2017-08-20 07:43:19 clouds 27o High | Kigali Rwanda

Dukurikire:
 
 

Nyamasheke:Abahinzi b’icyayi barishimira ko cyazamuye igiciro mu mezi 3 ashize

Yanditswe na IMVAHO NSHYA

Kuya 2017-07-24 14:38:29

 
Share on:
 
Yasuwe:29
 
Yavuzweho:200
 
10
 
10

Abahinzi b’icyayi ba COPTHEVIGI na COPTHE Mwaga-Gisakura, bakorana n’uruganda rw’icyayi rwa Gisakura mu karere ka Nyamasheke, barishimira ko mu mezi 3 ashize icyayi cyazamuye igiciro mu buryo bishimiye cyane, aho ikilo cy’icyayi kibisi cyavuye ku mafaranga 194 kikagera ku mafaranga 209.

Baravuga ko umuhinzi wasigaranaga amafaranga 120 mbere hamaze gukurwamo ibikenerwa na koperative byose, ubu asigarana amafaranga 147.

Ibi nk’uko byemejwe n’abahinzi b’icyayi baganiriye n’Imvaho Nshya, ngo byatumye bumva agaciro k’icyayi n’akamaro ko kugikorera neza, aho n’ufite akarima gato amafaranga yavuyemo yamugiriye akamaro gakomeye cyane, umusaruro wavuyemo ukaba ari uko buri muhinzi w’icyayi yiyemeje kuzamura ku buryo bugaragara umusaruro n’ubwiza bwacyo. Bifuje ko cyajya gihora kizamura igiciro kugira ngo umuhinzi wacyo arusheho gutera imbere mu buryo bufatika.

JPEG - 253.4 kb
Abahinzi b’icyayi biyemeje kurushaho kucyitaho uko bikwiye kuko kibinjiriza amafaranga atubutse

Nyirafuku Valérie uhinga icyayi muri COPTHEVIGI yabwiye Imvaho Nshya ko aya mezi 3 ashize yamubereye ay’ingirakamaro cyane mu buhinzi bw’icyayi, kuko amafaranga yiyongereyeho yayikenuje bituma hari byinshi yagezeho atari kubona iyo icyayi kitazamura igiciro, agashimira cyane imiyoborere myiza ituma bitabwaho.

Yagize ati “Mbere twahabwaga udufaranga duke umuntu akabura uko adusaranganya mu bibazo afite, ariko ubu umuntu arabona amafaranga afatika akabasha kugira icyo agura mu rugo rugatera imbere. Bamwe bari baracitse intege batangiye kukirandura no kwihingiramo ishyamba, ariko iki giciro cyaduhaye imbaraga ahubwo zo kongera ubwinshi n’ubwiza bwacyo nk’uko tubisabwa, tugashima cyane Umukuru w’igihugu Paul Kagame wabonye ko n’abahinzi b’icyayi dukwiye iterambere agaharanira ko igiciro cyacyo kizamuka.”

Perezida w’aba bahinzi b’icyayi Kayiranga Eleuthère, avuga ko bashaka gufatira kuri ibi byishimo by’abahinzi bakazamura umusaruro bongera ubuso bw’aho gihinze.

Bashaka kuva kuri hegitari 325 bafite ubu bakagera kuri hegitari 500 bitarenze imyaka 3, aho babonaga toni 200 mu kwezi, bakagera kuri toni 300 mu kwezi, kigakorerwa neza, ku buryo cyafata mu myanya ya mbere mu bwiza ku isoko mpuzamahanga.

Yagize ati “Abahinzi b’icyayi turishimye cyane kubona kizamura igiciro buri gihe, tukabikesha imiyoborere myiza ya Nyakubahwa Paul Kagame utifuza ko hari umuturage wasigara inyuma mu iterambere, kuko mbere wasangaga abanyenganda b’icyayi bikirira twe bakaduha intica ntikize, ariko ubu natwe turakora ku mafaranga tugateza imbere imiryango yacu.

Icyo nsaba abahinzi b’icyayi bose, ni uko barushaho kugikorera neza, kigasoromwa mu buryo bwiza kikagezwa aho gikurwa kijyanwa mu ruganda neza kugira ngo kidatakaza uburyohe bwacyo, natwe tugaharanira ko ubuso bwiyongera, umuhinzi w’icyayi agakomeza guhagarara neza mu bukungu.”

Umuyobozi wungirije w’uruganda rw’icyayi rwa Gisakura Kanyesigye Emmanuel, na we yishimira intambwe imaze guterwa n’aba bahinzi mu kumva akamaro k’icyayi, akavuga ko uruganda ruzakomeza kubahora hafi, umuhinzi w’icyayi agahora yishimye.

BAHUWIYONGERA SYLVESTRE

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE