2017-07-23 11:30:24 clouds 27o High | Kigali Rwanda

Dukurikire:
 
 

Nyagatare:Barishimira ko kuba muri EAC byaborohereje gukora ubucuruzi bwambukiranya imipaka

Yanditswe na IMVAHO NSHYA

Kuya 2017-07-06 08:36:28

 
Share on:
 
Yasuwe:27
 
Yavuzweho:200
 
10
 
10

Bamwe mu baturage bo mu karere ka Nyagatare bakora ubucuruzi bwambukiranya imipaka, barishimira ko kuba u Rwanda ruri mu muryango w’Afurika y’Uburasirazuba (EAC) byateje imbere ubucuruzi bwambukiranya umupaka, ndetse n’umutekano wabo n’ibyabo uriyongera.

Aba bacuruzi bavuga ko ubu baca ku mupaka bemye kuko uburyo bw’imikorere n’imigenderanire byorohejwe. Kuri ubu ngo umucuruzi cyangwa undi wese ushaka kwambuka akoresha indangamuntu gusa, bigatuma igihe cyose akenereye imari ahita yambuka akayizana atagombye kujya gushaka ibindi byangombwa byinshi nkuko byahoze.

Gutinda bashaka ibyangombwa ngo byatumaga hari abaca mu nzira zitemewe byashoboraga no kubakururira ibibazo bitandukanye, bakaba bagirira impanuka mu bihuru bacagamo cyangwa se bagafatwa ibicuruzwa byabo bakabyamburwa ndetse bakanafungwa.

JPEG - 88 kb
Abanyura ku mupaka wa Kagitumba bishimira ko kwambuka bitakibagora

Mbabazi Lilian, ucururiza mu murenge wa Matimba, yagize ati “Ubu nkatwe twegereye umupaka yaba mu masaha ya mu gitondo cyangwa nimugoroba, aho ukenereye ibicuruzwa wakura hakurya uhita wambuka.

Kuzana ibicuruzwa byawe ugaca ku mupaka uba wemye, wizeye ko ntawakwambura. Ikindi unacuruza wumva utuje kuko nta tegeko uba wagonganye naryo.”

Aba bacuruzi barishimira imibanire y’igihugu cy’u Rwanda n’ibindi bihugu nk’ikimenyetso cy’imiyoborere myiza iri mu Rwanda. Ibi bikaba byaroroheje ubuhahirane n’abatuye mu bindi bihugu binateza imbere ubucuruzi bakora.

Mu karere ka Nyagatare, imirenge ya Matimba, Musheri, Karama, Tabagwe na Kiyombe ihana imbibi n’igihugu cya Uganda.Ni mu gihe iya Rwimiyaga na Matimba ihana imbibi n’igihugu cya Tanzania, byose bihuriye n’u Rwanda muri EAC.

Umuyobozi w’Akarere ka Nyagatare, Bwana Mupenzi George akangurira abaturage kubyaza umusaruro aya mahirwe yo guturana n’ibindi bihugu kuko ari isoko ry’umurimo n’iry’ibyo bakora riba ryiyongereye.

Mupenzi George ati “Abaturage b’imirenge myinshi mu karere kacu bashobora gukorana ubucuruzi n’abaturanyi bo mu bihugu duturanye.Ni yo mpamvu tubasaba kunoza ibyo bakora bashyiramo inyongeragaciro kugira ngo bagire imbaraga kuri isoko bahuriraho na bagenzi babo. Ikindi bakwiye kuba maso kugira ngo badasigara ku isoko ry’umurimo duhuriramo.”

Uyu muyobozi akomeza asaba abaturage kwitwararika umutekano w’abambuka mu bindi bihugu bihana imbibi n’Akarere, hamwe n’ibyo batwarayo, kuko iyo baciye ku mupaka uzwi n’umutekano wabo uba wizewe aho guca mu mazi cyangwa n’ahandi bashobora guhurira n’abagizi ba nabi.

Kugeza ubu Umupaka wa Kagitumba n’uwa Buziba ikora iminsi yose hakaba hari na gahunda yo kubaka undi mupaka wa Kizinga muri uyu mwaka w’ingengo y’imari wa 2017/2018.

HITIMANA SERVAND

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE