2017-12-10 12:22:00 clouds 27o High | Kigali Rwanda

Dukurikire:
 
 

Nyamagabe:Uruganda rw’icyayi rwa Mushubi rwahinduye imibereho y’abatuye Buruhukiro

Yanditswe na IMVAHO NSHYA

Kuya 2017-07-06 06:55:07

 
Share on:
 
Yasuwe:24
 
Yavuzweho:200
 
10
 
10

Abahinzi b’icyayi n’abakora mu ruganda rw’icyayi Mushubi Tea Factory ruherereye mu murenge wa Buruhukiro mu karere ka Nyamagabe, baratangaza ko mu myaka ine begerejwe uru ruganda, imibereho yabo yahindutse ku buryo bugaragarira buri wese.

Mutananirwa Laurent, umuhinzi w’icyayi uri muri Koperative yitwa COTEGABU, atangaza ko mbere y’uko uru ruganda ruza byabagoraga kugeza umusaruro wabo ku zindi nganda kuko ziri kure yabo cyane, akemeza ko ubu amaze kugera kuri byinshi kuko yabonye aho agemura umusaruro we bitamugoye.

Mu kiganiro yagiranye n’Imvaho Nshya, Mutananirwa yagize ati “Nahingaga icyayi ariko kugira ngo ngere aho nakigemuraga bikangora ku buryo numvaga ibyo guhinga icyayi nari maze kumva nzabivamo, ariko aho uru ruganda ruziye byaramfashije cyane, ku buryo ubu ndi gutera imbere nanjye nkabyishimira.

JPEG - 121.8 kb
Uru ruganda rwa Mushubi Tea campany rwaje abaturage barukeneye cyane

Mbere nari mfite ihene 2, ariko ubu ngeze ku nka 5 kandi za kijyambere, inzu narayivuguruye, abana biga neza, ubwisungane mu kwivuza turabugura ku gihe, ibi byose rero nabigezeho kubera kugira aho ngemura umusaruro wanjye kandi mfite gahunda yo kugera ku bindi byinshi.”

Dushimimana Jean Nepo, umukozi muri uru ruganda, na we yunzemo ati "Njye umushahara ungana n’ibihumbi 30 mpabwa hano wangejeje kuri byinshi, ku buryo ubu nabashije kwigurira imirima 2 mpingamo, ubu nanatangiye umushinga w’ubworozi bw’inkoko kandi nawo uragenda neza.”

Ubuyobozi bw’uru ruganda butangaza ko buzakomeza gukorana neza n’abaturage kandi rubafasha kugera ku iterambere nk’uko Moise Bayigenwa, umukozi w’uru ruganda yabitangaje.

Yagize ati “Uruganda rugenda rwongera umusaruro kugira ngo rugere ku ntego yatumwe rwubakwa, ibi rero bituma abaturage baturanye narwo ndetse n’abahinzi bakomeza kubonamo inyungu kandi twizera ko bizagenda birushaho gutera imbere uko iminsi igenda iza kuko tubizeza imikoranire myiza.”

Uru ruganda buri kwezi rutanga amafaranga agera kuri miliyoni 60 yo kwishyura abakozi basaga 1 000 ndetse n’abahinzi b’icyayi 4 000. Ubu uru ruganda rutunganya toni zigera kuri 16 buri munsi, mu gihe rufite ubushobozi bwo gutunganya toni 60. Ibi ngo biterwa n’uko hari abahinzi batangiye uyu mwuga vuba wo guhinga icyayi, imwe mu mirima yabo ikaba ifite icyayi kitarera.

UMUTONI BEATHA

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE