2017-08-20 07:43:19 clouds 27o High | Kigali Rwanda

Dukurikire:
 
 

Ngoma:Depite Nyirahirwa yakebuye ababyeyi babiba ingengabitekerezo ya Jenoside mu bana

Yanditswe na IMVAHO NSHYA

Kuya 2017-04-12 07:07:18

 
Share on:
 
Yasuwe:188
 
Yavuzweho:200
 
10
 
10

Depite Nyirahirwa Veneranda, avuga ko bibabaje kuba hari bamwe mu bana bavutse nyuma ya Jenoside yakorewe abatutsi, bagacengezwamo inyigisho z’ivangura n’abo mu miryango bakomokamo.

Yabwiye abaturage ko mu mwaka ushize wa 2016, ubwo we na bagenzi bagiriraga ingendo z’akazi hirya no hino mu turere tw’igihugu, batunguwe no kumva umwana muto w’umukobwa yaramaze kubibwamo ibitekerezo bibi by’ivangura, n’ababyeyi be.

Depite Nyirahirwa Veneranda avuga ko bari mu ntara y’i Burengerazuba, mu karere ka Nyamasheke, mu kigo kimwe cy’amashuri gitangirwaho uburezi bw’ibanze bw’imyaka 12, maze mu gihe batangaga ikiganiro, babaza abana ibibazo muri rusange, niba bazi uko abatutsi basa, maze umukobwa umwe arahaguruka, avuga ko abazi.

Yagize ati “Twarababajije tuti ‘ariko abatutsi basa bate? Ni uko umwana w’umukobwa wiga mu mwaka wa gatanu arahaguruka ati ‘njye ndamuzi, namubonye mu isoko i Kibogora.’

JPEG - 310.3 kb
Depite Nyirahirwa Veneranda asaba ababyeyi kwirinda gucengeza ingengabitekerezo ya Jenoside mu bana babo

Turamubaza tuti ‘ese wabwiye n’iki ko ari umututsi’, aradusubiza ngo yari muremure cyane, afite n’izuru risongoye.’

Turakomeza turamubaza tuti ‘hanyuma se wabwiye n’iki ko ari ko umututsi aba ameze?’ arasubiza ati ‘ni Mama wabimbwiye’. Umwana yabivuze gutyo, turumirwa.”

Iki kiganiro kigufi abadepite bagiranye n’uyu mwana w’umukobwa cyabagaragarije ko hakiri ababyeyi benshi bakifitemo ingengabitekerezo ya Jenoside, kandi babiba inyigisho zuzuyemo amacukubiri mu bana babo.

Aha niho yahereye asaba abatuye akarere ka Ngoma kubwiza abana babo ukuri ku bubi bwa Jenoside, no kubatoza gukora ibyiza, kuko kubigisha ivangura; nta heza byageza umuryango nyarwanda.

Yagize ati “Babyeyi nagira ngo mbisabire, hari byinshi twakwigisha abana bacu, byabagirira umumaro, bitari ukubigisha uburebure n’amasura y’abantu; muzi ko nta kiza na kimwe byatumariye.”

Umugore umwe utuye mu murenge wa Kibungo yabwiye Imvaho Nshya ko hari intambwe yatewe mu kurwanya ingengabitekerezo ya Jenoside, gusa ngo mu miryango imwe haracyari abantu bake bafite umutima wa kinyamaswa, ari nabo bakomeza gukwirakwiza amacakubiri.

Yagize ati “Haracyari abagifite umutima wa kinyamaswa, bakigisha abana babo yuko nta Jenoside yabaye, ahubwo bahaye intambara.Niyo mpamvu habaho kwibuka buri munsi n’abaturage bakigishwa; hakenewe gukomeza kushyirwa ingufu mu kwigisha.”

Kanimba Emmanuel w’imyaka 60 utuye mu murenge wa Remera we avuga ko ababyeyi bigisha amacakubiri abana babo, ari abo kwamaganwa.

Agira ati “Nk’abana turi kubyara ubu, hari abafite imyaka 10, 20 bose bavutse nyuma ya Jenoside, mu burezi dutoza abana, tugerageza kubagaragariza ibyabaye. Nk’ubu mvuye mu biganiro nshobora kugera mu rugo akambaza, nkamusobanurira uko Jenoside yabaye, ariko nkanamubwira ububi bwayo. Kuba hari abana bafite ingengabitekerezo ya Jenoside, ni ikintu cyo kwamaganwa, kuko si kiza; ni ibyo kurwanywa.”

Abakora mu nzego z’uburezi mu Rwanda bavuga ko kuri ubu hari kwiga uburyo amateka ya Jenoside yakorewe abatutsi yajya yigishwa abana kuva mu mashuri abanza.Kuri ubu hakaba hari kunozwa integanyanyigisho, kandi hazabaho no guhugura abarimu bizewe bazajya bigisha ayo mateka; batayagoretse.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE