2017-08-20 07:43:19 clouds 27o High | Kigali Rwanda

Dukurikire:
 
 

Ngoma:Bibukijwe gukumira icyahungabanya umutekano

Yanditswe na IMVAHO NSHYA

Kuya 2017-08-10 08:16:17

 
Share on:
 
Yasuwe:70
 
Yavuzweho:200
 
10
 
10

Col. Bertin Mukasa Cyubahiro, umuyobozi w’ingabo z’u Rwanda mu turere rwa Bugesera, Kirehe na Ngoma yibutsa abaturage ko umutekano ari umusingi w’amahoro n’iterambere ry’abanyarwanda, kandi bakwiye gukumira icyawuhungabanya.

Ni ubutumwa uyu muyobozi w’ingabo aherutse gutangira mu mirenge ya Rukumberi na Mutendeli, 2 muri 14 igize akarere ka Ngoma.Yibutsa abaturage ko bakwiye kugira uruhare mu kwicungira umutekano no kwirinda icyo ari cyo cyose cyawuhungabanga.

Ati “Icyo tubasaba ni uruhare rwanyu mu kwicungira umutekano, kuko kugira ngo iri terambere rigerweho ni uko dufite umutekano.Kandi umutekano uhari, tuzagera kuri byinshi.”

JPEG - 292.4 kb
Col. Bertin Mukasa Cyubahiro (uwa kabiri uhereye ibumoso) yibutsa abaturage kugira uruhare kwicungira umutekano

Col. Bertin Mukasa yibutsa abaturage ko icyo umugaba w’ikirenga w’ingabo z’u Rwanda, Nyakubwaha Paul Kagame ashyira imbere, ari uguharanira icyakwihutisha iterambere ry’abanyarwanda bose, bakagira ubuzima n’imibereho myiza kandi buri wese akaba hafi y’ibikorwaremezo byose.

Avuga kandi ko ikizatuma bigerwaho, ari uko buri wese agira uruhare mu kubungabunga umutekano u Rwanda rufite, kuko ari wo byose bizubakiraho, bigakomera.Bamwe mu baturage bo mu karere ka Ngoma baganiye n’Imvaho Nshya bavuga ko bamaze gusobanukirwa uruhare rwabo mu kwicungira umutekano.

Ndimubacu Evariste wo mu murenge wa Mutendeli, avuga ko nubwo batuye ku rugabano rw’igihugu cy’u Burundi, nta bibazo by’umutekano muke bahura nabyo, kandi nabo bishyiriyeho ingamba zo kwicungira umutekano, binyuze mu irondo bise ‘ iry’umwuga’.

Ati “Ino aha nubwo duturiye umupaka w’u Burundi, dusanzwe twicungira umutekano.Ku mipaka hararinzwe, kandi natwe ubwacu, umutekano turawucunga nk’abaturage.Dukora amarondo, ndetse by’umwuhariko dufite irondo ry’umwuga, twishyiriyeho, duhemba nk’abaturage.”

Undi muturage we asobanura ko no ku manywa iyo babonye umuntu batazi, bihutira gutanga amakuru mu nzego z’ubuyobozi.

Ati “Ku manywa nabwo tugira uruhare mu kwicungira umutekano, kuko buri wese aba ari ijisho rya mugenzi we. Kandi iyo tubonye nk’umuntu tutazi twihutira gutanga amakuru, tukabimenyesha ubuyobozi n’inzego z’umutekano.”

Umuyobozi w’akarere ka Ngoma Nambaje Aphrodise we, avuga ingabo z’igihugu zishimirwa cyane uburyo zikomeza kubaka mu banyarwanda amahoro n’umutekano, kandi n’abaturage ubwabo bakumva ko bakwiye kibigiramo uruhare.

Ati “Uruhare rw’ingabo z’igihugu rurivugira cyane mu bikorwa bya buri munsi.Ingabo z’igihugu zesheje umuhigo w’amahoro n’umutekano, kandi bakabikora neza, bafatanyije n’abaturage.Abantu ntabwo bacyumva abajura, abanywa ibiyobyabwenge, amasasu, n’ibindi bihungabanya umutekano.”

Meya Nambaje avuga ko ingabo z’u Rwanda zinafasha cyane mu rugamba rwo kurwanya ubukene, no kongera ibikorwaremezo, kubungabunga ubuzima, n’ibindi byinshi, bigamije imibereho myiza n’iterambere ry’abanyarwanda.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE