Advertisement
 
 
 
 
 
 
 
 

Amakuru | Mu Ntara | Intara

Ngoma: Babona umujyi wa Kigali kuri televiziyo batarawukandagizamo ibirenge   

  Yanditswe na MANISHIMWE NOËL
 2 months ago

 
 

Rumwe mu rubyiruko rwo mu murenge wa Mutenderi, akarere ka Ngoma, ruvuga ko ruterwa ipfunwe nuko rumaze imyaka myinshi rutarakandagiza ibirenge i Kigali, bakaba bareba ibyiza n’iterambere kuri televiziyo, ku buryo hari n’abumva ‘Kigali ari amahanga’.

Umurenge wa Mutenderi ni umwe muri 14 igize akarere ka Ngoma, igice cy’amajyepfo y’uyu murenge gihana imbibe n’igihugu cy’u Burundi.

Ubwo ubuyobozi bw’akarerere ka Ngoma bwagezaga ku batuye uyu murenge ikiganiro ku mahirwe n’ibyiza biri mu muryango w’ibihugu by’Afurika y’Uburasirazuba, nyuma y’umuganda usoza ukwezi kwa Nzeri 2016, bamwe mu baturage bagaragaje ko byabagora gutekereza ku rwego rw’Afurika y’Uburasirazuba bataragera no mu mujyi wa Kigali, ariho hafi.

JPEG - 248.4 kb
Meya Nambaje yabwiye ab’i Mutenderi bataragera i Kigali ibyiza byaho, abakumbuza kujyayo(Foto Manishimwe N)

Abaganiye n’Imvaho Nshya nyuma yo guhabwa icyo kiganiro bagaragaje ko baterwa ipfunwe nuko bataragera mu murwa mukuru w’u Rwanda Kigali, bagaragaza ko babibonamo igihombo.

Ndayishimiye Olivier w’imyaka 21 utuye mu kagari ka Mutenderi yagize ati “Numva mpomba cyane kuko iyo mba nzi i Kigali mba nsobanutse, niba hari akazi runaka nkaba najyayo nkagasaba nkakabona; ariko ubu ninakwifata ngo ngiye kugashaka kandi ntahazi, nko ku nyubako bita Convention Centre nkayigeraho nayibona amaso ku maso, izo za Serena Hoteli twumva ngo ziba i Kigali, ariko ntabwo tuhazi.”

Mugenzi we Ntacyonayigize Emmanuel utuye mu kagari ka Muzingira uri mu kigero cy’imyaka 26 na we utaragera i Kigali, we ngo atinya kuba yajyayo wenyine.

Yagize ati “Usibye kuhabona nko kuri televiziyo ntabwo ndabasha kugera i Kigali, kubera ko nta bushobozi ndabona, iyo uri hano mu cyaro uba wumva i Kigali ari nko mu mahanga, kujyayo uri wenyine ari nta muryango urasangayo ukumva ari ikibazo, nk’iyo mpareba kuri televiziyo mbona ntakwijyanayo njyenyine.”

Ku rundi ruhande urubyiruko rugera i Kigali kenshi rwemeza ko hari ingaruka zo gusigara inyuma mu iterambere, zishibora kugera kuri bagenzi babo batarabasha kuhagera.

Annuarite Mukakarisa yagize ati “Iyo umuntu atagenda nk’uw’inaha aba ahombye, kuko ahora yumva ko ubuzima buriho ari ubw’i Mutenderi gusa, ariko iyo ateye intambwe akagera n’ahandi abona byinshi biruseho, akabona ibikorwa by’amajyambere.”

Abakuze barimo Léonidas Kwizera uri mu kigero cy’imyaka 60 wabashije kujya i Kigali, nabo bakumbuza abatarahagera, kujya kureba iterambere ririyo.

Yagize ati “I Kigali mpanyura kenshi ngiye gusura abantu za Ngororero na Gisenyi, ariko iyo mpageze mbona ari byiza cyane kuko irubatse, za etaje, imihanda imeze neza, burya umuntu wese wabonye amafaranga aba akwiye kujyayo.”

Nambaje Aphrodise, Umuyobozi w’akarere ka Ngoma, avuga ko bidakwiye ko abantu babaho batazi ibyiza biri mu gihugu cyabo.Yasabye ab’i Mutenderi gutera intambwe bakajya basura za pariki, imijyi n’inyubako zigezweho.

Yagize ati “Hari ikibazo gikomeye cy’abantu baguma ahantu hamwe, umuntu akavuka Mutenderi, akahiga amashuri, akazarinda ahasazira, ugomba kunyaruka nawe ukareba uko ahandi bameze, ugasarurayo ubwenge, ukazanira abandi.

Amafaranga ibihumbi 5 akujyana i Kigali, akakugarura, ntakwiye kukubuza kujyayo, ngo usure ibyiza, ubone inyubako zirimo na Convention Centre.”

Umuyobozi w’akarere ka Ngoma bunasaba abaturage gusura ibyiza biri mu gihugu cy’u Rwanda birimo ingagi zo Birunga, gusura za Pariki, kureba inzovu n’intare n’izindi nyamaswa imbonankubone, bakareka kumva ko bigomba gusurwa n’abanyamahanga gusa.

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Muhanga : Umushoferi afunzwe akurikiranweho guha umupolisi ruswa
Muhanga : Umushoferi afunzwe akurikiranweho guha umupolisi ruswa

Polisi ikorera mu karere ka Muhanga yafashe umushoferi ukurikiranyweho kugerageza guha ruswa y’amafaranga 5000, umupolisi wari mu kazi mu muhanda kubera amakosa yari akoze ku ya 7 Ukuboza 2016. (...)

Huye:Abahabwaga ingoboka barasaba gusubizwa imisanzu batanze ngo bubake igorofa
Huye:Abahabwaga ingoboka barasaba gusubizwa imisanzu batanze ngo bubake igorofa

Abahabwaga inkunga y’ingoboka mu murenge wa Mbazi mu karere ka Huye, barasaba ko amafaranga bagiye bizigamira ngo hazubakwe inzu y’igorofa n’amacumbi yo gukodeshwa bayasubizwa bakayikenuza, kuko ngo (...)

Rubavu: Inzu y’umuryango wa Rubangura yibasiwe n’inkongi y’umuriro
Rubavu: Inzu y’umuryango wa Rubangura yibasiwe n’inkongi y’umuriro

Inzu y’umuryango w’umushoramari nyakwigendera Rubangura iherereye mu kagari k’amahoro, umurenge wa Gisenyi mu karere ka Rubavu yibasiwe n’inkongi y’umuriro yangirikiramo ibintu byinshi mu ijoro (...)

Rusizi:Laboratwari yagombaga gufasha abanyeshuri imaze imyaka 10 yubakwa
Rusizi:Laboratwari yagombaga gufasha abanyeshuri imaze imyaka 10 yubakwa

Ababyeyi barerera mu ishuri ryisumbuye rya Gishoma riri mu murenge wa Rwimbogo, mu karere ka Rusizi, baravuga ko batewe impungenge na Laboratwari abana babo bagombye kuba bakoresha, imaze imyaka (...)

Huye:Abakoreye ibyahoze ari amakomine barishyuza Akarere ka Huye asaga miliyoni 11
Huye:Abakoreye ibyahoze ari amakomine barishyuza Akarere ka Huye asaga miliyoni 11

Abahoze ari abakozi b’ibyahoze ari amakomine yahurijwe mu karere ka Huye, barishyuza aka karere amafaranga asaga miliyoni cumi n’imwe bakoreye mbere yo guhagarikwa ku mirimo bakoraga. Hashize (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.