2017-06-24 12:54:56 clouds 27o High | Kigali Rwanda

Dukurikire:
 
 

Nyamasheke: Baratabariza abanyeshuri bigira mu mashuri yenda kubagwaho

Yanditswe na IMVAHO NSHYA

Kuya 2016-09-22 07:52:39

 
Share on:
 
Yasuwe:8
 
Yavuzweho:200
 
10
 
10

Abanyeshuri n’abarezi bo mu rwunge rw’amashuri rwa Banda ruri mu kagari ka Banda, mu murenge wa Rangiro, mu karere ka Nyamasheke, baratabaza inzego z’ubuyobozi bw’akarere kabo kubera amashuri bigiramo yatangiye gusatagurika hejuru, ku buryo igihe hagwa imvura ivanze n’umuyaga mwinshi ashobora kubagwira.

Barasaba ko byagenzurwa neza, byaba ngombwa bagakurwa muri aya mashuri bagashakirwa ahandi bigira atarabateza akaga gashobora no kugera ku kubambura ubuzima.

Nk’uko Imvaho Nshya yabitangarijwe na bamwe mu barezi baho, ngo ibi byumba by’amashuri 6 byubatswe mu mwaka wa 2007 na rwiyemezamirimo ku isoko ryari ryatanzwe na MINEDUC.

JPEG - 151.8 kb
Ibyumba by’amashuri byariyashije ku buryo haje umuyaga igisenge cyagwa (Foto Bahuwiyongera S)

Uyu rwiyemezamirimo ngo yabyubatse nabi ku buryo yayataye atanuzuye neza, bimwe bigasaba ko ishuri n’umurenge birwanaho bakabishyiramo ngo barebe ko aho abana bigira haboneka, ariko ngo kiracyari ikibazo gikomeye cyane.

Umwe mu barezi yabwiye Imvaho Nshya ati “Duhangayikishijwe cyane n’ubuzima bwacu n’ubw’abana bayigiramo kuko yari yubakishijwe amatafari ya ‘bloc-ciment’, ni ibyumba by’amashuri 6 byigirwamo icyiciro cya 2 cy’amashuri abanza.

Hejuru hafi y’amabati hatangiye kwiyasa ku buryo haje umuyaga mwinshi byahita bicikamo kabiri, amabati hari aho ava, amadirishya hejuru ntayo yashyizemo n’ahari yaramenaguritse, imbeho n’amashahi y’imvura byinjiramo abana bakanyagirwa iyo imvura ari nyinshi, mbese yarangiritse ku buryo butari ubwo gukinishwa.”

Avuga ko abarezi na bo bababazwa n’uko kubera ko n’inzugi nta na rumwe yashyizemo bagashaka inzugi z’ibiti na zo zidafashe, nta mfashanyigisho bashobora gushyiramo kubera kudakingwa, kuko zihita zibwa.

Utubati twagombaga kujyamo ngo hajye hagira ibibikwamo na two nta na kamwe karimo, hasi nta sima irimo kuko iyari irimo yamenaguritse, byose bikaba bisaba gukurikiranwa vuba.

Ngarukiyimana Evariste wiga mu mwaka wa 5 w’abanza yagize ati “Twigana ubwoba bwinshi kuko hari igihe imvura igwa tukavirwa kandi hejuru hariyashije, tukikanga ko umunsi haje umuyaga mwinshi byose bizahubuka bikatugwaho, kuko no mu zuba aho kuza akayaga ahubwo ivumbi ryinshi ryinjiramo.”

Umuyobozi w’aka karere Kamari Aimé Fabien, avuga ko ikibazo cy’uriya rwiyemezamirimo kizwi hose ku rwego rw’igihugu n’urwa REB, akaba arimo gukurikiranwa n’ubutabera, imyanzuro izavamo ikazatanga icyerekezo.

Ariko hagati aho ngo bagiye koherezayo abatekinisiye barebe uburemere bwabyo, basanga ari ikibazo gikomeye koko nk’uko bivugwa bakaba bareba ahandi bimurira abana aho kugira ngo bazibuke ibitereko basheshe, kandi bari baburiwe mbere.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE