2017-09-23 09:22:12 clouds 27o High | Kigali Rwanda

Dukurikire:
 
 

Nyagatare:Barasabwa kubahiriza amabwiriza yo gutera umuti wica Nkongwa

Yanditswe na IMVAHO NSHYA

Kuya 2017-05-02 09:17:33

 
Share on:
 
Yasuwe:74
 
Yavuzweho:200
 
10
 
10

Abahinzi bo mu kagari ka Nyakigando, umurenge wa Katabagemu mu karere ka Nyagatare, barasabwa kwitabira gutera umuti wica Nkongwa mu bigori, kandi bagakurikiza amabwiriza kugira ngo iyi ndwara itazateza ibibazo by’umusaruro muke.

Abakorera imirimo y’ubuhinzi mu gishanga cya Rwangingo gihuriweho n’uturere tubiri ari two Nyagatare na Gatsibo, bavuga ko batizeye neza umusaruro bitewe n’iki kibazo cya Nkongwa, ariko ku rundi ruhande bakaba bifuza ko imiti batera yagira icyo ibafasha.

Mfuranzima Charles, umwe muri aba bahinzi, yagize ati:“Mu mezi abiri twatangiye gutera mbere ibigori byari bikiri hasi, ubwo ibigori bifatwa n’ibikoko tukajya dutera Roket n’indi miti tugira ngo ibikoko bizashiramo, ariko kugeza magingo aya byaranze pe, izi Nkongwa wagira ngo ntizumva umuti ubu twashobewe.”

GIF - 155.1 kb
Abahinzi baremeza ko Nkongwa ishobora gukoma mu nkokora gahunda yabo yo kongera umusaruro

Nyuma y’aho babonye ko uyu muti nta cyo urimo kubafasha ndetse kandi n’ibigori byabo biri mu mirima bikaba bikomeje kuribwa na nkongwa, aba bahinzi begereye abagoronome, inama bagiriwe ni uko bagomba guhindura umuti bakajya bahinduranya n’undi witwa Rava.

Mfuranzima yakomeje agira ati “Ariko twaje kureba nka nyuma y’icyumweru maze gutera, ujyamo ugasanga ubuto bwarapfuye ariko ikinini ugasanga ari kizima, sinzi niba ubuyobozi nka RAB bwashobora kudufasha bityo bakatumenyera niba hari indi miti irenze ubushobozi kuri iyi batubwiye akaba ari yo dukoresha.”

Ku rundi ruhande ariko, ngo n’ubwo hari abagiye bagirwa inama yo gutera umuti uzwi ku izina rya Rava, ubuyobozi bw’ikigo cy’igihugu gishinzwe ubuhinzi n’ubworozi RAB, bwo buvuga ko impamvu butekereza ko ibi bisimba bidapfa ari uko bakoresha uyu muti umaze igihe waraciwe, abawukoresha bagura mu buryo bwa magendu.

Asubiza iki kibazo aba bahinzi bafite, Ayinkamiye Agnes, uhagarariye ikigo RAB mu karere ka Nyagatare, yagaragaje ko uburyo uyu muti aba bahinzi bawuteramo bushobora kuba butandukanye n’uko wagenewe gukoreshwa, bikaba bishoboka ko bawutera nabi bikaba byatuma utu dukoko tudapfa, ikindi ngo n’uburyo bwo kuvanga uyu muti hari n’ababikora nabi.

Yagize ati “Ikigaragara, impamvu irimo kubitera ni uburyo barimo gutera umuti utica, hari uwitwa Rava, uwo muti waraciwe urimo urakoreshwa mu buryo bwa forode! Hari umuti wemewe witwa Roket uri no ku isoko hano turi no gukangurira abahinzi.

Ugasanga rero nk’umukozi aragenda yiterera inyuma ku mababi nyamara kino gisimba cyo cyihishe mu mwumba w’ikigori.”

Uyu muyobozi akomeza vuga ko muri Litiro y’amazi hajyamo mirilitiro y’umuti wa Roket, mu gihe usanga hari abahinzi benshi bakoresha mirilitiro eshanu bibwira ko gukoresha umuti mwinshi ari byo bihita byica utu dukoko, akaba agira inama aba bahinzi bose muri rusange kujya bakurikiza amabwiriza yo kuvanga uyu muti no kuwutera.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE