2017-06-28 15:02:12 clouds 27o High | Kigali Rwanda

Dukurikire:
 
 

Nyamasheke: Batewe urujijo n’abo mu muryango umwe bakomeje gupfa biyahuye

Yanditswe na IMVAHO NSHYA

Kuya 2017-04-07 09:10:24

 
Share on:
 
Yasuwe:1267
 
Yavuzweho:200
 
10
 
10

Nsengimana Daniel w’imyaka 32 y’amavuko wari utuye mu mudugudu wa Nyarubura, akagari ka Susa, mu murenge wa Kanjongo, mu karere ka Nyamasheke, bamusanze mu cyuma cy’uruganiriro cy’inzu ye yiyahuje inzitiramibu, ni nyuma y’uko se umubyara na nyirakuru we nabo bapfuye biyahuye.

Amakuru Imvaho Nshya ikesha umunyamabanga nshingwabikorwa w’uyu murenge Twagirayezu Zacharie, avuga ko inkuru y’uru rupfu yamenyekanye mu ma saa mbiri n’igice z’umugoroba zo ku wa gatatu, ubwo umugore we yatabazaga umukuru w’umudugudu n’abaturanyi.

Umugore ngo yari yazindutse ajya guhinga n’abana be batatu bagarutse basanga urugi rwo ku irembo n’urwo mu gikari zikinze.

Yinjiriye mu rugi rwo mu gikari arwishe, agira ngo umugabo yagiye mu kabari nk’uko bisanzwe afata ijerikani mu gikoni ajya kuvoma atiriwe akingura inzu,aje,we n’abana bakomeza gutegereza ko aza, babonye isaha atajyaga arenza igeze bumva ubwoba bubatashye ni ko gutekereza kwica urugi.

JPEG - 131.4 kb
Umurambo wahise ujyanwa muri ibi bitaro mbere yo gushyingurwa

Gitifu Twagirayezu avuga ko umugore yahise ahamagara umukuru w’umudugudu n’abaturanyi, baruciye basanga umugabo aranagana mu mugozi w’inzitiramibu mu cyumba cy’uruganiriro yashizemo umwuka.

Ngo banamusanganye ibaruwa yanditsemo ko nta kibazo na kimwe yari afitanye n’umugore, ko hatazagira umubaza iby’urwo rupfu, ibaruwa ikaba ngo ifitwe n’inzego za polisi.

Amakuru abaturanyi b’uyu muryango bahaye Imvaho Nshya akanasubirwamo na Gitifu w’umurenge ngo ni uko uyu atari we wa mbere wiyahuye muri uyu muryango.

Gitifu Twagirayezu yagize ati’’ igikomeje gutera urujijo abaturage ni uko kwiyahura kwe bimeze nk’uruhererekane mu muryango we. Nyirakuru ubyara se yapfuye yiyahuye, se umubyara na we yijugunye mu mugozi inshuro ebyiri bamukuramo atarapfa, ubwa 3 ngo arabacika bikavugwa ko yaba yaragiye kwijugunya mu kKvu n’ubu umurambo we nturaboneka.

“Uyu mugabo na we mu myaka 10 ishize abana n’umugore we yafashwe n’uburwayi bwo mu mutwe batamenye ubwo ari bwo, burakira,mu myaka ibiri ishize bwongera kumufata na bwo agaragara nk’ukize, none yiyahuye, byatubereye urujijo twese.’’
Umurambo wa nyakwigendera wahise ujyanwa mu bitaro bya Kibogora gukorerwa isuzuma mbere y’uko ushyingurwa kuri uyu wa gatanu, akarere kakaba ari ko karishye amafaranga yaryo kuko ngo uyu muryango usanzwe utishoboye.

Gitifu Twagirayezu yasabye abaturage kudakemuza ibibazo kwiyambura ubuzima no gutangira amakuru ku gihe igihe babona hari ibimenyetso ko umuntu ashobora kwiyambura ubuzima

Ati’’ icya mbere ni uko nubwo umuntu yagira ibibazo bimurenze adakwiye kubikemuza kwiyambura ubuzima,kuko igihe umuntu abigize yareba abaturanyi yizeye cyangwa ubuyobozi akabugisha inama igisubizo kikaba cyashakwa aho kugira ngo yiyahure.

“Ikindi ni uko abaturage bakwiye gutangira amakuru ku gihe igihe hari ugaragaza ibimenyetso byo kuba yakwiyambura ubuzima cyangwa akabwambura abandi, akagirwa inama cyangwa ibyo ashaka gukora bigakumirwa hakiri kare.”

Umuyobozi w’aka karere Kamari Aimé Fabien yabwiye Imvaho Nshya ko uru rupfu barumenye, bakaba bagiye kwegera umuryango we ngo bawuhumurize kugira ngo hatazongera kugira uwiyambura ubuzima muri ubu buryo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE