2017-07-21 15:15:02 clouds 27o High | Kigali Rwanda

Dukurikire:
 
 

Ngoma:Hari impungenge ko uruganda rwatwaye miliyoni 700 ruzabura imyanda rutunganya

Yanditswe na IMVAHO NSHYA

Kuya 2017-07-09 15:06:27

 
Share on:
 
Yasuwe:319
 
Yavuzweho:200
 
10
 
10

Ubuyobozi bw’ikigo gitunganya imyanda ikayikoramo ibicanwa bitangiza ibidukikije, butangaza ko mu mezi agera kuri 5 iyi kampani imaze igeregeza gukora amakara mu myanda iva mu mujyi w’akarere ka Ngoma, hagaragara imbogamizi y’ubuke bw’imyanda ikenewe kugira ngo uru ruganda rubashe gukora, uko bikwiye.

Ni mu gihe ubuyobozi bw’akarere ka Ngoma butangaza ko ibikorwa byo kubaka no gutunganya aho uru ruganda ruzakorera, n’ibimoteri bimenwamo imyanda, byatangiye gukorwa mu mwaka 2011-2012, kugeza mu mwaka ushize wa 2016-2017, bikaba bimaze gutwara amafaranga y’u Rwanda agera kuri miliyoni 700.

Ahari ibimoteri bimenwaho imyanda iva mu mujyi wa Kibungo, inyubako n’imbuga zizakorerwamo n’uruganda rukora amakara bita ‘briquette’, ava mu myanda ibora; ni ku musozi wa Ruhinga, mu kagari ka Mahango, umurenge wa Kibungo.

JPEG - 268.3 kb
Imashini zikora amakara mu myanda zirahari, ariko imyanda zakabaye zitunganya yabaye mike ( Foto Manishimwe N)

Kuri ubu ubuyobozi bw’akarere ka Ngoma bwamaze kuhageza amashanyarazi azifashishwa, n’amazi agahije.

Bazigwizaho Emmanuel, ushinzwe gukurikirana ibikorwa bya Kampani yitwa SERCO ikora amakara mu myanda, yabwiye Imvaho Nshya ko kuva mu kwezi kwa Gashyantare 2017, batangiye bakora mu buryo bw’igerageza mu bikorwa byo gutunganya amakara ava mu myanda ibora ku kimoteri cya Ruhinga, kugeza ubu imbogamizi bahura nayo ari ubuke bw’imyanda.

Avuga ko mu gihe uru ruganda rwakenera nibura toni zirenga 10 ku kwezi kugira ngo rukore, kugeza ubu, mu gihe kirenga amezi 4 bamaze bakora mu buryo bw’igerageza, bamaze kubona toni 2 z’imyanda gusa.

Ati “Ikibazo, imyanda ni mike cyane.Kuva mu kwezi kwa kabiri kugeza ubu ngubu dufite toni 2 n’igice z’imyanda, mu gihe nibura kugira ngo dukore twari dukeneye byibura toni zigera ku 10, ku kwezi. Muri aka karere ka Ngoma rwose, imyanda biragaragara ko ari mikeya.”

Bazigwizaho agaragaza ko aho bagiye bakora aya makara, usanga agira umwihariko wo kuba aramba ku mbabura kandi akaba ahendutse kuko ikilo kimwe cyayo kigurishwa amafaranga y’u Rwanda 200, gishobora guteka ibishyimbo bigashya neza.

Ni amakara (briquette) kandi adatera imyotsi, ku buryo aho akoreshwa baba batandukanye no kugorwa no gucana amakara, bigatuma habaho kurinda ibidukikije.

Hari bamwe mu batuye i Kibungo babwiye Imvaho Nshya ko uru ruganda rutunganya amakara rutangiye gukora byabafasha koroherwa no kubona ibicanwa, kuko amakara yarwo yaba ahendutse ugereranyine n’uburyo igiciro cy’amakara y’ibiti ubu gihanitse, aho kigeze ku mafaranga y’u Rwanda arenga ibihumbi 9 ku mufuka.

Ntabana Onesphore, utuye mu murenge wa Kibungo yagize ati “Uru ruganda rutangiye gukora rwadukemurira ikibazo cy’inkwi, muri iki gihe zarabuze.Ariko ayo makara abonetse twajya tuza tukaguraho nk’ibiro 2 tukajya gutekesha, nta kibazo. Ubusanzwe ubu guteka bisaba ko abana bajya guhwehura (gutashya), cyangwa se n’umugabo agafata ishoka akajya gusatagura uduti twumye.”

Nambaje Aphrodise, Umuyobozi w’akarere ka Ngoma na we avuga ko uru ruganda rugomba gukora amakara ya ‘briquette’ mu myanda, rushobora kugira ikibazo cy’imyanda idahagije iva mu mujyi wa Kibungo.

Avuga ko ubu batangiye gutekereza uburyo hajya hazanwa n’imyanda yo mu tundi turere nka Kayonza na Kirehe.

Ati “Ibikorwa byo kubaka aho ruganda ruzakorera byararangiye, imashini zagejejwemo ndetse n’amazi n’amashanyarazi byagejejwemo. Ikigaragara koko, ni uko imyanda ishobora kuba mike, kandi dukeneye imyanda myinshi.

Icyo tubona rero ni uko ari ikimoteri gishobora guzafasha n’utundi turere nka Kayonza, Kirehe n’ahandi, imyanda yaho ikajya izanwa hariya.Turi kubitekerezaho kandi tumaze gushoramo amafaranga atari munsi ya miliyoni 700.”

Nubwo kubaka ikimoteri cya Ruhinga bimaze imyaka irenga 6, kugeza ubu imyanda ikaba itaratangira kubyaza amakara nk’uko byari byitezwe, ubuyobozi bw’akarere ka Ngoma butangaza ko bwizeye ko igihembwe cya mbere cy’uyu mwaka wa 2017-2018, kizasiga hatangiye gutunganywa ibicanwa bijya ku isoko.

MANISHIMWE NOËL

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE