2017-08-23 07:41:18 clouds 27o High | Kigali Rwanda

Dukurikire:
 
 

Nyabihu:Guhuza umunsi w’isoko ry’inka na Rubavu biteza igihombo abacuruzi

Yanditswe na IMVAHO NSHYA

Kuya 2017-06-14 06:06:52

 
Share on:
 
Yasuwe:22
 
Yavuzweho:200
 
10
 
10

Abacuruzi b’inka bo mu karere ka Nyabihu barema isoko rya Bigogwe, bavuga ko babangamiwe no kuba iminsi isoko ryabo riremeraho ihuye n’iyo iryo mu karere ka Rubavu riremeraho, bigatuma batabona abakiriya.

Ni ikibazo ubuyobozi bw’akarere ka Nyabihu butangaza ko kizwi ndetse ngo bukaba bwaramaze kumvikana n’akarere ka Rubavu ko iyi minsi utu turere tugiye kuyigabana.

Maniraguha Celestin, umucuruzi w’inka mu isoko rya Bigogwe yagize ati “Kuri ubu dufite ikibazo cyo kuba nta baguzi tukigira muri iri soko kubera ko isoko ry’amatungo rya Rubavu riremera iminsi ihwanye n’iyacu, aho Bigogwe rirema ku wa 1 no ku wa 4, n’irya Rubavu bikaba uko.

Ibi rero bituma nta baguzi tugira kuko nk’ubu amakamyo aza gutwara inka amenshi ava muri Rubavu, iyo rero abonye inka aho hafi nta bwo yirirwa agera hano ahubwo ahitamo gupakira iza Rubavu, ubwo izacu zikaba zirarase, kubera ko nyine amasoko aba ahuje iminsi.”

JPEG - 239.6 kb
Iyo amasoko y’inka yaremeye umunsi umwe, iryo muri Nyabihu ribura abakiriya

Yakomeje agira ati “Ikindi kandi ni uko haba ubwo dufatiwe mu nzira ngo ntitwagannye rimwe muri aya bakaduca amande, nifuza ko nibura iri soko rya Bigogwe ryajya rirema umunsi umwe mu cyumweru irindi naryo rikarema undi, ibi byagabanyamo nibura igihombo duhura na cyo, ibi kandi nta n’ubwo ari na twe twenyine bigiraho ingaruka gusa kuko n’imisoro ntitangwa neza”.

Umuyobozi w’akarere ka Nyabihu Uwanzwenuwe Theoneste yagize ati “Ikibazo cyo kuba isoko ry’inka rya Kanzenze muri Rubavu n’irya Bigogwe muri Nyabihu abangikanye kubera ko aremera umunsi umwe ni ikibazo cyari kimaze igihe gito, ariko nyuma y’aho ubuyobozi buboneye ko ari ikibazo ubuyobozi bw’uturere twa Nyabihu na Rubavu kuri ubu tumaze kumvikana ko twagabana iyi minsi, aho isoko rya Bigogwe rizajya rirema kwa mbere, ku wa kane ubu hazajya harema isoko Rubavu.

Ni ibintu rero namenyesha abagana iri soko rya bigogwe ko umuti wabonetse, ubu tugiye kunyuza amatangazo hose kugira ngo iyi mpinduka imenyekane”.

Isoko rya Bigogwe nibura ku munsi umwe hazanwa inka zigera kuri 400, izi rero ngo zikaba zifite isoko muri Repubulika iharanira Demokarasi ya Kongo, Kigali n’ahandi.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE