2017-08-24 09:26:29 clouds 27o High | Kigali Rwanda

Dukurikire:
 
 

Nyamasheke: Abigaga banyagirwa barashima RDB yabubakiye amashuri agezweho

Yanditswe na IMVAHO NSHYA

Kuya 2016-10-31 10:53:47

 
Share on:
 
Yasuwe:8
 
Yavuzweho:200
 
10
 
10

Nyuma y’igihe kirekire, abana biga mu rwunge rw’amashuri rwa Gisakura ruri mu murenge wa Bushekeri, bigira mu mashuri yahoraga abatera impungenge zo kubagwaho, ubu barashima cyane ikigo cy’igihugu cy’iterambere (RDB) kuba cyarabubakiye amashuri meza agezweho.

Aya mashuri yari yarubatswe mu 1975, yubakiwe abari abana b’abakozi b’uruganda rw’icyayi rwa Gisakura ngo babone aho bigira, yari ashaje cyane ku buryo ngo imvura yagwaga abana n’abarezi babo bakanyagirirwa hamwe.

Ngo byasabaga ko bihengeka mu duce duto tutavaga yajya irangira bakabacyura kubera kunyagirwa, umwanda na wo ari wose, ariko ubu nyuma yo guhabwa ibi byumba n’akarere kakabubakira ibindi, barigana umutuzo.

JPEG - 260.6 kb
Abana basigaye biga ntacyo bikanga (Bahuwiyongera S.)

Ibyumba by’amashuri 4 bubakiwe na RDB byuzuye bitwaye amafaranga arenga 24.000.000, bimaze igihe gito bitashywe ku mugaragaro na RDB ku bufatanye na MINEDUC.

Abahiga n’abahigishiriza bemeza ko ibi bitanga icyizere cy’uburezi bufite ireme, kuko abarezi n’abanyeshuri bahamya ko mbere uko kwigira ahantu habi byanatumaga bamwe mu bana bata ishuri.

Niyonkuru Françoise wiga mu mwaka wa 5 w’abanza, yagize ati “Twigaga mu buryo bubi cyane bigatuma bamwe barambirwa bakarivamo, kuko amashuri yavaga cyane bikabije, imvura yagwa ari nyinshi, kubera imisumari y’amabati ashaje cyane yari ahari yari yarakutse, iyo amabati atagurukaga, imvura yageragamo kubera gutobagurika.

Amakayi n’ibitabo na byo bikanyagirwa, umwana yataha yakwaka ababyeyi ibindi bakamubwira ko ntabyo bafite agahitamo kurivamo.

Yongeyeho ati “Ubu turiga neza cyane, amadirishya arahari, imbeho ya Nyungwe ntikitwica, isuku turayikora neza kuko icyo gihe itashobokaga, n’abari bararivuyemo bamaze kumva ko twabonye amashuri meza baragarutse.

Tugashima cyane RDB ikomeje guteza imbere abaturiye pariki y’igihugu ya Nyungwe iduha amashuri meza.”

Umuyobozi w’iri shuri Muragwabugabo Gratien, ashimangira ibivugwa n’abana n’abarezi babo, kuko nyuma ngo yo kubakirwa amashuri meza abana 70 bamaze kurigarukamo,bamwe bakavuga ko bari barambiwe guhora banyagirwa.

Yagize ati “Guturira iyi pariki byatubereye isoko y’amahirwe akomeye kuko urebye uburyo abana n’abarezi babo banyagirirwaga mu mashuri, ku gihe cy’izuba ryinshi na bwo bagashyuha cyane ntibige neza, byari bibabaje cyane.

Tubibwiye RDB ntiyazuyaza ihita itwubakira, ubu abana bariga neza cyane, nta bwoba bwo kunyagirwa no kwigira mu mwanda, tukizera ko n’ibindi bibazo dufite bazadufasha kubikemura.”

Musabyimana Elie ushinzwe guhuza pariki ya Nyungwe n’abaturage, avuga ko bikorwa mu rwego rwo gukomeza gukundisha abaturage iyi pariki no kubumvisha akamaro ibafitiye, bakaba bamaze kubakorera ibikorwa byinshi bizanakomeza.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE