Advertisement
 
 
 
 
 
 
 
 

Amakuru | Mu Ntara | Intara

Ngoma:Umushinga wo kwegereza amazi abaturage wahagaze hasigaye kuyohereza gusa   

  Yanditswe na MANISHIMWE NOËL
 3 months ago

 
 

Abaturage bo mu midugudu ya Rwamutabazi na Rugando, mu kagari ka Ndekwe, umurenge wa Remera, bavuga ko batewe urujijo nuko haje umushinga wo kubegereza amazi meza hagacukurwa imiyoboro, igashyirwamo impombo zitwara amazi, ndetse hakanubakwa ibigega, none amezi akaba abaye 6 batarabona amazi.

Aya mazi yari kugera ku batuye Ndekwe bikozwe n’umushinga wa AEE Rwanda, wubatse umuyoboro wa kilometero zisaga 7.

Ikibazo cyaje kuvuka mu gihe cyo koherezamo amazi ngo abaturage batangire kuvoma, aho ubugenzuzi bwakozwe n’ikigo gishinzwe iby’amazi mu Rwanda WASAC-ishami rya Ngoma, bwagaragaje ko impombo zakoreshwejwe ari nto cyane, ku buryo zishobora guturika, mu gihe hoherejwemo amazi.

JPEG - 363.1 kb
Abatuye Ndekwe bakorewe imiyoboro, bubakirwa ikigega, none amezi abaye 6 bategereje ko amazi meza abageraho

Abatuye mu midugudu ya Rwamutabazi na Rugando yari kugerwaho n’aya mazi babwiye Imvaho Nshya ko bayabonagamo igisubizo, kuko kugeza ubu banywa amazi mabi bita ‘ibiziba’ bavoma mu gishanga cya Rugando, bakagaragaza ko abagiraho ingaruka zo kubatera indwara ziterwa n’umwanda zirimo inzoka zo mu nda.

Ntezirizaza Fidèle yagize ati “Twabonye umushinga uduha amazi, bacukura imiyoboro, bashyiramo amatiyo, turishima ngo noneho tugiye kubona amazi meza, ariko impeshyi irarangiye ntayo tubonye, turibaza ngo bashakaga kutwereka ko natwe izo mpombo zizatugeraho gusa?

Ntituzi niba ikibazo ari rwiyemezamirimo cyangwa ari WASAC, twifuza ko mwadukorera ubuvugizi ayo mazi bayadufungurire, turuhuke kunywa biriya biziba byo muri damu, bidutera inzoka.”

Kalisa Bonaventure na we yagize ati “Aya mazi twabonaga ari igisubizo, ariko ntayo twabonye, badusobanuriye ko ngo impombo bashyizemo ari mbi, ngo bazazikuramo bashyiremo inziza, noneho amazi abone kutugeraho.

Ubu twakomeje kunywa amazi y’iriba, ahubwo inzoka zigiye kuzatwica, amezi 6 arashize bashyizemo izo mpombo, ariko ubu tubirebesha amaso, yaheze mu nzira.”

Ubuyobozi bw’ikigo gishinzwe iby’amazi WASAC mu karere ka Ngoma bugaragaza ko nyuma yo gukora igenzura bagasanga impombo zakoreshwejwe ari nto cyane, ku buryo hashoboraga koherezwamo amazi zigaturika, habayeho kuba bahagaritse uyu mushinga.

Ubu ngo hari gukorwa ibiganiro n’umushinga wa AEE Rwanda, harebwa uburyo izo mpombo zasimbuzwa inziza, kugira ngo abaturage bazahabwe amazi azaramba, kandi ngo ni ikibazo kiri gukurikiranwa vuba.

Nambaje Aphrodise Umuyobozi w’akarere ka Ngoma, avuga ko ubu WASAC yamaze kwemerera akarere ko igihe gusimbuza impombo nto zari zakoreshejwe, hanyuma abatuye Ndekwe bakagerwaho n’amazi meza bari bategereje.

Yagize ati “AEE yakoraga igamije kureba ko amazi meza muri Remera yakwiyongera, WASAC yatwemereye ko kuri ariya amazi hashyizwemo amatiyo matoya, bazayasimbuza afite imbaraga ku buryo mu minsi iri imbere abaturage bazabona amazi meza.”

Umuyoboro w’amazi wa kilometero 7 niwo wubatswe n’umushinga wa AEE Rwanda ngo ugeze amazi meza ku batuye akagari ka Ndekwe, mu midugudu ya Rwamutabazi na Rugando.

 

Comments

pre-moderation

Igitekerezo cyanyu kiragaragara kimaze gusumwa n'umwanditsi mukuru wa Imvaho Nshya

Izina Ryanyu
IGITEKEREZO

 
 
Kayonza:Bakusanyije miliyoni 6 ngo begerezwe amazi barayategereza baraheba
Kayonza:Bakusanyije miliyoni 6 ngo begerezwe amazi barayategereza baraheba

Abaturage bo muri Nyamugari mu murenge wa Ndego mu karere ka Kayonza bavuga ko bakusanyije amafaranga arenga miliyoni 6 ngo babone amazi meza, ariko ngo barayategereza baraheba. Igitekerezo cyo (...)

Rwamagana: Barasabwa gukumira ingengabitekerezo ya Jenoside bahereye mu bana
Rwamagana: Barasabwa gukumira ingengabitekerezo ya Jenoside bahereye mu bana

Umuyobozi w’akarere ka Rwamagana Mbonyumuvunyi Radjab, arasaba abaturage batuye muri aka karere kwirinda gukongeza ingengabitekerezo ya Jenoside mu bana bato, ahubwo bakayikumira kugira ngo (...)

Abaturage b’i Rubavu bishimiye ukwegura kwa bamwe mu bayobozi b’inzego z’ibanze
Abaturage b’i Rubavu bishimiye ukwegura kwa bamwe mu bayobozi b’inzego z’ibanze

Nyuma y’uko mu minsi ishize abayobozi b’utugari n’abakozi babungirije, n’abanyamabanga nshingwabikorwa b’imirenge mu turere tugize intara y’Uburengerazuba bagiye basezera ku mirimo yabo, bamwe mu (...)

Nyamasheke:Meya Kamari aramagana abadukanye ubugome bwo gutema inka
Nyamasheke:Meya Kamari aramagana abadukanye ubugome bwo gutema inka

Ubuyobozi bw’akarere ka Nyamasheke buravuga ko buhangayikishijwe n’abantu badukanye ingeso mbi yo gutema inka z’abaturage. Ni nyuma y’aho mu murenge wa Bushenge, mu karere ka Nyamasheke, umuturage (...)

Rubavu : Abubatse umudugudu w’icyitegererezo bamaze amezi ane bishyuza
Rubavu : Abubatse umudugudu w’icyitegererezo bamaze amezi ane bishyuza

Bamwe mu baturage bubatse inzu z’icyitegererezo mu kagari ka Muhira mu murenge wa Rugerero mu karere ka Rubavu, baravuga ko bamaze amezi ane bategereje kwishyurwa amafaranga agera kuri miliyoni 3 (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.