2017-11-22 09:53:14 clouds 27o High | Kigali Rwanda

Dukurikire:
 
 

Nyabihu:Abahinzi babangamiwe n’udukoko twangiza imyaka

Yanditswe na IMVAHO NSHYA

Kuya 2017-07-11 14:59:34

 
Share on:
 
Yasuwe:42
 
Yavuzweho:200
 
10
 
10

Bamwe mu bahinzi bo mu murenge wa Shyira mu karere ka Nyabihu, bavuga ko bugarijwe n’udukoko tumeze nk’ibinyabwoya twatangiriye mu biti by’ibibonobono, none kuri ubu ngo twibasiye amateke n’urutoki.

Utwo dukoko abaturage baravuga ko dufite umuvuduko kandi nabo ngo turabarya, ku buryo hakwiye gufatwa ingamba zo kuturwanya. Icyo kibazo kinemezwa n’inzego zishinzwe ubuhinzi muri uwo murenge, zivuga ko hakwiye gufatwa ingamba nk’izafatiwe Nkongwa mu bigori.

Umwe mu bahinzi witwa Nzagirukwayo Bosco, yagize ati “Ni udusimba tumeze nk’ibinyabwoya dufite ibara ry’icyatsi n’umuhondo; ni ikibazo gikomeye kandi kitubangamiye, byatangiriye ku mateke, nyuma tubona noneho byatangiye no kurira insina aho zirya umwumba, kuko utu dusimba dukunda kurya amababi yorohereye.

JPEG - 498.7 kb
Utu dukoko dusigaye dutobagura n’ibibabi by’amateke

Aha rero niba byatangiye kugera mu bibonobono no mu yindi myaka, twiteguye ko bizadutera inzara, ikindi kandi ni uko utu dukoko turya n’abantu kuko biratubaba ukabyimbirwa cyane nk’iyo uri mu murima wawe ukorera ibihingwa birimo”.

Umukozi ushinzwe ubuhinzi mu murenge wa Shyira Maguru Aloys, yavuze ko ngo mu gihe hagishakishwa ingamba zo guhashya ibyo binyabwoya abaturage baragirwa inama yo gutema ibibonobono aho biri hose no gukoresha umuti wabugenewe.

Yagize ati “Kuri kiriya kibazo cya turiya dusimba twagiriye inama abahinzi gutema ibibonobono, ndetse bagatera n’umuti, k’umucuruzi w’inyongeramusaruro bawuhasanga witwa superimetirine, agacupa kagura amafaranga 700, kandi birakira”.

Impungenge abaturage batewe n’utwo dukoko tumeze nk’ibinyabwoya ni uko dutangiye kwadukira n’urutoki, aho usanga turya amakoma duhereye ku mwumba w’insina, ku buryo kuyitegerezaho umusaruro biba bigoye. Bavuga ko dukwiye kurwanywa kuko dukomeje twabakoma mu nkokora nka kirabiranya bahagurukiye bakayihashya na Nkongwa yatsinzwe ku mbaraga zashowemo n’inzego zinyuranye z’ubuyobozi.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE