2017-07-23 11:30:24 clouds 27o High | Kigali Rwanda

Dukurikire:
 
 

Nyamasheke:Ibyumba by’amashuri birenga 300 byenda kugwa

Yanditswe na IMVAHO NSHYA

Kuya 2016-04-29 05:26:32

 
Share on:
 
Yasuwe:43
 
Yavuzweho:200
 
10
 
10

Ubuyobozi bw’Akarere ka Nyamasheke bwagaragaje ko butewe impungenge zikomeye n’ibyumba by’amashuri birenga 300 bishaje, ku buryo isaha n’isaha bishobora kugwira ababyigiramo.

Mu nama y’uburezi iherutse kuba, hagaragajwe ko muri iki gihe cy’imvura nyinshi ivanze n’umuyaga hari impungenge ko ibi byumba by’amashuri byagwira abana, bigateza impanuka ikomeye.

Muri iyi nama abayobozi b’ibigo by’amashuri afite ibyumba by’amashuri afite iki kibazo bibukije akarere impungenge z’umutekano wabo n’uw’abana bigishiriza muri ayo mashuri yashaje cyane, zikubiye mu mabaruwa bakandikiye mu bihe bitandukanye.

JPEG - 179.6 kb
Abayobozi b’ibigo by’amashuri batewe impungenge n’amashuri ashobora guteza impanuka (Foto Bahuwiyongera S)

Nyandwi Jean Pierre uyobora ishuri ribanza rya Mutagatifu Kizito rya Kirehe mu murenge wa Macuba yagize ati:“Njye mu byumba by’amashuri 7 abana bigiramo bitanu byose byarashize ku buryo imvura inyagirira abana mu mashuri, bikaba ngombwa ko abana n’abarezi bose tubatsindagira mu cyumba kimwe kikiri kizima.

Iyo ihise nibwo babona gusubira mu mashuri yabo, ariko ubwo ntibaba bakize kuko amashuri yose n’inkuta biba byabaye amazi gusa, nkaba naranditse mbigaragaza kuko ku bwanjye aba bana ntashobora kubasubiza muri aya mashuri.”

Umuyobozi ushinzwe uburezi muri aka karere Sinabajije Alphonse, ahamya ko iki kibazo kiri ku bigo by’amashuri byinshi, kuko ngo muri aka karere ngo muri rusange habarurwa ibyumba by’amashuri 300 byagwa igihe icyo ari cyi cyose.

Yagize ati:“Ibi byumba 300 ni ibishobora kugwa ku bana umwanya uwo ari wo wose igihe imvura yaba nyinshi, cyangwa haje nk’umutingito utunguranye.
Ariko dufite ibyumba byinshi by’amashuri bishaje cyane kandi twe biduteye impungenge kuko ubwoba abana bigana natwe tutabura kubugira.”

JPEG - 46.7 kb
Aya mashuri yarashaje cyane ku buryo abayigiramo baba bafite ubwoba ko yabagwira (Foto Bahuwiyongera S)

Muri iyi nama umuyobozi w’aka karere yahise ategeka ko amashuri babona ameze nabi cyane yasurwa bakareba icyakorwa cyihutirwa, ndetse bishyirwa mu bikorwa bimwe mu byumba by’amashuri biba bifunzwe, abana bashakakirwa ahandi baba bigira.

Umuyobozi w’akarere Kamari Aimé Fabien, avuga ko iri ari ihurizo rikomeye barimo, bakaba bagiye gufatanya n’ababyeyi kureba uko baryikuramo.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE