyane, ikazagaruka ku kindi kigo nderabuzima isanga umurwayi agiye gushiramo umwuka, dore ko ubu n’uburwayi bwiyongereye.”

Basaba ko umuhanda Macuba-Karambi utera ibi byose wakorwa, MINISANTE nayo ikabaha indi ngobyi y’abarwayi ntibakomeze guhangayika gutyo.

Umuyobozi w’Ikigo nderabuzima cya Cyivugiza Ngirumpatse Bernard avuga ko iki ari ikibazo kirenze ubushobozi bw’ibi bigo nderabuzima byose, kuko iyi ngobyi y’abarwayi yaguzwe n’abagize koperative y’abahinzi b’icyayi ya COTHEGA ari na yo yiyubakiye iki kigo nderabuzima, ibonye ari ibibazo ihitamo kuyisaranganya n’ibi bigo nderabuzima bindi.

Ati “Irashaje cyane kandi iratera ibibazo byinshi ku buryo umurwayi agera ku kigo nderabuzima cya Kibogora yenda gushiramo umwuka, igisubizo ni ugukora imihanda no gushaka indi ya 2, kuko iyi ngobyi n’ubundi yaguzwe ishaje.”

Umunyamabanga Nshingwabikorwa w’Akarere Nyamasheke, Habiyaremye Pierre Céléstin, yabwiye Imvaho Nshya ko iki ari ikibazo giteye impungenge cyane ubuyobozi n’abaturage. Bakaba barandikiye Minisiteri y’ubuzima basaba ko babaha indi ngobyi y’abarwayi gusa ngo baracyategereje igisubizo, kandi ngo ikibazo kiri henshi muri zone y’ibitaro bya Kibogora.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE