Advertisement
 
 
 
 
 
 
 
 

Amakuru | Mu Ntara | Intara

Ngororero: Abana 130 bigira mu cyumba cy’ishuri kimwe   

  Yanditswe na IYAREMYE YVES
 August 2016

 
 

Abarezi n’ababyeyi bo mu kagari ka Mwendo mu murenge wa Kabaya, bahangayikishijwe no kutagira ibyumba by’amashuri bihagije, kuko ubu hari aho abana 130 bigira mu cyumba cy’ishuri kimwe.

Ni nyuma y’uko ibyumba by’amashuri 6 byo ku kigo cy’amashuri cya Mwendo mu murenge wa Kabaya mu Karere ka Ngororero byangijwe n’umutingito wabaye muri Kanama 2015, ubuyobozi bw’ishuri bugahitamo kuyasenya kugira ngo atazateza impanuka akagwa ku bana.

Nzabandora Donat, umuyobozi w’ikigo cy’amashuri cya Mwendo, avuga ko bafite imbogamizi zo kwigisha abana 1617 bo kuri iki kigo ayoboye, bitewe n’ubuke bw’ibyumba by’amashuri, dore ko kuri ubu bafite ibyumba 13 gusa.

Uyu muyobozi yabwiye Imvaho Nshya ati:«Hari umutingito waje kunyuramo, ibyumba byari bishaje byubakishije inkarakara twabonye bizagwa ku baha dufata umwanzuro wo kubisenya.

PNG - 776.4 kb
Abana 130 biga mu ishuri rimwe mu bucucike bukabije (Foto: Iyaremye Yves)

Mu mwaka wa kabiri abana 130 bahurira mu cyumba kimwe, ubwo rero nk’umwarimu gutanga imyitozo myinshi biramugora agahitamo gutanga umwe kugira ngo yoroshye akazi ko gukosora, iyi myigire rero tubona natwe idindiza abana.

Turifuza ubufasha aho bwaturuka hose kuko uburezi buratureba twese, kandi ni inkingi y’iterambere.»

Uyu muyobozi w’amashuri akomeza avuga ko mu gihe bagitegereje ko bazabona ubufasha buturutse ku Karere, ngo biyambaje ibikorwa by’umuganda ukorwa n’abaturage, aho bamaze kubumba no gutwika amatafari ibihumbi 90, gutunda amasiteri 20 y’amabuye no gusiza ibibanza byakubakwamo ibyumba bitatu.

Ni igikorwa abaturage bavuga ko bazakomeza kugiramo uruhare binyuze mu bikorwa by’umuganda, dore ko n’ubundi abatuye muri uyu murenge wa Kabaya babaye indashyikirwa mu bikorwa by’umuganda, mu mwaka wa 2015/2016, baza ku isonga mu mirenge 13 igize akarere ka Ngororero.

Aba baturage bafite abana biga kuri iri shuri bamaze gukora ibikorwa bifite agaciro ka miliyoni 18 z’amafaranga y’u Rwanda, batunganya umudugudu ntangarugero, bakaba babishimiwe na Minisiteri y’ubutegetsi bw’igihugu yabageneye ishimwe, n’akarere kabagenera igihembo cy’amafaranga y’u Rwanda ibihumbi magana abiri.

Umuyobozi w’Akarere ka Ngororero Ndayambaje Godefroid, yizeje aba baturage ubufasha, anavuga ko muri gahunda zihutirwa bafite harimo no kubafasha mu kubaka ibyumba by’amashuri kugira ngo abana bige bisanzuye kandi neza.

Yagize ati:«Amashuri azuzura, turashima aba baturage ko ibikorwa babigira ibyabo, baratangiye bishakira ibisubizo byo kugira ngo abana babo babone aho bigira.

Natwe nk’akarere tuzabafasha ku byo batabasha kwishoboza ariko abana babone aho bigira, kuko natwe ntabwo twishimiye kubona abana 130 mu ishuri rimwe kuko kutiga neza biraduhangayikisha.»

Muri iyi iki kigo cya Mwendo, hakenewe nibura ibyumba 12 byiyongera ku byumba 13 bafite, kugira ngo abana 1617 babashe kwiga bisanzuye.

 

Comments

 
 
Rusizi:Ikibazo cy’imbwa zizerera zikarya abaturage cyahagurukiwe
Rusizi:Ikibazo cy’imbwa zizerera zikarya abaturage cyahagurukiwe

Ikibazo cy’imbwa zizerera zirya abantu mu karere ka Rusizi ngo ntigihangayikishije abaturage gusa, ahubwo gihangayikishije n’ubuyobozi, bukaba busaba abaturage kuba bihanganye igihe cy’imvura (...)

Karongi:Depite Musabyimana yasabye abaturage gukomera kuri ‘Ndi Umunyarwanda
Karongi:Depite Musabyimana yasabye abaturage gukomera kuri ‘Ndi Umunyarwanda

Depite Samuel Musabyimana, yasabye abaturage bo mu karere ka Karongi gukomeza gushyigikira gahunda y’ubumwe n’ubwiyunge, kuko ari byo bizatuma igihugu gikomeza kwihuta mu iterambere, kikaba (...)

Rubavu:Abifuza kuva mu manegeka batuyemo bemerewe amabati
Rubavu:Abifuza kuva mu manegeka batuyemo bemerewe amabati

Ubuyobozi bw’akarere ka Rubavu bwemereye amabati abaturage batishoboye bagera ku 120, bashaka kuva mu manegeka, mu rwego rwo kubafasha gutura mu mudugudu. Ubuyobozi bw’aka karere buvuga ko (...)

Musanze: Umukobwa w’imyaka 20 yihangiye umurimo umwinjiriza 250,000 ku kwezi
Musanze: Umukobwa w’imyaka 20 yihangiye umurimo umwinjiriza 250,000 ku kwezi

Umuhire Catherine, ni umukobwa w’imyaka 20 utuye mu murenge wa Muhoza, mu karere ka Musanze, uvuga ko mu gihe cy’imyaka 2 amaze akora umwuga wo gucura ibyuma bikoreshwa muri feri z’imodoka, ubu (...)

Karongi:Abatuye i Kabuga batewe impungenge n’abajura bahayogoje
Karongi:Abatuye i Kabuga batewe impungenge n’abajura bahayogoje

Abaturage bo mu kagari ka Kabuga mu murenge wa Rugabano mu karere ka Karongi, batewe impungenge n’ubujura bwibasiye ibyuma bitanga ingufu z’amashanyarazi aturuka ku mirasire y’izuba, ibiribwa biri (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.