2017-06-28 08:00:46 clouds 27o High | Kigali Rwanda

Dukurikire:
 
 

Ngororero:Abahinzi bakeneye inganda zitunganya umusaruro w’urutoki

Yanditswe na IMVAHO NSHYA

Kuya 2017-03-21 09:52:36

 
Share on:
 
Yasuwe:362
 
Yavuzweho:200
 
10
 
10

Abahinzi bo mu Karere ka Ngororero bavuga ko kutagira inganda zitunganya umusaruro w’ibikomoka ku rutoki ndetse no ku bindi bihingwa, bituma umusaruro wabo utababyarira umusaruro ukwiye.

Mu kiganiro aba bahinzi bagiranye n’Imvaho Nshya, bavuga ko bagiye bahinga bya kijyambere, batera urutoki rwiza rwo mu bwoko bwa Fiya, ariko bakagurisha bahenzwe kubera kutagira aho bajyana uyu musaruro wabo.Barifuza ko ubuyobozi bwabafasha kububakira uruganda rutunganya uwo musaruro, ukarushaho kubaha inyungu.

Bimwe mu bihingwa bavuga ko bashyizemo imbaraga mu kongera umusaruro wabyo ni urutoki n’imbuto zitandukanye, ariko ugasanga isoko bafite ari iry’abaturage bagura ibyo kurya mu ngo zabo gusa, n’abaza kubigura bakabijyana ahandi babahaye amafaranga make bita intica ntikize.

Nyiramana Speciose, umuhinzi w’urutoki agira ati « Urebye imbaraga nkoresha mu guhinga ntizingana n’inyungu mbona kuko nta soko rigura ibitoki byinshi mfite».

Akomeza avuga ko agomba gutegereza umunsi w’isoko kugira ngo ajyane ibitoki bye ku isoko, aho bigurwa kuri makeya n’ababijyana hanze y’akarere ka Ngororero.

Avuga kandi ko akurikije uko abafite inganda bagurisha ibitoki byabo, ahomba amafaranga 20 kuri buri kilo kimwe. Ibinyomoro byera cyane mu mirenge ya Sovu na Bwira, hamwe n’umusaruro w’urusenda na byo ngo bikeneye isoko rihagije.

Kanyambo Ibrahim, Perezida w’urugaga rw’abikorera muri aka karere we avuga ko inganda nk’izo koko zikenewe, ariko ko abikorera bagifite impungenge ku kuba umusaruro wazihaza.

Yagize ati «Abikorera duhora tubashishikariza gushyiraho inganda nk’izo, ariko usanga bafite ingingimira zo kuba umusaruro udahagije.Dore nk’ubu hari uruganda rutunganya imyumbati rwubatswe n’akarere, ariko iyo urebye aho ruzakura imyumbati urahabura».

Birorimana Jean Paul ushinzwe igenamigambi mu karere ka Ngororero, we avuga ko mu gushyiraho izo nganda babanje gushyiraho ishuri (VTC Hindiro) ryigisha gutunganya umusaruro, ubu ngo akarere kakaba karatangiye icyiciro cyo guhuza ba rwiyemezamirimo n’amakoperative, ndetse na BDF mu gushyiraho izo nganda.

Muri aka karere, uruganda rutunganya imitobe ruri i Nyange ni rwo rukumbi rutunganya umusaruro w’ubuhinzi, uretse inganda z’ikawa n’icyayi.Urwo ruganda rukaba rutabasha kugura umusaruro wose wo muri aka karere nk’uko nyirarwo Nshunguyinka Ananiya yabitangarije Imvaho Nshya.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE