Advertisement
 
 
 
 
 
 
 
 

Amakuru | Mu Ntara | Intara

Ngoma:Abatujwe mu mudugudu w’Ibisubizo bifuza amazi n’amashanyarazi   

  Yanditswe na MANISHIMWE NOËL
 4 months ago

 
 

Imiryango 12 yatujwe mu mudugudu wahawe izina ry’Ibisubizo, mu mudugudu wa Rebero, akagari ka Gahurire, umurenge wa Kazo, baravuga ko batoroherwa no kubaho nta mazi n’amashanyarazi bafite, kandi abenshi muri bo bageze mu zabukuru.

Abatujwe mu mudugudu w’Ibisubizo ni imiryango yakuwe hirya no hino mu karere ka Ngoma, yiganjemo abageze mu zabukuru batishoboye bakuwe mu manegeka, abataragiraga aho baba n’umukecuru umwe wahungutse avuye mu mashyamba ya Repubulika iharanira Demokarasi Congo.

Babwiye Imvaho Nshya ko bashimira ubuyobozi bwabahaye aho kuba heza. Gusa bagaragaza imbogamizi z’uko nta mazi n’amashanyarazi bafite, mu gihe imyaka bagezemo n’ubushobozi bwabo ngo bitaborohera kugera ku migezi ya kure no mu bishanga, aho abandi bajya iyo amazi yabuze.Abandi banagaragaza ko kubona amafaranga yo kuyagura bibagora.

JPEG - 203.5 kb
Umudugudu w’Ibisubizo uracyabangamiwe n’ibikorwa remezo bidahagije (Foto Manishimwe N)

Umwe mu batujwe muri uyu mudugudu aturutse i Musamvu, ni umugore w’imyaka 60.Kugenda ntibimworohera kuko afite ubumuga bw’amaguru.

Yagize ati “Mba njyenyine, kandi hano twatujwe nta mazi dufite nta n’umuriro dufite hafi.Kujya kuvoma bitubera ingorane.

Noneho njyewe mfite n’ubu bumuga, nukwirirwa nicaye hano, keretse iyo ngize nk’umwana nkamwinginga akajya kunzanira utuzi, iyo yanze ubwo nuko.

Gucana nabyo ntibyoroshye, ni agatadowa, iyo nabonye nk’igiceri cya 50 ngura ka peteroli.Twifuza ko batwegereza amazi n’umuriro nk’iyindi midugudu.”

Uwimana Angélique ufite umugabo n’abana 4, wakuwe mu manegeka mu murenge wa Kibungo na we agaragaza ko mu mudugudu w’Icyitegererezo batujwemo bugarijwe n’ubukene, kandi bifuza ibikorwa remezo.

Yagize ati “Baravuga ngo ni umudugudu w’Ibisubizo, ariko sibyo.None se ko nta mazi n’umuriro dufite ahubwo dufite inzara n’ubukene.Nibura tubonye amashanyarazi, bamwe bagifite imbaraga ntibabura n’imishinga mito bakora!”

Bushayija Francis, Umunyamabanga Nshingwabikorwa w’umurenge wa Kazo avuga ku mbogamizi y’ibikorwa remezo imiryango yatujwe mu mudugudu w’ Ibisubizo, yabwiye Imvaho Nshya ko hagiye kurebwa ubushobozi buhari ku buryo bakegererzwa amazi.

Ku kijyanye n’amashanyarazi ho ngo bashonje bahishiwe.

Yagize ati “Ibikowa remezo tubifite muri gahunda, ubundi amabwiriza ateganya ko amazi, abaturage bagomba kuyakura muri metero 500, hariya rero ari nko muri metero 300, uretse ko hari imbogamizi z’abafite ubumuga, ariko uko iterambere n’ubushobozi bizagenda biboneka, tuzayabaha.

Hari amatiyo aca hariya hafi y’umuhanda, ku buryo hazarebwa ubushobozi buhari, bakayahabwa cyane ko abenshi ni abageze mu zabukuru.”

Ku bijyanye n’amashanyarazi, Gitifu Bushayija arizeza abatuye mu mudugudu w’Ibisubizo ko gahunda yo kuyabegereza ihari kandi izatangira gushyirwa mu bikorwa bidatinze.

Agira ati “Amashanyarazi ahenshi mu murenge wacu, aduca hejuru, ariko gahunda ihari ni uko mu cyiciro kigiye gukurikiraho tugiye guterwamo inkunga na Belgium Corporation, bahisemo imirenge 6, n’uwacu urimo.

Ku buryo uyu mwaka utararangira, ibikorwa bizatangira. Kandi gahunda ihari nuko utugari twacu 5, ibigo byose by’amashuri, ndetse n’imidigudu, hose bazahabwa amashanyarazi.Nkaba numva rero bashonje bahishiwe, mu minsi itarambiranye bazayabona.”

Umudugudu wiswe uw’Ibisubizo wubatswe ku bufatanye n’akarere n’imiganda y’abaturage.Watangiye guturwamo mu kwezi k’Ukuboza 2015.

 

Comments

 
 
Guverineri Mureshyankwano yasabye urubyiruko kwirinda ibiyobyabwenge
Guverineri Mureshyankwano yasabye urubyiruko kwirinda ibiyobyabwenge

Ubwo hizihizwaga umunsi ngarukamwaka witiriwe Mutagatifu Yozefu, Guverineri w’Intara y’Amajyepfo Mureshyankwano Marie Rose yasabye abanyeshuri biga mu rwunge rw’amashuri rwitiriwe Mutagatifu Yozefu (...)

Gakenke-Muyongwe: Kubona ‘rezo’ ya telefone biracyari ingorabahizi
Gakenke-Muyongwe: Kubona ‘rezo’ ya telefone biracyari ingorabahizi

Abaturage bo mu murenge wa Muyongwe mu karere ka Gakenke, bavuga ko bababajwe no kuba burira imisozi bajya gushaka ihuzanzira (rezo) rya telefone ngendanwa, bagasaba ubuyobozi kubafasha gukemura (...)

Ngoma:Batewe impungenge n’igiciro cy’amakara cyazamutse cyane
Ngoma:Batewe impungenge n’igiciro cy’amakara cyazamutse cyane

Bamwe mu batuye umujyi wa Ngoma, mu ntara y’Uburasirazuba, baravuga ko bakomerewe n’ikibazo cy’ibura ry’amakara yo gutekesha, n’aho bayabona bakayabona ku giciro bavuga ko gihanitse bagereranyije (...)

Nyamasheke: Umugabo yatawe muri yombi azira kwigabiza ishyamba rya Leta
Nyamasheke: Umugabo yatawe muri yombi azira kwigabiza ishyamba rya Leta

Hategekimana Jean Pierre, w’imyaka 40, afungiwe kuri sitasiyo ya Ruharambuga mu karere ka Nyamasheke akurikiranweho kwigabiza ishyamba rya Leta riri mu mudugudu wa Kacyiru, mu kagari ka Ntendezi, (...)

Ngoma:Urubyiruko rushamikiye ku muryango FPR Inkotanyi rwaremeye imfubyi
Ngoma:Urubyiruko rushamikiye ku muryango FPR Inkotanyi rwaremeye imfubyi

Binyuze mu buryo bw’umuganda, urugaga rw’urubyiruko rushamikiye ku muryango FPR Inkotanyi mu Karere ka Ngoma rwasaniye inzu, runubakira ubwiherero ndetse n’akarima k’igikoni abana b’imfubyi babiri. (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.