2017-06-23 06:25:07 clouds 27o High | Kigali Rwanda

Dukurikire:
 
 

Nyabihu:Abaturage biyujurije ivuriro ryabatwaye miliyoni 19

Yanditswe na IMVAHO NSHYA

Kuya 2016-08-02 06:59:57

 
Share on:
 
Yasuwe:4
 
Yavuzweho:200
 
10
 
10

Abaturage bo mu Murenge wa Jenda mu Karere ka Nyabihu biyubakiye ivuriro, bavuga ko bari barazengerejewe no kutagira ivuriro mu murenge wabo.

Aba baturage bavuga ko bakoraga ibirometero bigera kuri makumyabiri bajya kwivuza ku ivuriro rya Kareba, riherereye ku ishyamba ry’ibirunga, mu rwego rwo gukemura icyo kibazo bakaba bariyubakiye ivuriro.

Bizimana Emmanuel, umwe muri aba baturage atuye mu santere ya Jenda aragira ati:”Abagore bacu bafatwaga n’ibise bakaba banapfira mu nzira kubera urugendo rurerure tujya gushaka aho batabarirwa.

Ati" Iyi santere mu mujyi hari ubwo haba impanuka noneho bigasaba kujyana umurwayi kwa muganga abenshi bagwaga mu nzira, twagize iki gitekerezo kiduturutsemo kubera kubabara duharanira kwiyubakiri iri vuriro turyitezeho kudutabara.”

JPEG - 169.8 kb
Ivuriro abaturage biyujurije (Foto Iyaremye Y).

Akomeza agira ati:”Ikibazo cyadukomereraga kurushaho ni uko aho twajyaga kwivuza hitwa ku Kabatwa ari mu cyaro cyane kuko nta matagisi ajyayo, hakunze kujyayo amamoto kandi na yo mu masaha ya nijoro hari ubwo atemera kujyayo.”

Nsanzimana Epimaque wo mu Murenge wa Jenda, ufite umugore wapfuye ajya kubyara, yabwiye Imvaho Nshya ati:

“Njye mu mwaka wa 2013 umugore wanjye yafashwe n’inda biba ngombwa ko mujyana kwa muganga, dutega moto ariko kubera ko ibitaro byari kure ndetse n’umuhanda ari mubi, moto yagiye imucunda ku mabuye biba ngombwa ko ayivaho duhamagara imodoka y’umuvandimwe wacu itinda kutugeraho bituma umugore wanjye ahasiga ubuzima.”

Nsanzimana akomeza avuga ko ubu bishimiye ko nk’abaturage babonye ko icyo kibazo kibahangayikishije bakishyira hamwe babasha kwiyubakira ivuriro rito (poste de santé).

Umunyamabanga nshingwabikorwa w’Umurenge wa Jenda Rurangwa Manzi, avuga ko abaturage ayoboye byabagoraga cyane kubera ingendo bakoraga.

Rurangwa ati “Hano ni ahantu hari abaturage benshi, byabafataga urugendo rurerure cyane bagana ibigo nderabuzima, rimwe na rimwe ugasanga umurwayi agira ikibazo ageze mu nzira.

Ariko uyu munsi twabegereje serivisi y’ubuzima, ikindi ahangaha ni ahantu ku muhanda uva Musanze ujya Rubavu ni ahantu hakunze kubera impanuka iri vuriro rije nk’igisubizo ku bazaba bakoze impanuka.”

Sheikh Bahame Hassan, wifatanyije n’abaturage mu gutaha ku mugaragaro, ashima aba baturage ku gikorwa cyabavuyemo ubwabo cyane bibanda ku buzima, akabasaba kubyaza umusaruro ivuriro ryabo barifata neza ndetse batekereza byinshi bakwikorera bishakamo ibisubizo.

Yagize ati:”Ibi abaturage bakoze byo kwiyubakira ivuriro byerekana urugero rwiza rwo kwigira, turabasaba gukomereza aho barushaho gutekereza ibindi bikorwa bibateza imbere bibavuyemo.

Bahawe igihembo kubera kuba aba kabiri mu mirenge igize igihugu mu bikorwa by’umuganda bakomereze aho.”

Iri vuriro ryuzuye ritwaye miliyoni 19 z’amafaranga y’u Rwanda, yose akaba yaravuye mu nkunga abaturage bakusanyije, bakaba bahembwe amafaranga miliyoni n’igice n’igikombe.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE