Advertisement
 
 
 
 
 
 
 
 

Amakuru | Mu Ntara | Intara

Ngoma:Imashini za rwiyemezamirimo zangije umuhanda ufatiye runini abaturage   

  Yanditswe na MANISHIMWE NOËL
 5 May

 
 

Abaturage bo mu kagari ka Muhurire, umurenge wa Rurenge mu karere ka Ngoma, bavuga ko umuhanda wabo wangirijwe bikomeye n’imashini zikora urugomero ruzajya rwifashishwa mu kuhira imyaka, kuri ubu ubuhahirane bukaba bumaze ibyumweru bibiri busa n’ubwahagaze.

Aba baturage bavuga ko bakomerewe nuko ibiciro by’ingendo byiyongereye, n’ibihingwa bahinze ahegereye umuhanda Remera-Muhurire wangiritse ikangizwa n’abanyamaguru bahanyura banga gukandagira mu biziba byinshi.

Imashini zangije uyu muhanda ni izihaca zijya mu bikorwa byo kubaka urugomero ruzifashishwa mu bikorwa byo kuhira ku buso bugera kuri hegatari 300 imusozi mu kagari ka Muhurire.

JPEG - 57.3 kb
Uyu muhanda warangiritse cyane ku buryo imodoka zitoroherwa no kuwucamo imvura yaguye (Foto Manishimwe N)

Mu buhamya Sibomana utuye mu kagari ka Muhurire yahaye Imvaho Nshya, yagaragaje ko uyu muhanda wangirijwe n’ibimashini biza gukora ku rugomero rusifashwa mu bikorwa by’ubuhinzi, abaturage bakaba bifuza ko iyi kompanyi ikora uru rugomero yanabatunganyiriza umuhanda.

Yagize ati:“Ubundi umuhanda wacu wari nyabagendwa ibimashini biwucamo biza gukora urugomero nibyo byawishe, ubu ni ikibazo gikomeye ingendo ziragoye imodoka ziraheramo, bigatuma nk’umuntu ashaka kugera nk’i Remera bimusaba kuzenguruka.

Twabibwiye ubuyobozi ariko tubona buturingana kuko bimaze iminsi batubwira ko bigiye gukorwa.”

Kanuma Emmanuel, ukoresha kenshi umuhanda Remera-Muhurire, avuga ko yahoze akoresha moto ariko ngo nyuma y’uko uyu muhanda wangiritse yarayiparitse. Agaragaza ko hari bamwe bakigerageza kuwunyuramo na moto, ariko bakagwa mu kiziba.

Yagize ati:“Hari itagisi yaraye ihezemo, yarimo abantu bari bavuye gushyingura.Imodoka nto zo ziheramo ariko izabakora k’urugomero zo ni ndende zibasha gucamo. Rwose ntabwo imiganda y’abaturage yawushobora haragomba imashini.”
Umunyamabanga Nshingwabikorwa w’umurenge wa Remera Nyamutera Emmanuel, avuga ko nyuma yo kugezwaho iki kibazo yamaze kuvugana n’ubuyobozi bwa kompanyi NPD COTRACO iri gukora urugomero, bumumbwira ko bitarenze mu mpera z’iki cyumweru turimo umuhanda uzaba wamaze gutunganywa neza.

Yagize ati:“Ikibazo cy’uwo muhanda turakizi, cyatewe n’imashini nini ziza gukora mu rugomero izindi zizanye ibikoresho byo kubakisha, Navuganye n’umuyobozi wa kampanyi anyizeza ko iki icyumweru dutangiye kizarangira hamaze gukorwa.”

Abatuye Muhurire, mu murenge wa Rurenge bagaragaza ko uyu muhanda Remera-Muhurire umaze ibyumweru bisaga bibiri warangiritse cyane, utari nyabagendwa.

Abaturiye uyu muhanda basaba ba rwiyemezamirimo kujya bitondera ibikorwa remezo rusange, kandi mu gihe babyangije bakajya bibwiriza kubisana, batarindiriye ko abaturage bagomba kwiyambaza inzego z’ubuyobozi.

 

Comments

Who are you?
Your post
  • To create paragraphs, just leave blank lines.

 
 
Rusizi:Laboratwari yagombaga gufasha abanyeshuri imaze imyaka 10 yubakwa
Rusizi:Laboratwari yagombaga gufasha abanyeshuri imaze imyaka 10 yubakwa

Ababyeyi barerera mu ishuri ryisumbuye rya Gishoma riri mu murenge wa Rwimbogo, mu karere ka Rusizi, baravuga ko batewe impungenge na Laboratwari abana babo bagombye kuba bakoresha, imaze imyaka (...)

Huye:Abakoreye ibyahoze ari amakomine barishyuza Akarere ka Huye asaga miliyoni 11
Huye:Abakoreye ibyahoze ari amakomine barishyuza Akarere ka Huye asaga miliyoni 11

Abahoze ari abakozi b’ibyahoze ari amakomine yahurijwe mu karere ka Huye, barishyuza aka karere amafaranga asaga miliyoni cumi n’imwe bakoreye mbere yo guhagarikwa ku mirimo bakoraga. Hashize (...)

Rusizi: Bamwe mu bakirisito binubira kubatirizwa mu mazi mabi
Rusizi: Bamwe mu bakirisito binubira kubatirizwa mu mazi mabi

Bamwe mu bayoboke b’amatorero ya gikirisitu akorera mu karere ka Rusizi mu binubira kubatirizwa mu mazi mabi y’ibishanga. Abaganiriye n’Imvaho Nshya bagaragaza ko iyo hateguwe umubatizo, bisaba ko (...)

Karongi:Abaturage 31 bajyanwe mu bitaro bazira ikigage banyoye mu bukwe
Karongi:Abaturage 31 bajyanwe mu bitaro bazira ikigage banyoye mu bukwe

Abaturage 31 bo mu mudugudu wa Nyagahinga, Akagari ka Ruhinga mu murenge wa Gitesi ho mu karere ka Karongi, bamaze iminsi mu bitaro, nyuma yo kunywa ikigage bikekwa ko gihumanye mu bukwe. Aba (...)

Uburengerazuba: Guverineri Munyantwari yasabwe kwihutisha iterambere
Uburengerazuba: Guverineri Munyantwari yasabwe kwihutisha iterambere

Abanyamuryango ba FPR Inkotanyi mu ntara y’Uburengerazuba, batoye Guverineri Munyantwari Alphonse nk’umuyobozi mushya w’uyu muryango muri iyi Ntara, bamusaba kwihutisha iterambere. Guverineri (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.