2017-06-24 09:49:51 clouds 27o High | Kigali Rwanda

Dukurikire:
 
 

Ngoma: Ubuyobozi bwakebuye abaturage basabitswe n’ubusinzi

Yanditswe na IMVAHO NSHYA

Kuya 2017-05-15 11:33:32

 
Share on:
 
Yasuwe:82
 
Yavuzweho:200
 
10
 
10

Ubuyobozi bw’akarere ka Ngoma burakangurira abaturage kwirinda ingeso y’ubusinzi no kugorobereza mu tubari ducuruzizwamo inzoga, kuko bigira ingaruka ku mibanire y’abashakanye n’abagize umuryango muri rusange.

Ni mu gihe hari abaturage bo mu mirenge wa Jarama baherutse kubwira Imvaho Nshya ko kubera ko akenshi bahinga bakeza, hakunze kumvikana ibibazo by’amakimbirane mu ngo n’urugomo, biterwa nuko bamwe mu baturage baba banyoye inzoga bagasinda.

JPEG - 276.3 kb
Ubuhamya bw’abatuye i Ngoma bugaragaza ko abagore n’abagabo bajya mu tubari (Foto Manishimwe N)

Rwiririza Jean Marie Vianney, Umuyobozi w’akarere ka Ngoma wungirije ushinzwe iterambere ry’ubukungu, anenga abagore n’abagabo bagorobereza mu tubari. Avuga ko ari ingeso mbi kandi hakenewe ubufatanye bw’abaturage ubwabo mu kubikumira.

Ati “Hari aho mperutse kujya mu mirenge ya Kazo na Mutenderi, barambwiye bati ‘nta mugore ukijya mu kabari ngo arenze saa kumi n’ebyiri za nimugoroba’. Hari n’aho twageze umugore atanga ubuhamya, ashimira bagenzi be ko bamukuye mu kabari bakamucyura mu rugo hakibona.”

Akomeza avuga ko nubwo hari abatanga ubuhamya bw’uko baretse ubusinzi, bigayitse kuba hacyumvikana abantu batarara mu ngo zabo, bakarara mu tubari kubera ubusinzi.

Ati “Hari aho ugera ugasanga umugore ari mu muhanda saa tatu na saa yine z’ijoro yasinze ari kubyina, cyangwa ugasanga umugabo arajya mu kabari guhera saa kumi n’ebyiri akazageza izindi saa kumi n’ebyiri.

Ndagira ngo mbasabe izo ngeso muzikureho. Niba mukundana, nta bwo mwari mukwiye kwemerera mugenzi wanyu ngo agende mumureba, ajye gusinda.”

Uyu muyobozi w’akarere ka Ngoma avuga ko mu gihe abaturage batwawe n’inzoga biteza amakimbirane mu miryango, bigatuma ababyeyi batita ku bana babo uko bikwiye, hakaduka ibikorwa by’urugomo, kandi n’iterambere rikadindira, kuko abasinzi badashobora kwiteza imbere.

Hari bamwe mu batuye i Ngoma wabwiye Imvaho Nshya ko aho batuye hari abagore n’abagabo bose bajya mu tubari, bakanywa bagasinda.

Umugore umwe ufite umugabo w’umusinzi avuga ko hari ubwo umugabo we ataha yasinze, akamutegeka kujya kurara hanze. Ngo biramugora, ariko yarabyakiriye.

Yagize ati “Hano abagore n’abagabo mu kabari bose bajyayo, bakanywa inzoga bagasinda.Umugabo wanjye anywa inzoga agasinda. Iyo ageze mu rugo rero arantonganya ngaceceka, yambwira gusohoka ngasohoka, yamara gusinzira ngakingura, nkajya ku buriri nkaryama. Ariko mba numva mfite agahinda kuko hari ubwo ambwira ngo ninsohoke, kandi nta kintu nzi nakoze, nkumva birambabaje, ariko ndatuza, narabimenyereye nta kibazo.”

Nubwo hakomeza kumvikana abaturage bamwe batwarwa n’ubusinzi, bakabangamira baturanyi babo, bataretse n’abo mu miryango yabo bwitwe, Itegeko Ngenga N°01/2012/OL ryo kuwa 02/05/2012, rishyiraho igitabo cy’amategeko ahana, ingingo yaryo ya 227, iteganya ko umubyeyi cyangwa umwishingizi, wirengagiza kubahiriza imwe mu nshingano ze, uwangiza uburere bw’umwana we cyangwa uwo ashinzwe kurera kubera kumufata nabi, ureka umwana cyangwa uwo ashinzwe kurera akishora mu buzererezi, utanga ingero mbi z’ubusinzi bw’akamenyero cyangwa kwitwara nabi, ahanishwa igifungo kuva ku mezi abiri (2) ariko kitageze ku mezi atandatu (6), n’ihazabu y’amafaranga y’u Rwanda kuva ku bihumbi ijana, kugeza kuri miliyoni imwe, cyangwa kimwe gusa muri ibyo bihano.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE