2017-11-17 14:59:33 clouds 27o High | Kigali Rwanda

Dukurikire:
 
 

Ngoma:Harakorwa inyingo yo korohereza abafite ubumuga kugera mu nyubako y’ibiro by’akarere

Yanditswe na IMVAHO NSHYA

Kuya 2017-07-06 13:36:06

 
Share on:
 
Yasuwe:71
 
Yavuzweho:200
 
10
 
10

Ubuyobozi bw’akarere ka Ngoma buvuga ko kuba inyubako akarere gakoreramo idafite inzira zorohereza abafite ubumuga ari imbogamizi kuri serivise zigomba guhabwa ababufite, gusa ngo hatangiye gukorwa inyingo z’uburyo kuri iyi nyubako hashyirwa inzira z’abafite ubumuga.

Mu nkuru y’Imvaho Nshya yatangajwe mu kwezi kwa Werurwe mu mwaka wa 2016, bamwe mu bafite ubumuga bw’ingingo bo mu karere ka Ngoma bavugaga ko bagorwa no kugeza ibibazo byabo ku bayobozi batandukanye, bitewe nuko muri zimwe mu nyubako z’imirenge n’ibiro by’aka karere nta nzira zihariye zohorohereza abafite ubumuga, zihaba.

Kugeza ubu by’umwihariko ku nyubako ikorerwamo n’akerere ka Ngoma, mu kagari ka Cyasemakamba, umurenge wa Kibungo, hari bamwe mu bafite ubumuga bagaragaza ko batabona serivise uko bikwiye bitewe nuko hari serivise baba bakeneye ku bayobozi bakuru b’akarere, ntibazihabwe kuko ibiro bakoreramo biri hejuru, kandi kugahera bigasaba guca ku ngazi (escaliers).

JPEG - 84.6 kb
Iyi nyubako akarere ka Ngoma gakoreramo ntiyorohereza abafite ubumuga kuyigeramo

Ubwo yasubizaga ku mbogamzi z’abafite ubumuga bw’ingingo batabasha kugera mu biro bye, ngo abahe serivise uko bikwiye, umuyobozi w’aka karere Nambaje Aphrodise, yatangaje ko ari imbogamizi koko bitewe nuko iyi nyubako yubatswe kera, icyakora yagaragazaga ko abakeneye serivise bafashirizwa mu biro byo hasi, bitabasabye kuzamuka hejuru; aho byabagora kugera.

Yagaragaje kandi ko gahunda ihari, ari iyo kureba uburyo hashyirwaho inzira y’abafite ubumuga.

Ese ubu bigeze he?

Mu kiganiro n’itangazamakuru cyabaye mu mpera z’ukwezi kwa Kamena 2017, Umuyobozi w’akarere ka Ngoma Nambaje Aphrodise, yatangaje ko ubu ikiri gukorwa ari inyingo z’uburyo kuri iyi nyubako akarere gakoreramo hashyirwa inzira yorohereza abafite ubumuga kugera mu biro byose, bakeneyemo serivise.

Yagize ati “Ikibazo kiracyari ku mazu yubatswe kera uyu munsi utahita uvuga ko ugiye kuyavugurura, bisaba kubanza kubikorera inyigo. N’iyi nyubako dukoreramo ikeneye kubanza gusuzumwa no gukorerwa inyigo hakarebwa ngo ushatse kubaka inzira y’abafite ubumuga, urabigenza gute, uramena he? Kuko ushobora gushaka kumena uruhande rumwe, ukayimena yose, igasenyuka… Turacyabikorera inyigo, ariko turabitekereza kuko ni ngombwa cyane.”

Meya Nambaje avuga ko akarere ka Ngoma kagiye no kwigira ku ka Kirehe baturanye (ahashyizwe inzira y’abafite ubumuga), kugira ngo harebwe niba no ku nyubako y’akarere ka Ngoma; byashoboka.

Ati “Hari n’aho twagiye no kwigira ku karere ka Kirehe aho bashyize inzira yorohereza abafite ubumuga, kugira ngo natwe turebe uko hano twabikora, bariya bantu bafite ubumuga babashe kujya bagera mu biro byose, bya hano, aho bakeneye serivise.”

Icyakora ubuyobozi bw’akarere ka Ngoma ntibugaragaza igihe iyi nyubako itorohereza abafite ubumuga akarere gakoreramo izaba yashyizweho uburyo bwo korohereza abafite ubumuga.

Amabwiriza mashya agenga imyubakire, avuga ko uwubaka inzu n’inyubako zihurirwamo n’abantu benshi n’izitangirwamo serivise; ashyiramo uburyo n’inzira zorohereza abafite ubumuga.

Gusa kuba hari inyubako nyinshi zubatswe mbere y’aya mabwiriza biracyari imbogamizi ku bafite ubumuga bakenera serivise zizitangirwamo.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE