2017-08-23 07:41:18 clouds 27o High | Kigali Rwanda

Dukurikire:
 
 

Nyamasheke: Abaforomo 2 n’umuganga batawe muri yombi bakekwaho ubujura

Yanditswe na IMVAHO NSHYA

Kuya 2017-04-15 08:47:13

 
Share on:
 
Yasuwe:1314
 
Yavuzweho:200
 
10
 
10

Nyuma y’ibyumweru bibiri mu bitaro bya Bushenge biherereye mu karere ka Nyamasheke habuze icyuma rukumbi kigezweho gipima zimwe mu ndwara zirimo umuvuduko w’amaraso, umutima, indwara z’ubuhumekero n’izindi kibuze, abaforomo 2 n’umuganga wari waraye izamu iki cyuma kibura batawe muri yombi.

Nk’uko Imvaho Nshya yabitangarijwe n’umuyobozi w’ibi bitaro w’agateganyo, Dr Nkurunziza Vedaste, iki cyuma cyabuze mu ijoro ryo kuwa 28 rishyira uwa 29 Werurwe, ubwo uyu muganga n’aba baforomo 2 bari baraye izamu, kikaza kubura hagati ya saa munani na saa kumi n’imwe z’igitondo kuko ngo aho cyabaga hatanakingwaga.

Uyu muyobozi w’ibitaro avuga ko kugeza ubu hakiri urujijo rwo kumenya uwaba yaracyibye, bikaba byarabaye ngombwa ko kugira ngo iperereza rikorwe neza, aba bose batabwa muri yombi.

Yagize ati “Bamaze iminsi batawe muri yombi bakaba bafungiye kuri sitasiyo ya Polisi ya Ruharambuga muri aka karere. Ni nyuma y’uko icyuma gikomeye kigezweho gipima indwara nyinshi zirimo iz’umuvuduko w’amaraso, iz’ubuhumekero, iz’umutima n’izindi twari dufite cyaburiwe irengero mu buryo budasobanutse.

JPEG - 186.8 kb
Ibi bitaro byibwe icyuma cyafashaga mu kuvura indwara zikomeye (Foto Bahuwiyongera S)

Byabaye ngombwa ko abaforomo 2 n’umuganga bari baraye izamu kandi bakorera aho icyo cyuma kiri batabwa muri yombi n’inzego z’umutekano kugira ngo iperereza rikorwe hamenyekane irengero ryacyo n’ubwo tutavuga ko ari bo bakibye, ariko hagire amakuru abimenyekanaho.”

Dr Nkurunziza Védaste avuga ko iki gikoresho gifite agaciro k’amafaranga 1.300.000 cyateye icyuho gikomeye muri ibi bitaro ku bipimishaga izi ndwara kandi ni benshi cyane.

Icyakora ngo babaye bifashishije udukoresho tudafite ingufu tureba umuvuduko w’amaraso n’uko umutima utera gusa, ariko ibikorwa bikomeye by’ipimwa abarwayi bakorerwaga bisa n’aho bidakorwa.

Ati “Cyari icyuma kigezweho gikoresha umuriro w’amashanyarazi kinakora mu buryo bw’ikoranabuhanga. Ubu turifashisha utwuma duto dukoresha amabuye by’amaburakindi, tureba gusa umuvuduko w’amaraso n’uko umutima utera, ibindi ntidushobora kubifata kandi byari bikenewe cyane.”

Gusa tugiye kureba icyakorwa, turebe mu bushobozi dufite niba hagurwa ikindi ariko na byo biradukomereye, icyakora inzego zose bireba twamaze kubizimenyesha.”

Avuga kandi ko ibura ry’iki cyuma riteje ibibazo bikomeye mu mivurirwe y’abarwayi rije risanga n’ubundi ibyo bari bafite, kuko ngo ugereranyije n’abarwayi bahaza n’ubundi abaganga n’abaforomo bari bacye cyane, none gukubitira ho bariya bari mu maboko ya Polisi ikibazo muri serivisi z’ubuvuzi muri ibi bitaro kirarushaho kuba ingorabahizi.

Ikindi ngo kiri bugorane ni imirimo yakorwaga na kiriya cyuma idakorwa uko bikwiye, bamwe mu baturage bafite izi ndwara baganiriye n’Imvaho Nshya, bakavuga ko bahangayitse kuva bakumva iki kibazo kandi izi ari indwara zica amarabira igihe zidasuzumwe neza, bagasaba Minisante kugira icyo igikoraho hataragira umuturage uhasiga ubuzima.

Umwe yagize ati “Turahangayitse cyane aho twumviye ko kiriya cyuma cyabuze kuko izi ndwara zishobora kwica umuntu amarabira.Kuba serivisi cyadufashagamo zidashoboka kandi cyari kimwe rukumbi na we ari wowe ntibyabura kugukura umutima.

Nihashakwe igisubizo cyihutirwa nibashaka natwe abaturage batubwire dushyireho akacu ariko tuvurwe kuko kujya kure na byo byadutwara amafaranga menshi tudafite.”

Ibi bitaro byagizwe iby’intara biraganwa n’abantu benshi cyane ku buryo ngo kubura icyuma nk’iki cyangwa abaganga bitabura guhangayikisha abaturage.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE