2017-10-18 07:01:40 clouds 27o High | Kigali Rwanda

Dukurikire:
 
 

Ngoma:Amashuri ya Kiliziya yashimiwe kujyanisha uburezi n’uburere bifite ireme

Yanditswe na IMVAHO NSHYA

Kuya 2017-06-19 08:05:23

 
Share on:
 
Yasuwe:64
 
Yavuzweho:200
 
10
 
10

Ababyeyi batandukanye bo mu karere ka Ngoma, bafite abana biga n’abafite abatarageza igihe cyo gutangira kwiga, bagaragaza ko bifuza ko abana babo bakwiga mu mashuri ya Kiliziya Gatolika bitewe n’uburezi n’uburere bifite ireme, bitangirwa muri ayo mashuri.

Ibi abaturage babitangaje ubwo hizihizwaga umunsi mpuzamahanga w’umwana w’umunyafurika, ku rwego rw’akarere ka Ngoma mu murenge wa Zaza, ibirori byo kuwizihiza bihuzwa n’ibyo gusoza icyumweru cyahariwe uburezi Gatolika.

Ababyeyi bagaragaza ko bifuza ko abana babo biga mu bigo bya Kiliziya Gatolika, bitewe nuko ngo ngo usanga ababyigamo baba bafite ikinyabupfura, n’ubumenyi bufite ireme.

Kitegetse Thaciènne, wo mu murenge wa Zaza, afite umwana umwe wiga mu kigo cy’amashuri ya Kiliziya Gatulika n’undi utarageza igihe cyo gutangira ishuri.

Yagize ati “Iyo umwana yabyirukiye mu bigo Gatolika, ntashobora kujya mu burara, nta rugomo agira, kuko ibigo by’abihaye Imana amasomo yose barayiga, hakiyongeraho no gutozwa gukorera kuri gahunda no kubaha Imana cyane.”

JPEG - 154 kb
Ubuyobozi bwa Kiliziya Gatolika bwiyemeje gukomeza gufatanya na Leta mu guteza imbere uburezi bufite ireme

Ntirugirinshungu Patrice, afite umwana muto utarageze igihe cyo kwiga, ariko icyifuzo cye ni uko yazatangirira kwiga mu mashuri ya kilizita Gatolika, kuko ngo nawe yamaze kumenya ko haba uburere n’uburezi bunoze.

Ati “Nifuza ko umwana mfite yajya mu ishuri Gatolika, kubera ko mu mashuri Gatolika batoza ubupfura, ndetse ushatse gutandukira agakosorwa mu buryo bumufasha kugaruka mu murongo, ntihabeho guterera iyo.Ubona ko ibigo by’amadini bigerageza cyane gutanga ubumenyi bufite ireme n’uburere butandukanye n’ibindi bigo, Roho nzima, ikaba mu mubiri muzima.”

Mu kiganiro n’Imvaho Nshya, Dr. Rwibasira Michel, Umuyobozi wungirije w’ikigo cy’igihugu gishizwe uburezi mu Rwanda, REB, yavuze ko akenshi amashuri y’abihaye Imana aba afite umwihariko wo gutanga ubumenyi, bujyana n’ikinyabupfura.

Ati “Abihaye Imana hari akarusho bagira udasanga mu yandi mashuri, nk’ikinyabupfura, ni n’abantu bakunze kugira gahunda, ibintu byabo bikaba biri ku murongo.”

Dr. Rwibasira agaragaza ko kuba hari ibigo by’amashuri bimwe bitanga uburezi, butari ku rwego rw’iby’abihaye Imana bishobora no guterwa n’ubushobozi bw’ababyeyi, n’ibigo by’amashuri.

Ati “Usanga ibigo by’abihaye Imana bifite ubushobozi bwinshi n’amikoro.Hakaba n’ababyeyi barerera mu bigo by’abihaye Imana nabo usanga mu ngo zabo, basanzwe bafite umurongo mwiza, bagahitamo ibigo by’abihaye Imana kugira ngo abana bakuriremo.Mu gihe hari undi mubyeyi rero, uba wumva icy’ingenzi kuri we ari ubumenyi, akajyana umwana we ahantu bigisha imibare, ubutabire,…”

Ubuyobozi bw’ikigo cy’igihugu gishizwe uburezi buvuga ko ibigo by’amashuri byose bikwiye kuba bitanga uburezi bufite ireme, ndetse agahamagirira ibigo by’abihaye Imana, ibya Leta n’iby’abikorera gukomeza kunoza imikorere.

Ubuyobozi bwa Kiliziya Gatolika mu Rwanda bwo buvuga ko bushishikajwe no kunoza imikoranire n’ubuyobozi bwa Leta y’u Rwanda mu kunoza integanyanyigisho n’ingengabihe y’amashuri yo mu Rwanda, hagamijwe kongerera imbaraga ireme ry’uburezi.

Muri Diyosezi Gatolika ya Kibungo, igizwe n’amaparuwasi 18, babarurwamo ibigo by’amashuri 36 y’inshuke n’abanza, amashuri 56 y’uburezi bw’ibanze bw’imyaka 9 na 12, ndetse n’amashuri 10 abanyeshuri biga babamo, yose ya Kiliziya Gatolika.
MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE