2017-08-20 07:43:19 clouds 27o High | Kigali Rwanda

Dukurikire:
 
 

Nyamasheke: Gahunda ya ‘Garuka Ushime’ iratanga umusaruro mu mashuri

Yanditswe na IMVAHO NSHYA

Kuya 2017-06-28 06:35:32

 
Share on:
 
Yasuwe:39
 
Yavuzweho:200
 
10
 
10

Abize mu ishuri ry’ubuhinzi n’ubworozi rya Ntendezi (EAV Ntendezi) mu karere ka Nyamasheke, barishimira gahunda ya Garuka ushime, kuko ibabera umwanya mwiza wo kugira uruhare mu iterambere ry’ikigo bizeho, ndetse no gufasha barumuna babo bakiri mu ishuri.

Gahunda ya garuka ushime ni gahunda imaze kugira ingufu nyinshi muri aka karere, aho usanga abize mu ishuri runaka bagaruka bakiyibutsa uburyo bigaga, bamwe bagasubira n’aho bararaga bakongera kwibukiranya ubuzima bahagiriye, uburezi n’uburere bahakuye n’aho bigejeje ubu.

Iyi gahunda ishimwa cyane n’abayobozi b’amashuri n’abanyeshuri baba bahiga bagafatiraho intego yo kwitwara neza no kwiga birushijeho.

Muri EAV Ntendezi, biteguwe n’abari abaporotesitanti bahize, bamwe mu bahize barahagarutse, mu gushima kwabo biyemeza kuzajya barihira bamwe mu bana batishoboye abandi bakababonera ibikoresho by’ishuri, bakaba bamaze imyaka 4 bagurira ibikoresho by’ishuri bamwe muri abo bana, bakaba ngo bagiye kwagura ibikorwa.

JPEG - 312.3 kb
Biyemeje guteza imbere ishuri bizemo bafasha abanyeshuri bahiga ubu batishoboye

Banderankura Jean Claude wahize mu myaka ya 2005-2007 akaba ari umuhuzabikorwa w’iyi gahunda ya Garuka ushime, yavuze ko biyemeje gufungura konti (compte) bagakora ibifatika bifasha barumuna babo.

Yagize ati “Iyi ni inshuro ya 4 tuza muri gahunda nk’iyi, aho twagiye duha ibikoresho by’ishuri bamwe mu banyeshuri biga hano batishoboye, tugafata abanyeshuri 4. Kuri iyi nshuro twongeye gufata abandi 4 barimo umwe tuzarihira amafaranga y’ishuri umwaka wose, ariko umwaka utaha tuzagura ibikorwa tujye turihira abana 4 amafaranga y’ishuri, dukore n’ibindi bikorwa tukiganiraho.”

Yakomeje agira ati “Igihugu cyacu cyatwigishije umuco wo gushima, ni yo mpamvu igikorwa nk’iki ari ingirakamaro ku ishuri nk’iri ryaduhaye uburere n’ubumenyi bidutunze uyu munsi.”

Uwamahoro Olive wahize kuva muri 2002 kugera muri 2008 yishimira ko yahakuye intangiriro yamugejeje muri kaminuza akanagira amahirwe n’umugabo we akaba ari uwo bahiganye yari aziye imico akishimira urugo bubakanye, ari yo mpamvu we yumva yanashima byinshi kuruta abandi.

Ati “Aha nahakuye uburere bwiza no gukunda Imana, mpakura ubumenyi bwamfashije kuba ndi umugore wihesheje agaciro uyu munsi, mpakura umugabo twubakanye urugo rw’amahoro, n’ibindi bituma nanjye ngomba kugaruka nkitura ishuri ryanjye icyo ryamariye mfasha barumuna banjye bahiga batishoboye.”

Umuyobozi w’iri shuri Ndashimye Léonce avuga ko iyi gahunda ari nziza cyane kandi imaze gutanga umusaruro ufatika kuko ngo uretse bariya bana bamaze gufashwa kandi byabagiriye akamaro cyane, hari no kuba abakihiga bababonamo indorerwamo nziza y’ejo hazaza kuko batanga ubuhamya bw’ubuzima barimo ku ishuri n’ubwo barimo ubu bigatuma n’abiga ubu bagira icyizere ko iminsi yabo iri imbere izarushaho kuba myiza.

Ati “Ni gahunda dushyigikiye cyane tunabonamo umusaruro mwiza nk’ishuri, tukazakomeza kuyishyigikira cyane cyane ko hano hize abanyeshuri benshi bari mu mirimo ikomeye itandukanye ubu, kongera kubonana bakaganira ku byubaka ishuri ntitwabura kubishyigikira.”

Byiringiro David uhiga ubu kimwe na bagenzi be, babwiye Imvaho Nshya ko bungukiye cyane kuri bakuru babo, bakazakomeza kubafatiraho urugero rwiza rw’iterambere n’uburere bwiza na bo nibarangiza bakazafatanya n’aba bandi kubaka ishuri bizemo.
BAHUWIYONGERA SYLVESTRE

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE