2017-07-23 11:30:24 clouds 27o High | Kigali Rwanda

Dukurikire:
 
 

Ngoma:Biyogaze yamukijije imvune zo gushaka inkwi n’imyotsi yo mu gikoni

Yanditswe na IMVAHO NSHYA

Kuya 2017-06-30 14:52:03

 
Share on:
 
Yasuwe:32
 
Yavuzweho:200
 
10
 
10

Mukantegano Anciella utuye mu kagari ka Nkanga, umurenge wa Sake, mu karere ka Ngoma, avuga ko ashimira Leta y’u Rwanda yamworohereje kubakirwa Biyogaze, ubu akaba ategura akanateka amafunguro atabanje kurushywa no gushaka inkwi.

Mu kiganiro n’Imvaho Nshya, Mukantegano Anciella w’imyaka isaga 60 yatangaje ko agiye kumara amezi 3 atangiye guteka akoresheje ingufu za Biyogazi.

Mu buhamya bwe yumvikanisha ko we n’umugabo we babana, ubu bakaba bageze mu myaka y’izabukuru, bagorwaga no kubona uwo batuma gutashya (gusenya) inkwi zo gutekesha; banamubona nabwo aho batekera hakarangwa umwanda, bitewe n’ivu, umwotsi n’amakara byaterwaga n’izo nkwi.

JPEG - 273.2 kb
Mukantegano Anciella yemeza ko gutunganya ifunguro bitakimugora kuko akoresha Biyogaze

Kuri ubu ariko, nyuma yo kubakirwa ikigega cya Biyogaze, bagahabwa n’ishyiga, avuga ko mu mezi make amaze atekera kuri Biyogaze, yishimira ko yamworohereje ubuzima, ndetse bugahinduka ku buryo bugaragara nk’uko abisobanura.

Agira ati “Biyogazi yaje ari igisubizo, dore njye n’umuzehe twabaga aha ngaha, nta mwana twagiraga ngo ajye adutorera udukwi, kuko bose baba bari ku mashuri. Ubu uko mundeba uku, mbere kubona inkwi byaratugoraga, kubera ikibazo cy’ubusaza. Ariko ubu mu mezi make maze ntekera kuri Biyogaze, byaroroshye cyane; aya mezi yose nta kibazo dufite .”

Mukantegano asobanura ko kuri ubu atekesha Biyogaze kandi adatinya gutekeraho ibishyimbo n’inyama, kandi bigashya kuko aba afite ingufu nyinshi, zikomoka ku mase y’inka zigera kuri 3 n’inyana; uyu muryango woroye.

Ati “Ubu duteka amata, tugateka icyayi, ibishyimbo, inyama,… nta kibazo dufite. Ubu nubwo ndi umukecuru, ndi umuhinzi, ariko iyo tuvuye guhinga sininganyira guteka, mpita nshyiraho niba ari umuceri, cyangwa ikindi, mu minota mike bikaba birahiye; tukarya.”

Mukantegano Anciella wubakiwe Biyogaze asobanura ko byamutwaye amafaranga y’u Rwanda ibihumbi 100, Leta ikamwishyurira asigaye ibihumbi 300. Akagaragaza ko ashimira Perezida wa Repubulika wabashyiriyeho ubu buryo bwo koherezwa, ndetse ngo kuri we amafaranga yatanze abona ari make cyane, agereranyije n’akamaro abona imifutiye.

Ati “Twebwe twatanze ibihumbi 100 byonyine, andi Leta ni yo yayatanze. Ariko ngereranyije n’akamaro kayo ayo twatanze ni make rwose. Ibi byiza rero nta wundi mbikesha, ndashimira cyane Perezida wacu Paul Kagame ku byiza nk’ibi. Ubu ndi gusaza neza, ntagorwa no kujya gutashya no gutekera mu myotsi.”

Turyareba Sylvestre, Umukozi w’akarere ka Ngoma ushinzwe ibijyanye no gukwirakwiza ingufu za Biyogaze, avuga ko inyinshi muri Biyogaze zubakwa ubu, ari izo mu bwoko bwa ‘Converse’.

Avuga ko ziri mu byiciro 2: ifite agaciro k’amafaranga y’u Rwanda ibihumbi 600, n’iya 400, ariko igice kinini cy’ayo mafaranga abaturage bakagitangirwa na Leta.

Nk’iriya yubakiwe Mukantegano Anciella ifite agaciro k’ibihumbi 400, Leta yamutangiraho amafaranga y’u Rwanda ibihumbi 300 na we atanga ibihumbi 100 bisigaye.

Turaryareba asobanura ko icyo kwishimirwa ari uko abatuye akarere ka Ngoma boroye inka zirenze imwe, bagenda batera intambwe bagasaba kubakirwa ibigega bya Biyogaze, kugira ngo basezerere uburyo bw’inkwi n’amakara, bwangiza ibidukikije.

Icyakora nubwo ubuyobozi bw’akarere ka Ngoma bushima abaturage mu kwitabira gukoresha Biyogaze uyu mwaka wa 2016-2017 urangiye umuhigo akarere kari karihaye wo kubaka Biyogaze 100, utagezweho 100%, kuko imibare igaragaza ko abazubakiwe barenga gato 70.

MANISHIMWE NOËL

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE