Advertisement
 
 
 
 
 
 
 
 

Amakuru | Mu Ntara | Intara

Ngoma:Ntibiyumvisha uburyo bahendwa n’amashanyarazi ‘utanacomekaho radiyo ngo ivuge’   

  Yanditswe na MANISHIMWE NOËL
 4 months ago

 
 

Abaturage bo mu kagari ka Karenge, umurenge Jarama bavuga ko umuriro w’amashanyarazi bahawe ntacyo ubamariye uretse kubahombya, kuko ngo bawutangaho ikiguzi cy’amafaranga menshi kandi nta musaruro ufatika bawubyaza.

Aba baturage babwiye Imvaho Nshya ko bamaze amezi 3 bashishikarijwe gukoresha amashanyarazi ya ‘MeshPower’.

Kuyahabwa byasabaga umuturage gutanga amafaranga ibihumbi 5 by’ifatabuguzi, hanyuma agahabwa amatara 2-3 yo gucana.

JPEG - 264.5 kb
Abatuye mu kagari ka Karenge i Jarama binubira ko amashanyarazi ya MeshPower nta terambere ashobora kubagezaho

Bavuga ko batunguwe no gusanga, aya mashanyarazi ngo ari ayo kubarya amafaranga gusa kuko badashobora gucomekaho radiyo ngo bacurange, cyangwa televisiyo ngo nibura barebe amakuru, mu gihe basabwa gutanga ifatabuguzi y’amafaranga 140 buri munsi ku buryo buhoraho.

Uwiringiyimana Godefred yagize ati“Tubona ari ibyo kuturya amafaranga gusa, nta kamaro bifite. Ibintu ucana matara 2 gusa, ugatanga amafaranga 500 mu minsi 5, kandi nta radiyo wacomekaho, ngo ivuge. Reka da ngo ni ugucana amatara gusa. Ni ibyo kudukenesha, nta muriro urimo.”

Tumusenge Alyos utuye mu mudugudu wa Shirinyota na we yagize ati “Baje batubwira ko ari mwiza ariko siko twabibonye, kuko birahenze ntaho uhuriye namba n’uwa REG.

Iyo ufite amatara 2, ku munsi wishyura amafaranga 140. Ikindi iyo uguze umuriro wa 500, wacana utacana, kuwa gatanu baragukupira.Ni mabi, ahantu ushyiraho radiyo ngo ucurange, ntiwashyiraho televiziyo, ntiwashinga salon ngo wogoshe…ntabwo ushimishije abaturage. Abantu benshi batangiye kubireka, bakigurira umurasire usanzwe.”

Undi muturage we yavuye ko yafashe icyemezo cyo kubwira ba ‘MeshPower’ ngo baze batware ibyabo nyuma yo kubona ntacyo umumariye gifatika uretse kumuhombya.

Yagize ati “Nabyihoreye rwose sinayabona, amafaranga 1000 nyacana iminsi 9 kuko mfite amatara 3.Noneho nijoro ndwaye, ngiye no kubabwira ngo bawunkope, ngo ntabwo bawukopa.Nahise mbivamo, bazaze bajyane ibyabo, sinabishobora. Iminsi 9, gutanga amafaranga 1000, ubwo se wabishobora?”

Icyo bose bahurizaho ni uko ababishyizeho baza bakabitwara nibura bo nk’abaturage bagakusanya ubushobozi bakizanira umuriro ufite imbaraga, wabafasha no gukora imishinga yabateza imbere, kimwe n’uko ubuyobozi bwabakorera ubuvugizi bakegererezwa umuriro w’amashanyarazi ukwirakwiza n’ikigo cya REG.

Murisi Japhet, Umunyamabanga Nshingwabikorwa w’umurenge wa Jarama avuga ko MeshPower yaje gufasha abaturage kuva mu mwijima.

Avuga ko abatuye akagari ka Karenge bamaze gukorerwa ubuvugizi ngo bazahabwe amashanyarazi afite imbaraga.

Yagize ati “MeshPower icyo bashyira imbere ni ugucana.Ibyo kuba bayabyaza umusaruro nko gusudira, kogosha.., kuri ariya ntibishoboka.

Urebye ni uburyo bw’agateganyo bwo kwifashisha, abantu bakava mu icuraburindi.Ariko mu kagari ka Karenge ubusanzwe nta mashanyarizi ahari, ubu rero hari gahunda y’uko dufatanyije na REG tuzahageza umuriro, twamaze gukora ubuvugizi.”

Abatuye i Karenge, mu murenge wa Jarama kandi baninubira ko uyu muriro bahawe ntawe ushobora kuwuzigama ngo akoresha muke, kuko bawuhabwa ugakoreshwa mu gihe cyagenwe niba ari icyumweru ugacana, utacana, ukihombera.

 

Comments

 
 
Guverineri Mureshyankwano yasabye urubyiruko kwirinda ibiyobyabwenge
Guverineri Mureshyankwano yasabye urubyiruko kwirinda ibiyobyabwenge

Ubwo hizihizwaga umunsi ngarukamwaka witiriwe Mutagatifu Yozefu, Guverineri w’Intara y’Amajyepfo Mureshyankwano Marie Rose yasabye abanyeshuri biga mu rwunge rw’amashuri rwitiriwe Mutagatifu Yozefu (...)

Gakenke-Muyongwe: Kubona ‘rezo’ ya telefone biracyari ingorabahizi
Gakenke-Muyongwe: Kubona ‘rezo’ ya telefone biracyari ingorabahizi

Abaturage bo mu murenge wa Muyongwe mu karere ka Gakenke, bavuga ko bababajwe no kuba burira imisozi bajya gushaka ihuzanzira (rezo) rya telefone ngendanwa, bagasaba ubuyobozi kubafasha gukemura (...)

Ngoma:Batewe impungenge n’igiciro cy’amakara cyazamutse cyane
Ngoma:Batewe impungenge n’igiciro cy’amakara cyazamutse cyane

Bamwe mu batuye umujyi wa Ngoma, mu ntara y’Uburasirazuba, baravuga ko bakomerewe n’ikibazo cy’ibura ry’amakara yo gutekesha, n’aho bayabona bakayabona ku giciro bavuga ko gihanitse bagereranyije (...)

Nyamasheke: Umugabo yatawe muri yombi azira kwigabiza ishyamba rya Leta
Nyamasheke: Umugabo yatawe muri yombi azira kwigabiza ishyamba rya Leta

Hategekimana Jean Pierre, w’imyaka 40, afungiwe kuri sitasiyo ya Ruharambuga mu karere ka Nyamasheke akurikiranweho kwigabiza ishyamba rya Leta riri mu mudugudu wa Kacyiru, mu kagari ka Ntendezi, (...)

Ngoma:Urubyiruko rushamikiye ku muryango FPR Inkotanyi rwaremeye imfubyi
Ngoma:Urubyiruko rushamikiye ku muryango FPR Inkotanyi rwaremeye imfubyi

Binyuze mu buryo bw’umuganda, urugaga rw’urubyiruko rushamikiye ku muryango FPR Inkotanyi mu Karere ka Ngoma rwasaniye inzu, runubakira ubwiherero ndetse n’akarima k’igikoni abana b’imfubyi babiri. (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.