2017-06-24 09:49:51 clouds 27o High | Kigali Rwanda

Dukurikire:
 
 

Ngoma:Army Week izarangira hahinzwe hegitari 250

Yanditswe na IMVAHO NSHYA

Kuya 2017-05-07 16:06:29

 
Share on:
 
Yasuwe:50
 
Yavuzweho:200
 
10
 
10

Ku munsi wa mbere watangirijweho ibikorwa ingabo z’u Rwanda zifatanyamo n’abaturage muri gahunda ya Army week, mu murenge wa Zaza, akarere ka Ngoma ingabo zafatanyije n’abaturage guhinga no gutera imigozi y’ibijumba, kuri hegitari zisaga 4, iki gikorwa kizarangira muri Nyakanga kikazasozwa hahinzwe hegitari 250 nk’uko biteganyijwe.

Ku wa 04 Gicurasi 2017, ingabo z’u Rwanda zo mu karere ka Ngoma zifatanyije n’abaturage bo mu murenge wa Zaza guhinga ibijumba kuri site ya Ruhinga igizwe n’ubutaka bwa Leta, ihuriweho n’utugari twa Ruhinga na Ruhembe, iri ku buso bwa hegitari 14.

Abaturage bo mu murenge wa Zaza bari bitabiriye ibi bikorwa binyuze mu matsinda bakoreramo azwi nk’amasibo agera kuri 225, bagaragaje ko bashima cyane ingabo z’u Rwanda zifatanyije nabo mu bikorwa by’amaboko.

JPEG - 54.5 kb
Ibikorwa bya Army Week muri uyu mwaka byibanze no ku buhinzi (Foto Manishimwe N)

Uwimana Népo wo mu kagari ka Ruhinga yagize ati “Njye ni ubwa mbere negereye umusirikare, tugahurira mu gikorwa nk’iki. Ubundi ndabatinya nkanabubaha kuko bagira uruhare rukomeye mu kuducungira umutekano.

Kuba twafatanyije mu gikorwa nk’iki cyo gutabira ibijumba, nabyo kuri twe abaturage bisobanuye ikintu kinini, iyi gahunda turayishimiye.”

Rwiririza Jean Marie Vianney, Umuyobozi w’akarere ka Ngoma wungirije ushinzwe iterambere ry’ubukungu yashimye ingabo z’u Rwanda ku musanzu ukomeye zitanga mu bikorwa biteza imbere igihugu cy’u Rwanda n’Abanyarwanda, zikomeza kugaragaramo.

Yavuze ko gahunda ya Leta y’u Rwanda ari ukugira ngo abaturage bave mu bukene, bakore batere imbere, ikaba n’imwe mu mpamvu hafashwe ingamba zuko ubutaka bwa Leta n’ubwa bamwe mu baturage butabyazwaga umusaruro, bugomba guhingwa, kugira ngo Abanyarwanda babone ibibatunga.

Ati “Nyuma yo kubona ko hari amasambu adahingwa yaba aya Leta n’ay’abantu ku giti cyabo, nta mpamvu yo kubona umukenke hano udahingwa, kandi hari Umunyarwanda uri kwicwa n’inzara.

Hafashwe imyanzuro ivuga ngo kimwe mu bikorwa by’ingabo n’ubuhinzi bukwiye kwinjiramo, kandi dushima ko Umuyobozi wacu Nyakubahwa Perezida wa Repubulika y’u Rwanda Paul Kagame areba kure, agahora ashaka icyateza imbere abanyarwanda n’ubuzima bwabo bukaba bwiza.”

Col. Cyubahiro Bertin Mukasa, Umuyobozi w’ingabo z’u Rwanda mu turere twa Bugesera, Kirehe na Ngoma, yabwiye abaturage ko ingabo z’u Rwanda zizakomeza kubungabunga umutekano w’Abanyarwanda, kuba hafi y’abaturage, gufatanya mu bikorwa bitandukanye bigamije iterambere n’ubuzima bwiza no kubafasha kubona umutekano w’ibyo kurya.

Biteganyijwe ko mu karere ka Ngoma gahunda ya Army week izarangira hahinzwe hegitari zigera kuri 250 mu gihe cy’amezi abiri iki gikorwa kizamara.

Binyuze muri iyi hagunda kandi, mu karere ka Ngoma, ingabo zizafatanya n’abaturage gusana ikiraro gihuza imirenge ya Rukira na Murama, hakazabaho na gahunda yo kuvura abantu indwara zitandukanye ku buntu, izakorwa n’abaganga b’inzobere bo mu ngabo z’u Rwanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE