2017-08-21 15:16:56 clouds 27o High | Kigali Rwanda

Dukurikire:
 
 

Nyamasheke:Abasenyewe n’intambi baracyategereje ingurane

Yanditswe na IMVAHO NSHYA

Kuya 2016-05-25 09:44:19

 
Share on:
 
Yasuwe:0
 
Yavuzweho:200
 
10
 
10

Abaturage bagera kuri 25 batuye mu kagari ka Kibogora mu murenge wa Kanjongo, mu karere ka Nyamasheke, bangirijwe amazu n’intambi zaturitswaga n’abashinwa bakora umuhanda Tyazo-Karongi, baravuga ko bari mu gihirahiro nyuma y’uko bari barijejwe kwishyurwa, none amaso akaba yaraheze mu kirere.

Aba baturage bavuga ko ubuyobozi bw’akarere ka Nyamasheke bwari bwabijeje ko abashinwa bakora iki gice cy’uyu muhanda nibamara guturitsa izi ntambi bahavuye bazahita babarirwa ibyabo byangiritse bikishyurwa, nyamara ngo aba bashinwa bamaze amezi 2 yose barangije, ariko ntacyo bo barabwirwa.

Bavuga ko izi ntambi zashwanyaguje amazu yabo cyane ku buryo kuyararamo ari nko ‘kwiyahura’, amategura akaba yarashwanyaguritse, inkuta na zo zirasenyagurika, bitewe n’ibibuye byaturitswaga bikayagwaho.

JPEG - 197.5 kb
Ndagijimana ni umwe mu bangirijwe n’intambi zaturitswaga n’abashinwa (Foto Bahuwiyongera S)

Ndagijimana Damien, umwe muri aba baturage, yagize ati:“Mfite ikibazo gikomeye cyane cy’inzu yanjye intambi zaturikijwe n’abashinwa zamenaguye, amategura akaba yaramenaguritse hejuru nkaba nsigaye meze nk’uri hanze, n’inkuta zaramenaguritse ku buryo imvura ikomeye iguye byanze bikunze amazu yagenda tukaba twanahashirira.”

Izi ntambi ngo zaraturitswaga ibibuye bigasimbuka bikihonda hejuru y’amazu ya bamwe muri aba baturage, andi umushyitsi wazo ukayatigisa agasatagurika.

Ubuyobozi bw’aka karere bukaba ngo bwari bwababwiye ko aho kugira ngo bahore basanirwa kandi intambi zigituritswa, bareka guturitsa bikabanza bikarangira hakazabarurwa ibyangijwe byose nyuma bakazabona kwishyurwa, cyangwa gusanirwa amazu yangiritse, cyangwa se kubakirwa bitewe n’uko bizaba bihagaze.

Nyamara n’ubwo babwiwe gutya, ngo hagiye gushira amezi 2 ntacyo babwirwa, nyuma yo kurangiza kuhakora, bakibaza amaherezo bikabayobera.

Umunyamabanga Nshingwabikorwa w’umurenge wa Kanjongo Ngendahimana Léopord, avuga ko aba baturage bari mu byiciro 3, icya mbere kikaba ari icyo byagaragaraga ko basenyerwa cyane n’izi ntambi, abagera kuri 3 bakaba barakuwemo baba bajyanywe gukodesherezwa andi mazu,mu gihe hagitegerejwe ko bimurwa.

Amazu ari kuri metero 22 uvuye ku muhanda yose ba nyirayo bakaba bazimurwa.Abandi ni abatuye munsi y’izo metero bashobora gusanirwa cyangwa bakubakirwa andi mazu bitewe n’uko bazasanga ibintu bihagaze, aba bose bakaba barabaruwe bazwi.

Hari kandi n’ikindi cyiciro cya 3 cy’abandi baje bavuga ko basenyewe kandi batari ku rutonde, ibyabo bikaba bikigwa, ariko muri rusange iki kibazo kikaba gikurikiranirwa hafi n’ubuyobozi kugira ngo aba baturage barenganurwe.

Yagize ati:“Umuyobozi w’aka karere yabakoresheje inama abemerera ko agiye kubikurikirana ku buryo bizakemuka vuba, tukabasaba gukomeza kuba bihanganye, nkaba numva bitazatinda.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE